خالص تعازينا لأسر الشهداء إخواتنا اللي استشهدوا إمبارح وهما بيأدوا واجبهم في كمين قرية البرث جنوب مدينة رفح، بعد هجوم إرهابي خسيس.. ربنا يرحمهم جميعا ويصبر أهاليهم وكل المصريين.
حتى الآن استشهد ٢٣ مصري بين ضابط وجندي.. وأصيب ٣٣ جندي..
تضحيتهم دي بتخلينا نبدأ من مبدأ وهو إن التوظيف السياسي لموتهم، ولمجمل اللي بيحصل في سيناء مرفوض من أي طرف. الموضوع ببساطة ووضوح جدي وخطير وما يحتملش مزايدات. ونأكد كمان على حقيقة إن الجيش المصري هو جيش كل المصريين، وما يخصش منطقة معينة ولا فئة معينة ولا اتجاه سياسي معين.
ولأن قلوبنا مع اخواتنا في سيناء وفي كل مكان بيدافعوا فيه عن أمن وحدود مصر، فالسؤال في ضوء تكرار الهجمات الإرهابية على الكماين في سيناء بنفس الأسلوب وبنفس النتائج المرعبة بقى واجب. لازم نسأل نفسنا إيه اللي يخلي الكماين دي فعالة ويحفظ حياة اخواتنا المجندين والضباط، ويوفر الأمن والاطمئنان لأهلنا في سينا.. ولازم نطمن على نوعية الخطط وكفاءة التدريب والتسليح في الكماين دي، ونسأل هل هوا مناسب؟ ولا لأ؟ وهل كفاية الخطط اللي السلطة بتطبقها حاليا، ولا محتاجين نطور أساليب تفكيرنا وخططنا علشان نحمي سيناء؟ بنسأل ومن حقنا السؤال، لأن تكرار الخطأ بيقول إن فيه مشكلة ولازم نشوف لها حل.
يا ريت كل واحد وواحدة في الصفحة عنده قريب عسكري أو ضابط بيخدم في سينا، يكلمه النهارده يطمن عليه ويعزيه ويقوله يشد حيله..
أسماء شهداء كمين قرية البرث:
١- عقيد أ.ح أحمد صابر المنسي
٢- نقيب أحمد عمر الشبراوي
٣- ملازم أول أحمد محمد محمود حسانين
٤- عريف محمد السيد رمضان
٥- نقيب محمد صلاح محمد
٦- ملازم أول خالد محمد كمال المغربي
٧- جندي علي علي السيد إبراهيم
٨- جندي محمد عزت إبراهيم
٩- جندي مؤمن رزق أبو اليزيد
١٠- جندي فراج محمد محمود
١١- سائق عماد أمير رشدي يعقوب
١٢- محمد محمود محسن
١٣- أحمد محمد علي نجم
١٤- علي حسن محمد الطوخي
١٥- جندي محمود رجب السيد فتاح
١٦- جندي محمود صبري محمد
١٧- جندي محمد صلاح جاد عرفات
١٨- جندي محمد محمود فراج
١٩- جندي أحمد العربي مصطفى
٢٠- مندوب مدني صبري
٢١- مجهول الهوية
٢٢- مجهول الهوية
٢٣- مجهول الهوية
الموقف المصري
بديل، مشاركة، تغيير
