– الصورة اللي قدامنا دي لآلاف المتضامنين في مظاهرة في مدينة بولونيا الإيطالية اللي كان بيدرس فيها الطالب المصري باتريك، المظاهرة نظمها اتحاد طلاب الجامعة اللي اتصدموا ان زميلهم اللي الكل بيشهد باحترامه وذوقه اتقبض عليه في مطار القاهرة، واختفى، ولما ظهر قال لمحاميه انه تعرض للتعذيب والصعق بالكهرباء!
– مش بولونيا بس، قضية باتريك كل يوم بتكبر أكتر، لإن اتحاد طلاب بولونيا عضو في تجمع اتحادات طلابية أطلق عبره دعوة في أوروبا كلها، وعدد كبير من المتضامنين تظاهروا في يوم واحد بدعوة من اتحادات 7 جامعات في 7 مدن أوروبية في بودابيست، أوترخت، لودز، يورك، اوفيدو، غرناطة.
-امبارح الأربعاء اتعملت وقفة قدام السفارة المصرية في العاصمة البلجيكية بروكسل.
– سياسيين كتير اتكلموا عن بارتيك منهم أعضاء برلمان إيطالي ووزراء إيطاليين، وكمان رئيس البرلمان الأوروبي طالب بالافراج عنه.
– اتعملت حملة توقيعات عالمية للدعوة للإفراج عن باتريك وصلت دلوقتي ل أكتر من 180 ألف توقيع .. احنا بندعو كل اعضاء صفحتنا يشاركوا في حملة التوقيعات عبر الرابط ده:
وممكن تتابعوا أول بأول كل أخبار حملة التضامن مع باتريك على الصفحة دي:
***
إيه وضع قضية باتريك في مصر حاليا؟
– باتريك بعد ما ظهر من الاختفاء القسري اتكتب في محضر القبض عليه مكتوب أنه اتمسك في كمين في المنصورة، ودا علي عكس حقيقة القبض عليه في المطار!
– التهم الموجهة لباتريك هي بث أخبار كاذبة والتحريض على التظاهر، والتحريض على قلب نظام الحكم، لكن مفيش أي أدلة أو أحراز إلا سكرين شوتس لبوستات تتضمن تأييده للمظاهرات اللي خرجت بدعوة الفنان والمقاول محمد علي، لكن باتريك أنكر صحة نسبتها ليه، ومحاميه دفع بالتزوير.
– محامي باتريك استأنف على قرر الحبس لكن المحكمة رفضت الاستئناف، وبكده هيستمر حبسه لعرض التجديد الجاي يوم 22 فبراير.
– باتريك قال لمحاميه انه تعرض للتعذيب بالضرب والتجريد من الملابس والصعق بالكهرباء.
– الداخلية أصدرت بيان عجيب بتقول فيه بس ان باتريك يحمل الجنسية المصرية ولا يحمل الايطالية، تجاهلو أي حاجة تاني كإن المعنى ده مصري نعمل فيه اللي احنا عايزينه.
– النيابة العامة طلعت بيان يوم الأحد بيقول ماكنش باين عليه علامات التعذيب أثناء التحقيق ولا قال ذلك، لكن تجاهل يذكر أي حاجة عن الاستجابة لطلب محاميه التحقيق في واقعة التعذيب كمجني عليه.
***
– ردود الأفعال الكبيرة مرتبطة بحساسية إيطاليا تحديدا لقصة جوليو ريجيني، اللي كل المظاهرات هناك بتربط باتريك بيه انه اتعرض للاختطاف والتعذيب زي جوليو، وبقو بيرسموا صور باتريك وجوليو على الحيطان مع بعض.
– التضامن الواسع مرتبط كمان بحركة طلابية قوية ومنظمة في ايطاليا وفي باقي الدول الأوروبية، بينزلوا مظاهرات وبيكلموا النواب، ودي قيمة انسانية محترمة ان ناس تعمل كل ده عشان واحد من بلد تاني ميعرفوهوش خالص لكن بيدافعو عن رفض الظلم لطالب زيهم.
– اللي متضايق جدا من ان ناس بره يتكلموا عن باتريك، أو اللي خايف جدا على “سمعة مصر” مفروض يوجه كلامه للي حبسوا باتريك مش لأصحابه اللي طبيعي يعملوا كل جهد عشانه .. مكانش حد هيسمع عن باتريك أصلا لو متقبضش عليه، وكانوا سابوه ياخد اجازته مع أهله في بلده ويرجع يكمل دراسته في إيطاليا زي المعتاد.
****
– بنكرر دعوتنا للمشاركة في حملة توقيعات باتريك ومتابعة أخباره على صفحته ودي أقل حاجة نقدمها لباتريك اللي كل أًصحابه بيحكوا عن جدعنته معاهم، ونتمنى نشوف الطلاب المصريين عندهم حرية يتضامنو مع القضايا اللي تقنعهم، وقبلها اننا منشوفش أي مصري بيتظلم في بلده أصلا.
المصادر
