– من أيام طلع خطاب من أكثر من 100 مليونير ومليادير حوالين العالم موجه لمنتدى دافوس الاقتصادي، بيحث الحكومات على فرض ضرائب على الثروات الخاصة بيهم.
– الخطاب ده لقى صدى لأنه طلب غريب أنه يطلع من مجموعة من الأغنياء، وكمان لأنه جاي في ظل وقت حكومات كثيرة في العالم بتحاول تعمل ضريبة على الثروة الخاصة بالأغنياء في الدول بتاعتهم.
– في الولايات المتحدة وفي غيرها في مقترحات قوانين بده دلوقتي، لأنه يعتقد أنه ضريبة الثروة دي هتؤدي بشكل كبير لكبح اللامساواة المتزايدة في العالم كله بين الأغنياء والفقراء.
– ايه قصة المطالبات دي؟ وايه اللي بيحصل في العالم وخاصة في الدول المتقدمة اللي فيها معدلات اللامساواة مرتفعة؟ وايه اللي ممكن نستفيد منه في مصر من القصة دي؟
****
ايه اللي حصل؟
– الخطاب المفتوح للحكومات حوالين العالم جه من 102 شخص من المليونيرات والمليارديرات، من 9 دول حول العالم.
– من ضمنهم أبيجل ديزني وريثة إمبراطورية ديزني العالمية، وناس تانية زي نيك هونير وهو مدير محافظ استثمارية مشهور في أمريكا. وموريس بيرل المدير السابق لـ black rock أكبر شركة استثمار في العالم واللي حرفيا كان بيدور تريليونات من الدولارات في البورصة حوالين العالم.
– الخطاب المفتوح ده بعنوان “in taxes we trust” أو “نحن نؤمن بالضرائب” موجه لقادة العالم في منتدى دافوس الاقتصادي من المجموعة اللي بتطلق على نفسها “patriotic millionaires” أو المليونيرات الوطنيين، وفيه ناشدوا بفرض ضريبة ثروات على الأغنى في العالم من اللي ثرواتهم أكثر من 5 مليون دولار.
– دفع ضريبة ثروة تبدأ من 2% سنويا لمن يملكون أكثر من 5 ملايين دولار و3% لمن يملكون أكثر من 50 مليون دولار و5% للمليارديرات يمكن أن يُدر 2.52 تريليون دولار في السنة.
– الرقم ده ممكن ينتشل 2.3 مليار بني آدم حول العالم من الفقر، ويوفر اللقاحات حاليا لكل سكان العالم، بالإضافة لأنه يقدر يوفر تأمين صحي شامل وحماية اجتماعية شاملة لكل مواطني الدول منخفضة ومتوسطة الدخل في العالم حوالي 3.6 مليار بني آدم.
– ضخامة الرقم ده واللي ممكن يحققه للعالم لو فعلا تم إقرار الضريبة دي ممكن نفهمها لما نعرف أنه العالم حاليا فيه أكثر من 3.6 مليون شخص ثروتهم أكثر من 5 مليون دولار (بأرقام متفاوته لعدد الملايين اللي معاهم)، وعندهم حوالي 73 تريليون دولار، الـ73 تريليون دولار تقريبا يساوي تقريبا حوالي 77% من الناتج المحلي العالمي في 2021 والمقدر ب 94 تريليون دولار.
– أيضا العالم فيه 183 ألف شخص بيملكوا ثروات أكثر من 50 مليون دولار، وبيصل مجموع ثرواتهم لـ36.4 تريليون دولار وهو رقم يساوي تقريبا ضعف الناتج المحلي للولايات المتحدة أكبر اقتصاد في العالم واللي كان السنة اللي فاتت في حدود 21 تريليون دولار.
– بالنسبة بقى المليارديرات في العالم هنلاقي الرقم مرعب جدا، تقريبا العالم فيه 2660 ملياردير ومجموع ثرواتهم يساوي 13.7 تريليون دولار، وهو تقريبا بيساوي الناتج المحلي للصين السنة اللي فاتت، والصين هي ثاني أكبر اقتصاد في العالم. يعني لو المليارديرات دول عملوا دولة واستقلوا بيها هيكونوا تاني أو ثالث أكبر اقتصاد في العالم.
****
نشوف ايه من القصة دي؟
– طبعا النداءات بفرض ضريبة عالمية للثروة مش أول مرة تحصل، لكن أول مرة يكون في خطاب زي ده بشكل منظم من مجموعة من الناس، ناس كثير قبل كده من أغنياء العالم اتكلموا عن الموضوع وعن اللامساواة بوصفها تحدي مهم للمجتمعات البشرية.
– النداءات دي جاية في فترة مهمة بعد فترة كورونا، واللي تسبب في زيادة ثروات الأغنياء بشكل كبير جدا بينما ملايين ومليارات البشر حوالين العالم تأثروا بشكل سلبي من الجائحة.
– على سبيل المثال أغنى 100 شخص في الولايات المتحدة في 2020 زادت ثروتهم بحوالي 600 مليار دولار بينما 30 مليون أمريكي تقريبا فقدوا وظائفهم.
