– من أيام نشرت سي إن إن تقرير صغير عن شركة من الشركات الناشئة المصرية، وهي شركة باي باس BYPA-SS، اللي بتنشط في مجال الرعاية الصحية.
– الشركة بتحاول تقدم خدمة طبية مفتقدة جدا في مصر، وهي أنها تجمع بيانات التاريخ المرضي والمعلومات الطبية للمرضى في مصر في كارت ذكي بيمكن الأطباء ومقدمي الخدمات الصحية من التعرف على المعلومات دي قبل تشخيص المرضى.
– المعلومات الطبية دي بتشمل فصيلة الدم والوصفات الطبية وأنواع الأدوية اللي بتسبب حساسية ونتائج الاختبارات الطبية للمريض ومعلومات تانية مهمة للتشخيص.
– الكارت اللي هيكون بحوزة المريض بيحمل كود يرتبط بتطبيق أو قاعدة بيانات على شبكة الإنترنت، وهيمكن الطبيب المعالج من تعديل المعلومات الخاصة بالحالة الصحية، ولو المريض غير الدكتور بياناته بتفضل على الموقع، كذلك ممكن مراكز التحاليل إنها ترفع النتيجة مباشرة على القاعدة الخاصة بالمريض بإذن منه.
– الشركة تأسست في 2019 بواسطة الدكتور أندرو سعد وهو بيدرس في كلية الطب، والفكرة دي موجودة في أكثر من مكان في العالم، وبالتالي الاستثمار في النوع دا من الشركات هيخلينا نتقدم في ملف إدخال الرقمنة والتكنولوجيا في مجالات مختلفة وحساسة ومنها الرعاية الصحية.
– الشركة بدأت في شبين الكوم في محافظة المنوفية، وبعدها بدأت تتوسع لخمس مدن في مصر، وبتقدم أبلكيشن اسمه هيلس تاج HealthTag من خلاله ممكن تحصل على خصومات لمراكز أشعة وتحاليل.
****
– مصر بتعاني على مستويات كتيرة فيما يتعلق بالرعاية الصحية، أهم المشكلات دي هي ضعف الإنفاق بالطبع، وخاصة الإنفاق الحكومي بره القاهرة، لكن برضه المشكلات التقنية اللي زي عدم وجود بيانات وتاريخ طبي للمرضى بالنسبة للدكاترة هي مشكلة برضه.
– في مصر كثير من الناس بتعتمد على العيادات الخاصة عشان التشخيص الطبي، وبالتالي وجود المعلومات دي بشكل إلكتروني مهم جدا، وبيساهم في الوصول للتشخيص السليم وتقليل الأخطاء الطبية.
– الدكتور أندرو سعد نفسه بيحكي موقف ولد فكرة مشروع الشركة، لما جاتلهم حالة في مستشفى القصر العيني وظهر عليها التعب في قسم الطوارئ، ولما سألها الأطباء إذا كانت بتتعاطى أي أدوية تانية فمكنتش فاكرة تماما، ولما طلبوا منها اسم الطبيب اللي بتتابع معه مفتكرتش، وهنا الفريق الطبي وقع في حيرة لأنهم كانوا خايفين يدوها حقنة يكون لها أثر جانبي سيء، ومن بعدها فكر الدكتور أندروا في مشروع الكارت الذكي.
– الشركة حصلت تمويل في جولة أولى بقيمة مليون دولار، وطبعا ده مبلغ قليل مقابل اللي الشركة بتحاول تعمله في السوق المصري.
– الحاسم في نجاح الشركة في الفترة اللي جاية هي قدرتها ومدى النمو اللي هتحققه في جمع البيانات الطبية دي لكثير من المصريين، وتوفير الخدمة دي بسعر جيد لمقدمي الخدمات الصحية من العيادات الخاصة والمستشفيات الخاصة والحكومية.
– خلال السنوات اللي فاتت دخلت التكنولوجيا والحاجات المرتبطة بيها زي جمع ومعالجة البيانات في كل القطاعات تقريبا.
– الشركات الناشئة في القطاع ده بتحصل على تمويلات جيدة، وبتقدر تجذب رؤوس الأموال الخارجية وخاصة من منطقة الخليج.
– السنة اللي فاتت في مصر حصلت على تمويلات 77 مليون دولار للشركات الناشئة في مجال الرعاية الصحية، وبالتالي ده قطاع ممكن يكون جاذب للاستثمار الأجنبي، وخاصة أنه مصر سوق كبير جدا في المنطقة من حيث عدد السكان.
– وكمان لازم نقول إن مصر بتعد واحدة من الدول الواعدة في المجال وبتساهم بشكل كبير في القيمة السوقية للتكنولوجيا الصحية في منطقة الشرق الأوسط وشمال إفريقيا واللي متوقع إنها تصل إلى 2 مليار دولار بحلول عام 2024.
– كل الدعم والتحية لأندرو سعد وفريق باي باس، وبالطبع كل الدعم للشركات المشابهة في القطاعات اللي لازم يحصل فيها تطوير في مصر زي التعليم والصحة وغيرها.
*****
المصادر