– من يومين حصلت الطفلة المصرية- الألمانية مريم أبو زهرة عازفة الكمان على المركز الثاني في مسابقة كسارة البندق في الموسيقى الكلاسيكية.
– خالص التهنئة من فريق صفحة الموقف المصري للعازفة وأسرتها، وإن شاء الله المرة الجاية تاخد المركز الأول.
– الجائزة هي واحدة من أشهر الجوائز العالمية لصغار العازفين في العالم، وبتقام سنويا من أكثر من 20 سنة في روسيا على مسرح تشايسكوفكسي في موسكو.
– روسيا هي بلد ليها تاريخ كبير في الموسيقى الكلاسيكية، وبالتالي الجائزة ليها قيمة عالمية وبيشارك فيها أطفال من كل أنحاء العالم.
– مريم خدت المركز التاني بعد أداء رائع، اتقال عليه أنه الأفضل لكن الجائزة الأولى راحت لطفلة بريطانية اسمها صوفيا ديميتريادس 13 سنة برضه في عمر مريم وهي تلميذة واحد من أفضل وأشهر أساتذة الكمان في العالم ومؤسس ورئيس لجنة تحكيم المسابقة دي وهو إسحق برون.
– مريم هي بنت الفنان المصري وعازف البيانو أحمد أبو زهرة وجدها هو الفنان المصري الكبير عبد الرحمن أبو زهرة، بالإضافة لوالدتها اللي هي عازفة البيانو المجرية نورا إيمودي.
– للأسف مريم اتعرفت رسميا في المسابقة أنها ألمانية، وده لأنه هي معاها الجنسية الألمانية وبتدرس الكمان مع أستاذة الكمان الشهيرة، دورا شفارتسبيرغ.
– مريم عزفت في المسابقة النهائية مقطوعة من أعمال الموسيقي المجري ينيو هوباي وهي إعادة صياغة لموسيقى أوبرا كارمن الشهيرة لجورج بيزيه.
– ممكن تسمعوا المقطوعة بكمنجة مريم أبو زهرة الجميلة في الكومنت الأول، وتشوفوا قد إيه دي موهبة جميلة.
*****
– الموسيقى الكلاسيكية هي فن نخبوي شوية مش كل الناس بتسمعه، لكن الاهتمام به بيكون دليل مهم في العالم على الاهتمام بالفنون والثقافة بشكل عام.
– للأسف مريم درست بره وتم رعاية والاهتمام بموهبتها في ألمانيا والنمسا مش في مصر ولكن في أطفال كثير في مصر محتاجين النوع ده من الرعاية والاهتمام مش بس في الموسيقى ولكن في مواهب تانية كثير محتاجة الرعاية دي.
– فخورين بمريم وبأي موهبة مصرية بترفع اسم مصر في المحافل الدولية واللي بتدل على أنه مصر ما زالت ولادة وبإمكانها تطلع مواهب موسيقية عالمية.
*****
المصادر