– النهاردة وبكرة هما هما اليومين المخصصين لجولة الإعادة لمحافظات المرحلة الأولى في انتخابات مجلس النواب.
– وعلى الرغم من استمرارنا في كشف وقائع التلاعب في نتائج الانتخابات في كتير من الدوائر والمحافظات، لكننا بنأكد على إن لولا المشاركة الحقيقية من الناس بالتصويت ودعم المرشحين المحترمين وفضح المزورين وأصحاب الرشاوي، مكانش المرشحين المدعومين من الأجهزة الأمنية هيحتاجوا يتورطوا أصلا في الانتهاكات دي، ولا كانت المحاكم هيبقى قدامها أدلة قوية فتلغي بعض النتايج زي ما غطينا سابقا .. عشان كده بنكرر دعواتنا بالمشاركة والتصويت وكشف أي تلاعب وتزوير بالتصوير أو التوثيق.
– وطبعاً مازلنا معاكو متابعين حركة الطعون واللي وصل كتير منها بخصوص المقاعد اللي اتحسمت من الجولة الأولى لمحكمة النقض، وبالذات في محافظات الجيزة والقاهرة والقليوبية واللي كان فيها دلائل تزوير واضحة جداً، وهننشر أي جديد يحصل في الطعون دي.
*****
– ودي بعض ترشيحاتنا لمرشحين معارضين ومستقلين في جولة الإعادة لمحافظات “المرحلة الأولى”:
1- محافظة الاسكندرية:
دائرة محرم بك وكرموز ومينا البصل:
المهندس هيثم الحريري رقم ( 4 ) + مرشح آخر (الدائرة بمقعدين)
2- محافظة الفيوم:
دائرة سنورس وطامية: أيمن الصفتي، محمد ثابت الجمال، بسام الصواف.
3- محافظة المنيا:
دائرة مغاغة والعدوة وبني مزار: حسين غيتة + ٣ مرشحين آخرين (دايرة بأربع مقاعد)
*****
– في باقي الدوائر مفيش مرشحين محسوبين على أحزاب أو تجمعات المعارضة المدنية بشكل مباشر، لكن في شخصيات مستقلة محترمة كتير نازلة قدام مرشحي مستقبل وطن وأشباههم، وأهل كل دايرة أدرى بمين اللي يستحق دعمهم.
– هتلاقو في أول تعليق بالمصادر، ملف فيه كل مرشحي جولة الإعادة وانتماؤهم الحزبي والسياسي، شوف دايرتك واختار الشخصيات المستقلة وٍال عنهم حواليك، عن تاريخهم المحلي في دايرتك وتاريخ مواقفهم السياسية بالذات بمحطات فارقة زي تيران وصنافير أو زي تعديل الدستور.
– وخلينا فاكرين إن جولة الإعادة “مفيهاش إعادة”، يعني المرشح صاحب أعلى الأصوات هو اللي هيكسب حتى لو بفرق صوت واحد، لو اقتنعت بحد وشايفه يستحق اعمل الحاجة الإيجابية اللي في ايدك مهما كانت النتيجة.
*****
