– فريق صفحة الموقف المصري بيقدم التهنئة لناشئات منتخب السلة بتأهلهم للمباراة النهائية في بطولة أفريقيا، ومعاها التأهل لنهائيات كاس العالم القادم 2020 بعد غياب 8 سنوات.
– منتخب كرة السلة النسائي “تحت 16 سنة” اتاهل للمباراة النهائية في البطولة اللي بتتلعب في “رواندا” بعد الفوز على منتخب انجولا بنتيجة 71 – 50.
– أبطال وبطلات كتير في ألعاب فردية وجماعية يستحقو الدعم والتشجيع والاهتمام بيهم، مش لازم كل الاهتمام حوالين منتخب كرة القدم الأول فقط. طبعا مع فهمنا لشعبية كرة القدم مصريا وعالميا، لكن باقي الألعاب والرياضات فيها أبطال مصريين وشباب مبياخدوش أي نوع من الدعم المادي أو المعنوي اللي بيستحقوه، وحرفياً بيحفرو في الصخر.
– أسماء بطلات منتخب السلة: ( هالة على، فريدة البنداري، رضوى علاء، فريدة خالد، فريدة مسعد، لجين سامى، وملك عبد القادر، جنى بركة، ملك سامى، فريدة تامر، آية الفقى، ومنة الله شريف)، وبالتأكيد كل التحية والشكر لمدرب الفريق “المصري” كابتن علي هاشم.
– فريدة تامر اتعرضت لإصابة أثناء التمارين وكان مفروض تعمل عملية في وشها ومتحضرش التصفيات، لكنها فضلت تأجل العملية تكتفي بقناع واقي لعبت بيه المباريات كلها وكان منظرها لافت جدا، ودليل على الإصرار والاجتهاد.
– مستمرين في صفحتنا في دعم كل نموذج مصري ناجح في أي مجال، ونتمنى انه النجاحات تزيد وتكتر ويبقى في بلدنا نظام بيرعى الموهوبين والمبدعين فعلاً زي أي بلد محترمة وحريصة على تقدمها ونجاح أولادها.