فريق صفحة الموقف المصري بيهني موقع مدى مصر بحصوله على جايزة “رائد الإعلام الحر” الدولية لسنة 2019، وبنهني برضه المصور الصحفي مصطفى درويش لحصوله على جايزة مشتركة بين مؤسسة تومسون وموجو فيست لأحسن تقرير صحفي بالموبايل في العالم، وكمان الصحفيان حسام بهجت وأحمد الشامي المرشحان حالياً بالقائمة النهائية لجائزة “ترو ستوري” العالمية.
Mada Hossam Bahgat Mostafa Darwish Ahmed ElShamy Lina Attalah
*****
– جايزة “رائد الإعلام الحر” بيقدمها المعهد الدولي للصحافة IPI بدءا من سنة ١٩٩٦، وتم تسليمها لموع مدى مصر في حفل بجنيف في سويسرا، بسبب دفاعه عن حرية الإعلام وتغطية الأخبار في مصر بدقة وحيادية واستقلالية.
– الموقع بدأ رحلته في يونيو سنة 2013، بعد ما موقع “اندبندنت إيجبت” قفل – موقع إخباري بالانجليزية تعرض لضغوط وفي النهاية أغلقته مؤسسة المصري اليوم – واتنقلت لينا عطالله مع زملاء لها لتأسيس مدى بنسختين عربية وانجليزية، في وقت كانت فيه أجواء سياسية صعبة، وفضل مستمر بيعرض وجهات نظر حرة مختلفة وتحقيقات صحفية معمقة وشجاعة رغم كل التضييق السياسي ضد حرية التعبير، اللي كان من أهم مظاهرها إن الموقع نفسه كان من أوائل المواقع اللي تم حجبها بلا سند قانوني في مصر!
الموقع بينشر موضوعاته باللغة العربية والانجليزية وتمويله بيتم بخطة مستدامة من مؤسسات مانحة واشتراكات الأعضاء، نشر عدد من التحقيقات المهمة واللي كشفت عن وقائع خطيرة في السنين اللي فاتت، زي تحقيق حسام بهجت ” هكذا انتخب السيسي برلمانه” اللي اتكلم فيه عن اختيار الأجهزة الأمنية لأعضاء البرلمان وتوثيق للقاءات حصلت في مقرات أجهزة أمنية لإعداد قائمة في حب مصر وكواليس تأسيس حزب مستقبل وطن، والموقع خد جوايز قبل كده من ضمنها في 2017 تم اختيار لينا عطاالله رئيسة تحرير الموقع كواحدة من أهم 100 قائد في المستقبل حسب اختيار مجلة Time Magazine.
*****
أما جايزة مؤسسة تومسون للتقارير الصحفية بالموبايل فخدها المصور الصحفي مصطفى درويش بعد منافسة مع 154 صحفي من55 دولة، بسبب تقرير عمله عن رفع أسعار تذاكر القطارات لموقع مدى مصر باللغة الانجليزية وهتلاقوا لينك التقرير ده مع المصادر.
مصطفى درويش صحفي فيديو حُر، بدأ مشواره بالتصوير الصحفي في 2011، واشتغل في مواقع محلية زي البديل واليوم السابع ومدى مصر حالياً، وكمان شغله المميز اتنشر مع مؤسسات إعلامية دولية زي أسوشيتد برس وتايم مجازين والجارديان والواشنطن بوست.
*****
واحنا حاليا في انتظار اعلان نتيجة مسابقة “ترو ستوري” اللي من ضمن تلاتة تم اعلانهم بالقايمة الأخيرة عندنا اتنين مصريين.
حسام بهجت عن تحقيقه بمدى مصر حول الشركة اللي عقدت صفقة استيراد الغاز من اسرائيل، وكشف بالأدلة والمستندات انها مملوكة لجهاز المخابرات، وكمان تعمل عبر شبكة ملاذات ضريبية لتجنب دفع ضرايب في مصر، وبالطبع الموضوع شجاع جدا وسقف غير معتاد بالصحافة المصرية، وتعرضت كل روابط الموضوع البديلة للحجب المستمر.
كنا سابقا عملنا عرض للتحقيق في بوست هننشره في التعليقات.
المرشح المصري التاني هوا الصحفي أحمد الشامي عن تحقيقه “كليوباترا .. صُنعت خارج مصر” اللي اتنشر بموقع مصرواي من انتاج شبكة أريج (الرابط بأول تعليق) اللي بيوثق شبكات فساد دولية بتزور العلامة التجارية لسجائر كليوباترا اللي بتنتجها الشركة الشرقية للدخان في مصر، وده أدى لخسارة مصر مليارات الجنيهات. التحقيق أحدث صدى كبير وتم نقاشه في لجنة الصناعة بمجلس النواب المصري بحضور أحمد الشامي اللي تم توجيه دعوة له، وأوصلت اللجنة بإحالة المسؤولين المقصرين للتحقيق.
*****
شيء جميل ونفخر بيه إنه عندنا صحفيين وصحافة في مصر مستقلة ومهنية على أعلى مستوى، قادرين ياخدوا جوايز دولية مهمة قدام منافسين من العالم كله، وبشكل مستمر رغم المناخ السيء إعلامياً وسياسياً، وده يخلينا مؤمنين بإنه عندنا مستويات صحافة وإعلام ممتازة غير اللي بتصدرهولنا السلطة والأجهزة الأمنية في قنواتها وجرايدها ومواقعها، والصحافة دي بس محتاجة تاخد فرصتها والقيود اللي عليها تتشال، وهتكون الصحافة دي قادرة تخدم مجتمعها بشكل أفضل وتكون فعلا صوت الناس وحارس لمصالحهم وليها دور رقابي ضد الفساد لا يقل أهمية عن الأجهزة الرسمية.
*****
المصادر
