الفيديو اللي قدامنا ده نشره الصحفي محمد منير وعليه تعليقه الصوتي على اللي حصل من اقتحام بيته امبارح أثناء عدم وجوده من قوات مسلحة، كإنه إرهابي بينما هوا راجل كبير سنة ٦٥ سنة ومريض بأمراض مزمنة!
– النهاردة فجرا تم اعتقاله من بيته في الشيخ زايد، رغم انه بعد نشر الفيديوتوجه بنداء للنائب العام في التحقيق في اقتحام الأمن لشقته خاصة أنه تم العبث بمحتويات الشقة والاستيلاء على فلوس تخصه حسب كلامه.
– الصحفي محمد منير صور فيديو تاني قال بعدها “أنا مستمر في موقفي ولن يبتزني أحد بالإرهاب والتخويف، أنا عندي 65 سنة ودي معناها إن الواحد قرب يقابل ربنا ومفيش حد قرب يقابل ربنا، وهيخاف من عبيد ربنا “
– الأستاذ محمد هوا صحفي نقابي معروف وعمل في صحف كتيرة مصرية وعربية، سابقا اشتغل في اليوم السابع، وكمان في الأهالي اللي بيصدرها حزب التجمع اليساري، وحاليا كان بيكتب أيضا لموقع القاهرة ٢٤، وأيضا لموقع الجزيرة مباشر.
– منير حكى عن انه شخص من جهة امنية أتكلم معاه بحضور خالد صلاح رئيس تحرير اليوم السابع عن كتابته بموقع الجزيرة مباشر وانه بيحصل على مستحقات عنها، فقال انا صحفي محترف واشتغلت مع اليوم السابع بأجر وده مغيرش رأيي، واشتغلت بدون اجر مع جهات تانية وبرضه مغيرتش رأيي، ومع كده اسمحولي اظهر في قناة مصرية واكتب في مصر وانا مش هكتب بره فقاله لا خلاص خليك في الجزيرة مباشر!
*****
ليه في حملة أمنية علي الصحفيين دلوقتي؟
– الأستاذ محمد هو الصحفي الرابع اللي يتم القبض عليه في الفترة الأخيرة، بعد سامح حنين اللي اتقبض عليه وأجبر علي تصوير اعتراف فيديو في مخالفة صريحة للقواعد القانونية، وهيثم محجوب المحبوس علي ذمة نفس القضية، والصحفي عوني نافع اللي أصلا مواقفه مؤيدة تماما للنظام وهوا صحفي رياضي لكن لإنه أتكلم عن تأخر اجلاء العالقين في السعودية وبعدها عن وضع مكان العزل اتقبض عليه من مكانه بالمدينة الجامعية!
– نتمني من السلطة الحالية أنها تتعقل وتعرف أنه كتابة المقالات ونشر الأخبار دي شغلانة الصحفيين، مادام الشخص مرتكبش جريمة قانونية زي التحريض على العنف والإرهاب أو خطاب الكراهية وغيرها، ومش شرط الصحافة تبقي كلها صحافة بيانات حكومية، ومش شرط كل الصحفيين يبقوا شغالين في مؤسسات مملوكة كليا أو جزئيا لجهاز المخابرات العامة، ولو الحكومة فعلا عندها مشاكل في اللي بيكتبوا محمد منير أو غيره فهي عندها عشرات المنصات الإعلامية الأخرى اللي بتوصل لملايين المواطنين وممكن ببساطة تنشر تكذيب رسمي.
– القبض علي الصحفيين مش بس خطورة عليهم دا خطورة علي المجتمع ككل لأنه بيهدم اول أسس الرقابة والمحاسبة الشعبية ومعالجة مشاكل البلد.
– نتمني السلامة للصحفي محمد منير، وكل الصجفيين المحبوسين حاليا في السجون.
*****
المصادر