نور الشربيني وعلي فرج .. إنجازات مصرية في الاسكواش

– صفحة الموقف المصري بتهني الأبطال نور الشربيني Nour el Sherbini، وعلي فرج Ali Farag – علي فرج اللي فازوا ببطولة العالم للاسكواش للسيدات وللرجال، وكمان بنهني اتحاد لعبة الاسكواش في مصر لأن أطراف النهائي للسيدات والرجال كانو 4 لاعيبة مصريين، وده تقدم كبير جداً على مستوى اللعبة يستحقوا التهنئة والفخر.

– كمان البطلة نور الشربيني لوحدها عملت رقم قياسي كبير، إنها بتفوز بالبطولة لتالت مرة، عندها لقبين قبل كده في 2015 و 2016، وبكدا تبقى خامس لاعبة حول العالم تفوز باللقب 3 مرات.

– لعبة الاسكواش تحديداً مصر بتقدم فيها مواهب وأبطال بشكل مستمر، وبتتفوق على العالم كله بما فيها بريطانيا اللي اخترعت اللعبة، ورغم إن اللعبة محتاجة تطوير أكتر في النوادي والأهم هو توسيع قاعدة المشاركين، لكن بالتأكيد حالها أفضل من رياضات تانية كتير مكانش ليها نفس حظ اللعبة دي من الاهتمام الرسمي وقت مبارك اللي خلا مصر فيا خبرات كبيرة من اللاعبين والمدربين من وقتها وأكيد كلنا فاكرين أحمد برادة وعمرو شبانة .. وطبعا المشاركة الرياضية في مصر بشكل عام محتاجة تطوير على مستوى مراكز الشباب والأندية والمدارس.

– بشكل خاص بنوجه تحية خاصة لأهالي نور الشربيني ومنافستها في النهائي نور الطيب، على دعم الشابتين في موهبتهم وحبهم لرياضة الاسكواش، مصر بشكل عام فيها بنات وسيدات بيعانوا أكتر في اكمال طموحاتهم بالعمل أو الرياضة أو أي هواية أو موهبة، بينما بالتأكيد النماذج دي موجودة كتير وتستحق كل دعم وتشجيع.