– بالتالي حاليا في أمريكا في مقترح بقانون شبيه للمطالبات بالضرائب على المليارديرات في أمريكا واللي كان من المتوقع أنها الضريبة دي تجمع حوالي 78 مليار دولار من أغنى 100 شخص في الولايات المتحدة.
****
ايه الوضع بالنسبة لمصر؟
– مصر زيها زي بقية دول العالم عندها مشكلات كبيرة في توزيع الثروة، بحسب بيانات 2014 قبل التعويم والأزمات الاقتصادية والجائحة، كان أغنى 10 % من المصريين بيملكوا 73.3 % من الثروة في مصر، و الـ10 % دول بياخدوا 30-35 % من الدخل السنوي ( الناتج المحلي).
– في مصر تقريبا حوالي 245 ملياردير، يعني بيملكوا أكثر من مليار جنيه، وبعد الثورة في 2011 أيام ما كان المجال السياسي مفتوح كان في رجال أعمال زي حسن هيكل بيطالبوا بضريبة ثروة مرة واحدة بنسبة 10 %.
– بالتالي مصر لازم تكون القضية دي على رأس أولوياتها، عشان تقليل الفجوة في توزيع الثروات في مصر شيء مهم جدا زي ما مهم نحقق معدلات نمو، لأنه بدون تقليل الفجوة الفقراء مش هيحسوا بمعدلات النمو.
– وعشان منروحش بعيد ونتكلم عن دول من اللي حوالينا، الجزائر أعلنت السنة اللي فاتت إعادة إحياء ضريبة “الثروة”.
– وحددت الجزائر الضريبة حينها بـ 15% لكل من يملك أموالا تتراوح ما بين 100 و150 مليون دينار (1.1 مليون دولار)، وترتفع كلما ارتفعت ثروة قيمة الثروة المملوكة، وطبعا الفكرة بتواجه أزمة في التطبيق في ظل عدم وجود إحصائيات بعدد الأثرياء المعنيين، لكنه كانت خطوة جيدة.
– عشان نقلل الفجوة في توزيع الثروة في مصر محتاجين سياسات اقتصادية كلية، تشمل سياسات ضريبية جديدة، سياسات نقدية من البنك المركزي والحكومة توسعية في الاقتصاد.
– محتاجين سياسات عامة من الحكومة تحاول تقلل الاستثمارات اللي بتضخ في قطاعات العقارات وتوجه الاستثمارات دي ناحية قطاعات منتجة زي الصناعات التحويلية والزراعة.
– محتاجين استراتيجيات متكاملة لمكافحة الفساد والاحتكار تخلي كل المستثمرين سواء الأجانب أو المحليين يقدروا يستثمروا بشكل متساوي بغض النظر عن علاقتهم بالحكومة و دوائر الحكم.
– الكلام دا مش كلام حالم أو كلام عن العدالة الاجتماعية بس، لكنه كلام عن بناء اقتصاد متكامل في أنشطة إنتاجية كبيرة، وفيه طبقة وسطى واسعة ومشروعات صغيرة ومتوسطة بتشغل عمال كثير، دا اللي بيحارب الفقر ويقلل مساحة الاقتصاد غير الرسمي ويزود الإنفاق على التعليم والصحة والخدمات العامة.
– يعني الكلام دا في مصلحة الحكومة زي ما هو في مصلحة الشعب، لما نوزع التورتة بتاعة الاقتصاد سواء الدخول أو الثروات بمعدلات تساوي أفضل ده بينعكس على معدلات النمو، بالتالي التورتة بتكبر مع الوقت.
– كل التجارب الاقتصادية الناجحة في العالم بشكل ما أو بآخر عملت ده، حتى الدول اللي كانت في وقت من الأوقات نامية زي الصين والهند اضطرت أنها توسع حجم الطبقة الوسطى وتدخل ناس كثير في هيكل الإنتاج، لأنه دا اللي بيضمن استدامة النموذج الاقتصادي.
– كالعادة الاقتصاد مرتبط بالسياسة، وجانب مهم من التحول ده مرتبط بوجود ممثلين منتخبين بنزاهة بالبرلمان عشان يمرروا قوانين لصالح عامة الناس مش لمصالحهم، والأهم وجود مجالس محلية بصلاحيات قانونية واقتصادية حقيقية بمناطقها بحيث كل منها شريك عن التنمية في مكانه.
– الكلام عن الاقتصاد مش بس هو الكلام عن معدلات النمو لكنه كلام عن توزيع ثمار النمو ده، ومين هيستفيد منه؟ وازاي نخلي أكبر عدد يستفيد عشان على المدى الطويل يرتفع مستوى معيشة الناس وتشتغل عجلة الاقتصاد صح.
– نتمنى أنه السلطة في مصر ييجي عليها وقت وهي بتفكر في الإصلاح الاقتصادي تاخد في الاعتبار الصورة الكاملة اللي زي دي، عشان الإصلاح يكون شامل ومكاسبه وخسايره تتوزع بالتساوي على المصريين، مش ناس ثروتها تزيد، بينما ملايين تانية بينزلوا تحت خط الفقر.
*******
المصادر