رسالة مؤثرة من منى سيف، شقيقة المدون السجين علاء عبدالفتاح، عن التهم الموجهة لأختها الصغيرة سناء، واللي على أساسها تنعقد النهاردة أول جلسة محاكمة ليها.
– منى بتقول إنهم اطلعوا أخيرا على ملف القضية، ولقوا مقدم البلاغ هوا المقدم محمد النشار، اللي هما أصلا اتهموه ببلاغ رسمي بالمسؤولية عن الاعتداء اللي حصل ضدهم أمام سجن طرة، ومحصلش أي تحقيق في البلاغ ده.
– المفاجئة إن المقدم محمد النشار كذب وقال ان القصة بدايتها إن سناء سيف كانت مصممة على الدخول للزيارة بالمخالفة لقرار تعليق الزيارة بسبب كورونا، وانها اعتدت عليه، والشهود معاه هما الأمناء أحمد السيد غريب وهشام عبدالحي يوسف، وده تحديدا هوا أمين الشرطة اللي زق الدكتورة ليلى سويف على البلطجية لما حاولت تهرب منهم وتحتمي بحاجز الشرطة!
– الكلام ده كذب لإن طول 3 شهور من أبريل إلى يونيو كان المطلب الوحيد هوا عايزين جواب وده مطلب قانوني، وأيضا كذب لأن سناء مكانتش معاهم أصلا ومجاتش إلا آخر يوم فقط.
– منى وجهت خطابها للنائب العام إن اللي حصل لما الأمن الوطني اختار القبض على سناء وهيا رايحة تقدم له بلاغ، مش من بيتها أو من قدام السجن، رسالة إن الأمن فوق كل السلطات والنائب العام نفسه ميقدرش يحميكو.
– منى بتقول: ” عيب تنقوا الصغيرة اللي فينا وتعاقبوها نيابة عن الأسرة كلها. لو عايزين تعاقبوا الأسرة كلها احنا هنا!”
