– الفيديو ده صورته قبل قليل منى سيف عبر لايف من صفحة أختها الصغيرة سناء، بتحكي فيه وهيا منهارة عن خطف سناء بواسطة أفراد أمن بملابس مدنية في مكروباص مدني، من قدام مكتب النائب العام.
– منى في الفيديو بتسأل نروح فين ومين يحمينا لو مكانش مكتب النائب العام؟!
– الأسرة كانت مع المحامين في انتظار طويل من الصبح، عشان عايزين يقدموا شكوى عن تعرضهم للضرب والسرقة من تحت إشراف الظباط أمام سجن طرة، وسحلوا سناء اللي جسدها فيه الإصابات الأكتر، وكان مفروض النيابة “تناظر الإصابات” اللي منى نشرت بعض صورها المؤلمة.
– كل ده مش عشان يطالبوا باطلاق سراح أخوهم علاء عبدالفتاح، المسجون لأسباب سياسية بدون محاكمة، ولا حتى عشان يزوروه مع منع الزيارات من مارس الماضي، لكن بس عشان الأسرة بتطالب بتطبيق القانون ان الداخلية تسلمهم جواب مكتوب يطمنهم عليه، خاصة انه كان مضرب عن الطعام لفترة طويلة سابقا!
ولما الدكتورة ليلى رفضت تمشي من قدام السجن، المقدم محمد النشار هددها وبعدين تتابعت الأحداث اللي حكيناها سابقا، لحد ما وصلنا لمشهد غير مسبوق، وهوا اختطاف مواطن من أمام مكتب النائب العام وهوا جاي يعمل اجراء قانوني!!
– منى قالت لو كل ده عشان ظباط أمن الدولة يحسوا انهم أقوى من نساء عزل، خلاص يا سيدي انتو الأقوى!!
*****
-بنكرر اللي قلناه سابقا في الوقت اللي البلد فيه بتواجه مخاطر خارجية وبنسمع طول الوقت خطاب عن أهمية توحد الشعب ونسيان الخلافات، بالتأكيد اللي مفروض ياخد الخطوة الأولى هيا الدولة ومؤسساتها بانها تحقق أبسط أصول الالتزام بالقانون لمواطنيها المظلومين!
– وفي الوقت اللي مصر بتحاول تخاطب العالم عن موقفها في ليبيا والسودان النوع ده من الأخبار هتظل هيا أكبر ما يشوه سمعة مصر العالمية، والمتسبب هوا اللي بيعمل الجرائم دي ويسكت عنها دي مش اللي بينشرها.
– المسؤول مش بس المقدم محمد النشار، ووائل حسن رئيس مباحث سجن طرة شديد الحراسة٢، لكن الأهم هوا كل اللي شايفين القضية دي وساكتين من كافة مسؤولي الدولة لحد الرئيس، وكمان النائب العام اللي تلقى أكتر من بلاغ عن القضية وأحداثها، والنهاردة حصلت فضيحة الاختطاف غير القانوني قدام مكتبه!
مفيش أي محاولة للحفاظ على الثقة في حياد مؤسسات القانون!
– للأسف استخدام أسلوب العصابات ده في الاعتداء علي الناس خارج القانون من صميم عمل الأجهزة الأمنية في مصر، من أيام مبارك.
– كل التضامن أهالي وأمهات كل السجناء السلميين المظلومين، وخاصة مع أسرة علاء عبدالفتاح والدكتورة ليلى سويف، اللي بندعوكم لدعمهم ومتابعة التطورات أولا بأول على صفحاتهم:
