-من يومين حصل حادث مؤسف لمجموعة من العمال اللي كانوا شغالين على تفكيك برج كهرباء قديم في منطقة الوراق، وأثناء الشغل وقع وأدى لوفاة 4 عمال وإصابة 2 آخرين بإصابات حرجة.
– العمال كانوا شغالين لصالح أحد المقاولين، لتفكيك برج ارتفاعه 110 متر، لكن كان فيه غياب واضح لإجراءات الأمان أثناء العمل.
– حسب روايات الشهود، العمال طلعوا يفكوا الأجزاء العلوية من البرج، وقفلت عليهم بطريقة معينة وماعرفوش ينزلوا، وفي نفس الوقت كان الجزء السفلي بيتم تفكيكه، وفي الوقت وقع البرج على العمال اللي تحت.
– وفقا للتحريات، فالمشرفين على العمال ماكنوش موجودين وقت الحادث، والعمال وقعوا من على ارتفاع 25 متر، الجزء اللي كان باقي من البرج بعد تفكيك 85 متر منه.
– للأسف معندناش في مصر احصاء كامل بعدد العمال اللي بيصبوا أثناء تأديتهم لشغلهم، أو حالات الوفاة اللي بتحصل لنفس السبب سنويا، لكن من خلال المشاهدة والحكاوي اللي بنسمع عنها بشكل يومي، العدد كبير جدا.
– امبارح النيابة أمرت بحبس المقاول و 3 مشرفين، بعد اتهامهم بالقتل الخطأ والإصابة الخطأ، ومخالفة شروط السلامة والصحة المهنية، وعدم تأمين جهة العمل من مخاطر المهنة.
– خالص العزاء لأسر الضحايا، ونتمنى إجراءات الأمان الصناعي تطبق بشكل فعال مش تستيف ورق، وإن ده يحصل في كل المجالات مهما كانت درجة خطورتها، سواء لعمال الإنشاءات أو عامل اللحام أو ضابط المفرقعات، أو أي مجال آخ يستدعى أخذ احتياطات أمان.