– من 10 أيام الفيسبوك طلع بيان بيعلن إنه قفل عدد كبير من الحسابات، اللي بتروج لأخبار سياسية مزيفة. الحسابات دي كانت بتخضع لإدارة شبكتين، واحدة على صلة مباشرة بالنظام السعودي، والتانية بتدار من شركتين: نيو ويفز المصرية، ونيو وايف الإماراتية.
-اللي حصل بيفكرنا باللي قاله الرئيس السيسي من 3 سنين خلال لقاءه بمثقفين مصريين: “أنا ممكن بكتيبتين أدخل على النت وأعملها دايرة مقفولة”!
– في البوست هنتكلم عن تفاصيل التقرير اللي أصدره الفيسبوك، وهنعرض معلومات من تقرير كتبه Mostafa El-Sayed Hussin في موقع ساسة بوست.
******
إيه اللي عرفناه من بيان الفيسبوك؟
١- إن فيه شبكتين منفصلتين تم إسقاط حساباتهم، واحدة بتدار من السعودية، والتانية بتدار من مصر والإمارات.
٢- الشبكتين كانوا بيمتلكوا عدد ضخم من الحسابات والصفحات والمجموعات وحتى حسابات إنستجرام للترويج للأنظمة المصري والسعودي والإماراتي. ونشر أخبار زائفة، من نوعية الترويج لانتصارات سعودية في اليمن، أو الانحياز لها بأزمتها مع قطر، أو بتدعم المجلس العسكري في السودان، أو خليفة حفتر في ليبيا، أو الدعاية للنظام المصري.
٣- الفيسبوك وقف للشبكة الأولى: 259 حساب شخصي، 102 صفحة عامة، 5 جروبات، و4 ايفنت، و17 حساب على انستجرام.
وللشبكة الثانية أوقف 217 حساب شخصي، و144 صفحة عامة، و 5 جروبات، و31 حساب على انستجرام.
٤- الشبكة الأولى اتصرف عليها ببند الاعلانات فقط على الأقل 167 ألف دولار، والتانية 108 ألف دولار، بمجموع 275 ألف دولار. (أكتر من 4.5 مليون جنيه) ده غير طبعا ملايين تانية اتصرفت لموظفين.
٥- للشبكة الأولى وجدوا إن 13 مليون متابع كانوا بيتابعوا صفحة أو أكثر منها، وللتانية 1.4 مليون متابع.
٦- ما يعرف على تويتر باسم “الذباب الإلكتروني” (حسابات كثيرة على تويتر تستخدمها السلطة السعودية للرد على أي معارض لكلامها الرسمي)، أثبت بيان الفيسبوك بشكل قاطع إنها على صلة بكبار موظفين السلطة السعودية اللي على صلة بولي العهد محمد بن سلمان.
٧- عرفنا البيان على اسم الشركتين المصرية والإماراتية، ويحملان اسمين متشابهين: الشركة المصرية “نيو وايفز New Waves”، والإماراتية نيو ويف New Wave”.
******
نعرف إيه عن شركة نيو ويف المصرية ومين اللي بيديرها؟
– بعد بيان الفيسبوك، الشركتين الإماراتية والمصرية، قاموا بإخفاء كل أثر ليهم على الإنترنت. شركة نيو وايف الإماراتية مثلا وقفت موقعها الإلكتروني، وحذفت حسابات السوشيال ميديا الخاصة بيها.
– الشركة المصرية حاولت تعمل زي الإماراتية، وتحذف موقعها الإلكتروني newwaves.onli،. لكن يبدو إنها نسيت تحذف نطاق تاني، وهو “newwaves.club” واللي فضل متاح ساعات بعد بيان الفيسبوك، وساعدنا نعرف تفاصيل كتير تانية عن الشركة.
– زي إن من عملائها فنانين مصريين، زي: شعبان عبد الرحيم، وموقع “أوليكس مصر OLX)”. لكن أهم عملاء الشركة هي “إيجل إيجبت Eagle Egypt” شركة حراسات خاصة كانت مسؤولة عن تأمين كأس الأمم الأفريقية الأخيرة والمسئولة عن تأمين معظم السفارات الأجنبية في مصر. وبيديرها ضباط شرطة وجيش على المعاش.
– الاسم الأهم اللي ظهر هوا مدير الشركة المصرية دي: عمرو حسين، ضابط جيش مصري سابق، بدأ تأسيس إمبراطوريته على السوشيال ميديا من 2013، بتستضيفه الفضائيات المصرية الخاضعة للنظام بكثافة، وأحيانا بيقدم نفسه على إنه مدير للموارد البشرية، وأحيانا مستشار سوشيال ميديا، وأحيانًا على أنه أدمن لصفحات زي: “يوميات موظف مطحون” و”آزومل” وجروبات شهيرة منها “إتحاد مؤيدي الدول”
– بتكشف صفحة “نيو وايفز” اللي حذفها الفيسبوك، إن الصفحة بيديرها عمرو حسين، ومرات ابنه منار تاج الدين، اللي بتشغل منصب موظفة موارد بشرية في صحيفة البوابة نيوز، الموقع المصري اللي بيديره عبد الرحيم علي، الإعلامي المقرّب من الأجهزة الأمنية المصرية، واللي اشتهر بإذاعة مكالمات خاصة للنشطاء السياسيين المعارضين.
