خالص تعازينا لأسر الشهداء إخواتنا اللي استشهدوا إمبارح وهما بيأدوا واجبهم في كمين الصفا في العريش بعد هجوم إرهابي خسيس.. ربنا يرحمهم جميعا ويصبر أهاليهم وكل المصريين.
تضحيتهم دي بتخلينا نبدأ من مبدأ وهو إن التوظيف السياسي لموتهم، ولمجمل اللي بيحصل في سيناء مرفوض من أي طرف. الموضوع ببساطة ووضوح جدي وخطير وما يحتملش مزايدات. ونأكد كمان على حقيقة إن الجيش المصري هو جيش كل المصريين، وما يخصش منطقة معينة ولا فئة معينة ولا اتجاه سياسي معين.
ولأن قلوبنا مع اخواتنا في سيناء وفي كل مكان بيدافعوا فيه عن أمن وحدود مصر، فالسؤال في ضوء تكرار الهجمات الإرهابية على الكماين في سيناء بنفس الأسلوب وبنفس النتائج المرعبة بقى واجب. لازم نسأل نفسنا إيه اللي يخلي الكماين دي فعالة ويحفظ حياة اخواتنا المجندين والضباط، ويوفر الأمن والاطمئنان لأهلنا في سينا.. ولازم نطمن على نوعية الخطط وكفاءة التدريب والتسليح في الكماين دي، ونسأل هل هوا مناسب؟ ولا لأ؟ وهل كفاية الخطط اللي السلطة بتطبقها حاليا، ولا محتاجين نطور أساليب تفكيرنا وخططنا علشان نحمي سيناء؟ بنسأل ومن حقنا السؤال، لأن تكرار الخطأ بيقول إن فيه مشكلة ولازم نشوف لها حل.
في خلال أسبوع من دلوقتي هنطرح في الصفحة ملف سيناء، الأمن والتنمية، الكماين وحمايتها وسبل مواجهة الإرهاب، والأهم نسأل عن أهلنا هناك، وازاي نساعدهم، ونقف جنبهم في محنتهم.
يا ريت كل واحد وواحدة في الصفحة عنده قريب عسكري أو ضابط بيخدم في سينا، يكلمه النهارده يطمن عليه ويعزيه ويقوله يشد حيله..
شكرا لكل واحد بيشارك في صفحة الموقف المصري بالرأي والمشورة علشان نفكر لصالح تغيير بلدنا للأفضل.. البركة فيكم، وفي كل متطوع بيساهم بوقته وبمجهوده وبأفكاره، لصالح عمل جماعي هدفه مصر أفضل للجميع.
وشكرا لكل أعضاء الصفحة اللي بدعمهم وتشجيعهم بيخلونا نبذل أكتر مجهود ممكن كل يوم علشان نحل فيه مشكلة أو نحلل فيه أزمة بتحصل في بلدنا.
