– من 11 سنة زي النهارده، خرج مصريين بيطالبوا بأبسط حقوقهم في إنهم يعيشوا حياة كريمة بدون تعذيب وإهانة، لو إنت مصري وبتقرأ الكلام دا لأول مرة دلوقتي، يبقى لازم تسمع قصة قصيرة جميلة كان لها أثر كبير في حياة المصريين اللي حواليك.
– حلم المصريين دول كان دولة بدون ظلم أو فساد، عشان كده رفعوا شعارات “عيش- حرية – عدالة اجتماعية – كرامة إنسانية”، ودي أهداف كان سهل تجمع المصريين ضد ظلم دولة المخلوع مبارك.
– مهما اتغيرت الظروف، واختلفت الطرق السياسية، سواء مؤيد أو معارض، أو شاب أو مسن، مهما كانت مهنتك أو أفكارك، أو رؤيتك لايه الوسيلة الأفضل للتغيير، مين ما يحبش يشوف بلده أحسن بلد وبتحقق المطالب دي؟ – الحقيقة إن دي كانت لحظة فخر لكل مصري عاشها وحضر أحداثها، لكن اللي حضروا دول عليهم واجب إنهم يحكوا اللي حصل للأجيال اللي بعد كده، اللي كان صغير وقتها، واللي اتولد بعدها.
– عشان مرت سنين وظهرت سرديات ملفقة وشائعات عن يناير واللي حضروها عايشين، وحاول البعض يخلطوا الأوراق عن اللي حصل في الفترة دي، لطمس التاريخ وتزييفه لأغراض سياسية ضيقة.
– عشان بنشوف أدوات إعلامية موجهة بتحاول تشوه صورة يناير في عين الأجيال الجديدة.
– عشان لازم الجيل دا يعرف إن كان فيه مصريين زيهم بيحبوا بلدهم حاولوا على قد ما يقدروا إنهم يطلبوا لهم مستقبل أفضل، حتى لو النتائج اللي بعد كده كانت مختلفة وتدخلت فيها عوامل كتير تانية.
– لذلك السنة دي كان اختيارنا لتغطية ذكرى الثورة الـ11 من باب الواجب إنه يكون ملف نحيي بيه أبرز محطات ثورة يناير خلال الـ18 يوم حتى تنحي المخلوع مبارك، لكل اللي ما شافش، هنحاول نمر مرور سريع على ذاكرة حية و أبطال شهداء لثورة نبيلة، ونرشح كتب وأفلام عن ثورة يناير.
– كمان هنحاول نفكك بالنقاش والوقائع بعض السرديات اللي اتلفقت ضد ثورة يناير وأهدافها وبتتردد الآن على مسامع الناس، ونشوف ونتتبع إزاي إن مطالب يناير كانت أبسط ما يكون وأعدل ما يكون لكل مصري مش لفئة دون فئة ولا لتيار بعينه.
– فيه رهان ضمني الكل ممكن يحس بيه إن “الناس بتنسى”، وترديد شائعات مسيئة ليناير ممكن يشوها في وعي جيل جاي أو يخلي جيل حاضر يندم، لكننا بنحاول معاكم نتحدى الرهان دا، زي ما المصريين نفسهم تحدوا فكرة إنهم “استسلموا لنظام المخلوع مبارك” والواقع في 25 يناير من 11 سنة أثبت غير كده.
– الثورات كأي حدث بشري مليانة بالأخطاء والعثرات، ودا شيء الكل لازم يصدقه ويتعامل معاه، لكن مش من العدل أبدا إننا منديش اللي حصل دا حقه في وعينا، لأنه يمكن ظهر دلوقتي إنه أكبر مما تخيلنا وقتها، ومش من العدل أبدا إننا نحمل يناير خطايا أنظمة ديكتاتورية سابقة دمرت مقدرات البلد.
– بندعو كل مصري أو غير مصري حضر وقت الثورة يكتب تحت هاشتاج #افتكر_يناير عن أحداث الثورة اللي حضرها وأثرت فيه، ويوجه كلامه لكل اللي محضرش، وعن أبرز الحقائق والوقائع عن أحداث الثورة وكل النقاش اللي اتفتح بعدها.
– منتظرين تفاعلكم مع ملف تغطية يناير اللي هننشره تباعا خلال الأيام اللي جاية، ومش من باب أبدا المناكفة ولكن معركة الذاكرة دي كلنا بنخوضها كلنا لأجل حلم التغيير اللي لسه مكمل معانا، ولاجل ما نعرف كلنا إن فيه ناس حاولت وحلمت من أجل البلد دي.
– لسه المصريين بيحلموا بدولة مواطنة ديمقراطية حديثة بتحترم حقوق الإنسان وبتوفر متطلبات الحياة الكريمة لكل مصري.
– الرحمة والسلام على كل شهدائنا الأبرار اللي ضحوا بحياتهم علشان نعيش في وطن أساسه العدالة والكرامة والحرية.