– لكن يبدو إن صلة وكالة عمرو حسين بجريدة “البوابة” أكبر من كده. خاصة وإن عمرو حسين بينشر مقالات في “البوابة” بانتظام من 2015، مقالات بيدعم فيها الرئيس السيسي وبيطالب المصريين في الخارج بعمل لوبي لدعم مصر ضد المؤامرات اللي بتحاك ضدها. وطرح قبل كدة فكرة تأسيس نقابة للعاملين في السوشيال ميديا. وفي المقابل “البوابة” بتنشر دعاية لصفحاته، منها موضوعات كوميكس من صفحة “يوميات موظف مطحون” واحدة من أكبر صفحاته.
*****
ده ليه علاقة بالأجهزة الأمنية؟
– فيه قرائن كتير بتظهر إن الشركة المصرية على صلة بالنظام، منها إن الشركة السعودية اللي في نفس البيان على صلة بالنظام، ومنها التمويل الضخم اللي رصده الفيس بوك، ومنها علاقة عمرو حسين مدير الشركة بالصحيفة المؤيدة للنظام “البوابة”، ورئيس تحريرها عبدالرحيم علي، وعلاقة شركته بكتير من الشركات “السيادية”. منها حضوره الدائم على أغلب الفضائيات المصرية، وبالتأكيد منها التوجهات والانحيازات اللي بيعبر عنها عنها عمرو حسين ولجانه وحساباته.
– دي مش أول مرة يكون فيه كلام عن اللجان الإلكترونية المصرية، وطريقة إدارتها. وشوفنا تسريبات كتير في 2016 من جروب “إتحاد مؤيدي الدولة”، وإدارته وتوجيهه من الصحفي المصري المقرب والمدافع عن النظام إبراهيم الجارحي.
– ونقطة كمان إنه مفيش نفي رسمي علني من أي جهة حكومية عن علاقة النظام المصري بالموضوع، والحاجة الوحيدة اللي شفناها مصدر أمني مجهول بينفي لموقع القاهرة 24! وده بالتأكيد تعامل غير منطقي بينما بنشوف الخارجية المصرية والهيئة العامة للاستعلامات بتصدر بيانات على حاجات أصغر بكتير.
*****
إيه اللي ممكن نشوفه في ده؟
– فيه أكتر من 45 مليون مصري على الفيسبوك. وفي دراسة لجامعة أوريجون الأمريكية، فـ49% من شباب العالم العربي بيحصلوا على الأخبار من الفيسبوك فقط، و63% من شباب العالم العربي بياخدوا أخبارهم من الفيسبوك وتويتر. عشان كده مهم نتكلم، ونعيد ونكرر كلام في أهمية إن الفيسبوك يبقى بيئة أمنة، بعيدا عن سلطة ونفوذ وأموال الأنظمة.
– اتكلما كتير عن إدارة النظام المصري لملف الإعلام، والسيطرة على القنوات التلفزيونية، والمواقع الإلكترونية والصحف وحتى شركات إنتاج المسلسلات والأفلام. وإن ده ضد كل مبادئ حرية الفكر والتعبير، وإنه بيعمل رقابة وقيود رهيبة على أي منتج ثقافي أو فني بيصدر، وبيبوظ صناعة الإعلام والثقافة في مصر.
– وبالفعل بنشهد هبوط وصعوبات كتير في مجال الإعلام، وشوفنا سوق الدراما الموسم اللي فات إزاي اتأثر. وعشان كده أصبح الإنترنت والفيسبوك هما الملجأ والملاذ الأخير لكتير من شباب العالم العربي اللي ببيحثوا عن مصداقية في المحتوى اللي بيتقدملهم. وعشان كده هيفضل أكتر منصة بنحارب عشان استقلالها.
– اتكلمنا كمان كتير عن محاربة الشائعات اللي لو الدولة جادة في محاربتها، هتفتح المجال لحرية صحافة وإعلام، وتتكلم وتتناقش مع المعارضة بدون تخوين ورمي اتهامات، دي الحلول الطبيعية مش تجييش لجان إلكترونية، ولا “عمل الإنترنت دايرة مقفولة بكتبتين” زي ما ذكر السيسي، وبرضه ده مش هيغير الواقع ولا هيغير اللي الناس شايفينه حواليهم.
************
المصادر