– النهاردة فيه دعوات للتظاهر اللي موقفنا منها إنه قرار شخصي، لا ندعو لها ولا ضدها، كل مواطن أدرى باختياراته الشخصية، لكننا بالتأكيد ندعم مبدأ إن من حق المصريين التعبير السلمي عن مطالبهم بكل وسيلة يختاروها من أول الأحزاب لحد التظاهر السلمي.
– لو كان اختيارك هوا المشاركة، فالبوست ده مهم فيه نصايح للحفاظ على السلمية والأمان الشخصي والاجراءات القانونية.
– بنؤكد علي أنه حماية المتظاهرين الملتزمين بالسلمية وعدم التعدي عليهم هي مسؤولية قوات الأمن والجهات الرسمية.
***
1- أولوية قصوى الالتزام بالسلمية، وعدم تكسير أو تخريب أي شيء، لأنه في النهاية كل الممتلكات العامة ملك لينا كمصريين، وكمان مهم عدم اشتباك المتظاهرين مع الشرطة بأي شكل، محدش يرمي طوب أو يهتف هتافات بذيئة استفزازية ضد القوات.
2- البس ملابس تساعد على الجري (كوتش خفيف، بنطلون واسع) .
3- حاول متنزلش لوحدك، النزول في مجموعات أو على الاقل حاول يكون جنبك حد تعرفة صاحبك أو حد من أهلك .
4- خلي معاك حاجة تنفع للحماية من الغاز، ممكن بيبسي أو كولا لأنها لا تثير الشكوك، وممكن خل أو محلول ملح من الصيدلية أو بصل .. كمان في حالة الغاز متدعكش عينك بايدك لأن ده بينشر الغاز على الجلد.
5- حاول يكون معاك شاش وقطن ومطهر لو حصلت اصابة بعد الشر.
6- راجع نصايحنا الخاصة بتأمين موبايلك، خاصة في ظل حملات التفتيش الحالية، أو خد معاك موبايل قديم.
7- متاخدش أي متعلقات مهمة ممكن تفقدها، زي مفاتيح ملهاش نسخة تانية، أو كروت بنكية. خد معاك البطاقة فقط ومتخدش فلوس غير إلا هتحتجها ليوم المظاهرات فقط.
*****
نصائح قانونية:
– احتياطي لو تعرضت للاعتقال، ياريت تكون مجهز على موبايلك نص رسالة فيها اسمك الرباعي، رقم حد من اهلك او أصحابك للتواصل، وتضيف عليها مكان اعتقالك، وتبعتها بسرعة لأي حد تثق فيه .
– اتفق مع صاحبك أو قريبك أن يخش يبلغ واحد من المراكز الحقوقية اللي شغالة علي المعتقلين
زي المركز المصري : https://www.facebook.com/ecesr/
المفوضية المصرية : https://www.facebook.com/ecrf.net/
الشبكة العربية : https://www.facebook.com/AnhriHr/
دي أرقام طوارئ المركز المصري :
01285867000
01201888981
01211198634
01211198639
رقم طوارئ المفوضية المصرية : 01142957992
رقم طوارئ الشبكة العربية :011188810009
– لازم أهلك أول ما يعرفوا بانه تم القبض عليك يتصلوا علي رقم 124 من أي تلفون أرضي ويبعتوا تلغراف للنائب العام بيثبت واقعة إعتقالك بإسمك ورقمك القومي ومكان الإعتقال، لمحاولة منع اختفاءك قسريا ووصول المحامين ليك بأقرب وقت.
– لو اتعرضت علي النيابة من غير محامي حاول تتمسك بعدم الكلام والتحقيق معاك إلا في وجود محامي ليك.
– جاوب على أسئلة النيابة بانكار كل التهم، وتمسك ب “معرفش، مش فاكر، محصلش”، خاصة إنه أصلا مش بيتم مواجهتك بانك خالفت قانون التظاهر بدون ترخيص لان ده عقوبته لوحده الغرامة، فبيحطوا تهم تانية كتير جدا تكسير وتخريب، وانضمام لجماعة ارهابية واساءة استخدام مواقع التواصل وكل التهم المحفوظة دي.
***
– اكتبوا لنا في التعليقات أي نصايح أو أفكار تانية ممكن تشوفو انها مهمة للحفاظ على السلامة الشخصية.
– نتمني يمر اليوم بسلام علي كل المصريين بدون أي خسائر أو اعتقالات، ونتمنى ان السلطة الحالية تسمع صوت الناس اللي غضبانة بشكل رئيسي لأسباب اقتصادية مش سياسية، ونتمني أننا نشوف بلدنا في القريب العاجل بلد فيها عيش وحرية وعدالة اجتماعية، والمصريين يعبروا عن رأيهم في صندوق انتخابات نزيه مش في الشارع.
