– من أيام تم اختيار الدكتور عمرو أمين عدلي نائب وزير التعليم العالي والبحث العلمي السابق، وأستاذ قسم القوى الكهربية بهندسة القاهرة، رئيسًا لتحرير المجلة العلمية IEEE Transactions on Magnetics.
– المجلة دي مُختصة بالتطبيقات المغناطيسية التابعة للمعهد الأمريكي لمهندسي الكهرباء والإلكترونيات، وهي مجلة مرموقة جدًا في التخصص الدقيق والمتطور ده، وللسبب ده يعتبر اختيار الدكتور عمرو شيء رائع جدًا وكل المجتمع الأكاديمي المصري لازم يفخر ويعتز بيه جدًا.
– وزير التعليم العالي خالد عبد الغفار نشر تهنئة خاصة للدكتور عمرو بسبب الاختيار ده، واللي بيقول إنه مصر فيها كوادر تقدر تعمل طفرة حقيقية وكبيرة في مجال البحث العلمي، وإنه عندنا كفاءات كبيرة ومُقدرة من الخارج في تخصصات كتير، لكن مفيش رعاية كافية ولا موارد كافية ليهم هنا تساعدهم إنهم يعملوا طفرات مؤسسية في التعليم والبحث العلمي.
– الدكتور عمرو عدلي للي ميعرفوش، حصل على البكالوريوس والماجستير في هندسة القوى الكهربية من جامعة القاهرة في أعوام 1984 و1987، وحصل على دكتوراة الفلسفة في الهندسة الكهربية من جامعة ميريلاند الأمريكية عام 1992.
– كمان الدكتور عمرو كان نائب رئيس جامعة القاهرة للدراسات العليا والبحوث في الفترة من 2016 لحد 2018، وحصل على وسام العلوم والفنون من الطبقة الأولى، وجوائز الدولة التقديرية والتفوق والتشجيعية، وجائزة مؤسسة شومان، بالإضافة إلى جائزة الخريج المُتميز من قسم الهندسة الكهربائية جامعة ميرلاند الأمريكية، عام 2016؛ بسبب سجله المُتميز في النشر الدولي والجوائز العلمية وإدارة منظومات وطنية لتمويل البحوث، وربط البحث العلمي بالمُتطلبات الصناعية والتكنولوجية.
– فخورين جدًا إنه عندنا في مصر باحثين أكاديميين وأساتذة جامعيين في المستوى العظيم والفريد ده عالميًا، ونتمنى إنه البلد تستفيد أكتر بالنماذج اللي زي الدكتور عمرو واللي ماليين جامعات كتير متقدمة في العالم، وإنه الدولة ضروري تبني بيهم مؤسسات بحثية في العلوم الحديثة تقدر تنقل التعليم والاقتصاد وسوق العمل لسنين كتير لقدام لو اتبنت مؤسسات حقيقية.
– هنفضل نسلط الضوء على كل النماذج المشرفة دي، ونعرف الناس بإنجازاتها اللي ساعات بتتنسي في الزحمة.
– كل التهنئة من صفحة الموقف المصري للدكتور عمرو أمين عدلي، وتمنياتنا ليه بخالص التوفيق.