وإحنا كمان محتاجين نتكلم

“لو أنت خائف من التعبير عن رأيك .. نحتاج لأن نتكلم
لو تم إجبارك على مغادرة بلدك .. نحتاج لأن نتكلم
لو أنك تواجه تمييزاً بسبب عرقك، أو جنسك، أو لونك، أو معتقداتك .. نحتاج لأن نتكلم”
ترجمة لجزء من الإعلان الانجليزي لمؤتمر شباب العالم.
http://bit.ly/2A2yfNV

***

من النهاردة 4 نوفمبر وحتى 10 نوفمبر، هينعقد في شرم الشيخ منتدى شباب العالم، شباب من 100 جنسية ضمن 3000 ضيف هيتم استضافتهم تحت شعار We need to talk ، نحتاج لأن نتكلم.
الجلسة الافتتاحية غداً 5 نوفمبر، وبعدها هتنعقد 40 جلسة نقاشية حول مواضيع محترمة جداً، وبرضه إعلان المؤتمر بالانجليزية كان متقن جداً، وفيه شعارات ممتازة، لكن زي ما بنقول دايما فيه فرق بين الكلام الواقع.

***
وإحنا كمان محتاجين نتكلم..
اليوم الأول للمؤتمر فيه جلسة بعنوان “نحو عالم توحده الآداب والفنون رؤية لتحقيق السلام خلال الثقافة.”
محتاجين نتكلم فيها عن اغلاق المكتبات في مصر.
عن مكتبات الكرامة لمؤسسها الأستاذ جمال عيد، اللي اسسها بتبرع شخصي بقيمة جايزة دولية حصل عليها، وبدل ما الدولة تدعمه قفلوها، ولما الرئيس السيسي اتسأل عن الموضوع في مؤتمر شباب سابق قال انه شأن قانوني وقضائي، ورد عليه الأستاذ جمال انه لحد دلوقتي ولا فيه سند قانوني ولا فيه أي قضية أصلاً عشان يبقى فيها حكم قضائي.
وعن مكتبة البلد اللي اتقفلت في ربط واضح بصاحبها الأستاذ فريد زهران، رئيس الحزب المصري الديموقراطي الاجتماعي.
***
وإحنا كمان عايزين نتكلم..
جلسة بعنوان “نماذج لقادة المستقبل”
كنا نتمنى يشارك فيها إسلام مرعي أمين تنظيم الحزب المصري الديموقراطي، حزب رسمي شرعي وأمين التنظيم ده اللي كان مرشح بالانتخابات زي أي شاب إيجابي، تم القبض عليه في 15 يونيو الماضي ومسجون من وقتها بتهم منها “الانتماء لجماعة محظورة”!!
كنا نتمنى يشارك فيها أندرو ناصف، عضو حزب العيش والحرية، اللي اتحكم عليه بالسجن 5 سنوات بقانون الإرهاب! نحكي للعالم إن عندنا شاب قبطي، إيجابي وبيحب بلده وعايز يشارك فعامل توكيل لحزب شرعي قانوني، يتحاكم بقانون الإرهاب.
كنا نتمنى يشارك فيها المصور الصحفي شوكان، اللي كان مع صغر سنه شغال مع وكالات عالمية، ومسجون منذ أغسطس 2013.
بنتكلم عن اعضاء الاحزاب والصحفيين مش لأنهم فقط الشباب المظلوم، لكن لانهم حالات واضحة جداً مفيهاش جدل، فما بالنا باللي مش اعضاء احزاب او صحفيين.
***
وإحنا كمان عايزين نتكلم..
جلسة بعنوان “دور حرية الصحافة في بناء الدولة”.
محتاجين نتكلم فيها عن مئات المواقع المحجوبة، واللي شملت مواقع معارضة سياسية، وكمان مواقع صحفية مهنية بلا توجه سياسي، بل امتدت لمواقع صحف ورقية يعني واخدة كل الموافقات الامنية والرسمية.
محتاجين نتكلم عن حجب مدى مصر، البداية، البورصة، ديلي نيوز إيجبت، المصريون، مصر العربية، وكل المواقع المحجوبة.
محتاجين نتكلم كمان عن مصادرة الصحف.
عشرات الحالات، ومنها صحف مش معارضة اطلاقا، كلنا فاكرين مؤخراً مصادرة جريدة الصباح عشان مانشيت “مصرية” يوم التصديق على اتفاقية تيران وصنافير، ومصادرة جريدة البوابة رغم ان رئيس تحريرها عبدالرحيم علي، لأنها انتقدت وزير الداخلية.
حد يشرح ده لشباب العالم ويقولهم انه بيحصل ضد القانون والدستور، وبدون ما أي جهة تهتم تصدر حتى بيان توضيحي.

***
وإحنا كمان محتاجين نتكلم..
جلسة بعنوان “دور منظمات المجتمع المدني في تحقيق أهداف التنمية المستدامة” محتاجين نتكلم فيها عن المنظمات اللي اتقفلت واتجمدت اموالها واتمنع سفر مؤسسيها، رغم ان منها اللي ملوش اي علاقة بالسياسة زي “المركز المصري للحق في التعليم” و “مركز قضايا المرأة” و “مركز نظرة للدراسات النسوية” وغيرهم كتير.
محتاجين نتكلم فيها عن القانون المشوه اللي صدر ليجعل كل العمل الأهلي يخضع لشروط صعبة جدا، وتحت رحمة لجنة من الجهات الأمنية.
***
وإحنا كمان محتاجين نتكلم.
اليوم الأول للمؤتمر فيه جلسة بعنوان “كيف تصلح الآداب والفنون ما تفسده الصراعات والحروب”.
عايزين نتكلم عن التضييق على الفنون.
منع اقامة فعالية “الفن ميدان” اللي كانت بتقام بشكل دائم بعد الثورة في ميدان عابدين، وابلاغ المنظمين ان دي “دواعي أمنية”.
عن يوم واحد في ديسمبر 2015 تم فيه اقتحام دار ميريت للنشر، اغلاق مسرح روابط، وكايرو تاون هاوس.
***
محتاجين نتكلم عن أمور كتير جداً، مش هيغيرها الشعارات الجميلة، ولا الحملات الإعلانية المصروف عليها كويس.
الواقع عمره ما هيتغير باللقطة الحلوة، أو بالأماني الطيبة، الواقع هيتغير لما يتم تغييره، سواء بقرار من السلطة، أو بضغط من الشعب، وده دورنا واللي هنفضل محتاجين دايماً نتكلم عنه.