مقارنة أسعار المترو العالمية: تذكرتك بكام دقيقة شغل يا مواطن؟

امبارح نشرنا شرح تفصيلي بيرد على موضوع خساير المترو، ووضحنا إزاي السعر الحالي أكبر بكتير من كلفة التشغيل:

النهاردة وصلتنا رسالة من أحد أعضاء الصفحة اللي بنشكره جداً، بيتكلم عن زاوية مختلفة في مقارنة الأسعار العالمية:
*****

– تذكرة المترو هتبقى من 3 لـ7 جنيه، يعني المتوسط 5 جنيه تقريبًا.. لو قارننا ب 3 دول في أوروبا وآسيا وقربنا في الشرق الأوسط، هنلقى تذكرة المترو في بريطانيا تتراوح من 2.5 جنيه استرليني لـ3.1 يعني أكتر من 60 جنيه مصري، وفي اليابان من 270 ين إلى 300 ين يعني 27 – 50 جنيه مصري، وفي تركيا 2.5 ليرة يعني حوالي 10 جنيه مصري.
يعني ببساطة إحنا بندفع أقل بكتير من غيرنا وبالتالي مفيش وجه للاعتراض. صح؟ لأ مش صح 
– ليه بقى؟ لأن قيمة تذكرة المترو مش رقم طاير في الهوا حضرتك، الرقم ده ليه شقين:
أولًا: هو جاي منين؟ مين اللي بيدفعه؟ وإمكانياته إيه إنه يدفع رقم زي ده؟
وثانيًا: المبلغ ده بيروح فين؟ وبيتصرف على مستوى خدمة شكله عامل ازاي؟
طب نكمّل المقارنة مع نفس الدول بعد ما أخدنا في الاعتبار الشقين.
أولًا:
من حيث الجهة اللي هتدفع تذكرة المترو (اللي هي المواطن):

– الحد الأدنى للأجور في بريطانيا 7.3 استرليني في الساعة للعامل من سن 21 سنة، ترتفع لـ 7.8 لسن 25 سنة (أيوة في الساعة الواحدة ما يوازي 186 جنيه مصري، يعني شقيقك الإنجليزي اللي بيشتغل موظف أربعين ساعة في الأسبوع بيقبض 1284 استرليني في الشهر، اللي هو يجيله كده أكتر من 30 ألف جنيه مصري – أيوة ده الحد الأدنى وأغلب البشر بتاخد قده مرتين وتلاتة بالمستريح)
إذن أفقر مواطن إنجليزي في لندن بـ23 لـ28 دقيقة عمل فقط يقدر يشتري تذكرة المترو اللي هيروّح بيها.
– الحد الأدنى في اليابان 848 ين في الساعة، يعني 136 جنيه مصري في ساعة العمل الواحدة، يعني شهريا أفقر ياباني بيقبض حوالي 34 ألف ين، ما يوازي 5500 مصري.
وبالتالي أقل ياباني يقدر بيجيب تذكرة المترو بحوالي 12 إلى 22 دقيقة عمل.
– الحد الأدنى للأجور في تركيا 1600 ليرة في الشهر، يعني حوالي 6400 جنيه عقبال عند حضرتك، ومعظم الموظفين مرة تانية بيقبضوا أكتر من كده، وبالتالي أقل مرتب في الأسبوع حوالي 400 ليرة وفي الساعة 10 ليرة.
إذن أفقر مواطن تركي برُبع ساعة عمل فقط يقدر يحصّل ثمن تذكرة مترو.
نيجي لأم الدنيا بقى:
– الحد الأدني لمصرنا الحبيبة 1200 جنيه مصري، ومع ان ده للعاملين بالحكومة فقط مش زي باقي الدول للخاص والعام واللي يشغل حد بأقل منه مخالفة قانونية، ومع أنه حتى لا يطبق على موظفي الحكومة غير المثبتين، لكن ماشي نمشيها كده، يعني 300 جنيه في الأسبوع، يعني 7.5 جنيه في الساعة.
– إذن المواطن المصري هيشتغل من 24 دقيقة إلى 56 دقيقة عشان يحصل تمن تذاكر المترو الجديدة.
– وبالتالي بوضوح سعر قيمة تذكرة المواصلات مقارنة بظروف المواطن أغلى من بريطانيا واليابان وتركيا إذا حسبناها بعدد ساعات العمل المطلوبة لتحصيل قيمة التذكرة.
*****

نيجي بقى للشق التاني: الفلوس دي هتروح فين؟ وبتتصرف على مواصلات شكلها عامل ازاي؟ وموظفين شغالين سواقين وعمال بيقبضوا كام؟
– لندن حضرتك فيها 11 خط مترو، وكل محطة فيها لوحة إلكترونية بتقول مواعيد القطارات بالدقيقة، ومعظم العربيات الكراسي فيها متنجدة قماش، وكتير من المحطات مجهزة لذوي الاحتياجات الخاصة وسلالم متحركة وأسانسيرات، ولو جينا للأتوبيس هيبقى فيه احراج أكتر لأن سعر التذكرة 1.5 سترليني فقط (13 دقيقة عمل طبقًا للحد الأدنى البريطاني)، والأتوبيس من جوه برضه كراسي متنجدة وشاشة إلكترونية، وأسطول الأتوبيسات ضخم جدًا بيغطي كل شارع وبيستخدمه أغلب المواطنين مش الغلابة بس.
– طوكيو اليابانية فيها 13 خط مترو بتغطي 285 محطة، وهي تنقل أكبر عدد ركاب مترو في العالم ب 8 مليون راكب يومياً ورغم أن ده بيسبب ازدحام كبير في أوقات الذروة، لكن مش محتاجين نتكلم عن المواعيد اللي تظبط ساعتك عليها، والنضافة اللي بتبرق، دي اليابان يعني البلد اللي فيها أسرع قطار في العالم.
– تركيا اللي كان مستواها الاقتصادي زي حالاتنا منذ فترة ليست بعيدة، إسطنبول فيها حوالي 8 خطوط مترو وترام ومتروبوص مجتمعين. وزي النظام الإنجليزي من حيث العربيّات المكيفة بالكامل ومعظمها الكراسي فيه متنجدة، والمحطات اللي مجهزة وخاصة الجديدة منها. (ومش هنتكلم عن “الأكتارما” وهي ببساطة إنه لك الحق في تذكرة مخفضة لو نقلت من خط لخط في المترو أو من مترو لأتوبيس، ويمكن لك تكرار ذلك حتى تصل للمواصلة رقم خمسة.)
وأحب أضيف كمان إنه خطوط المترو الجديدة في إسطنبول كل عربية فيها 6 شاشات تلفزيون عشان تتسلى عزيزي المواطن بدل ما تبحلق في الفراغ عشان الفراغ وحش.
– أم الدنيا لسه بتحفر الخط التالت ولسه جزء كبير من العربات غير مكيّف، وأغلب المحطات فيها ساعة قديمة تِك تِك ولا شاشة إلكترونية ولا بطيخ، والكراسي مش متنجدة عادي.
*****

– ندخل على المصاريف اللي أكيد مش هيا هيا، سواء بالنسبة لتكاليف التنظيف والصيانة، أو مرتبات العاملين.
– السواق الإنجليزي أول مرتب بعد تدريب 6 شهور بيكون حوالي 3100 استرليني يعني حوالي 80 ألف مصري، ااه والله زمبؤلك كده وده أقل مرتبات للي مستلم شغله جديد.
– أخوه السواق الغلبان في إسطنبول بيقول بسم الله الرحمن الرحيم بـ2500 ليرة يعني حوالي 10250 جنيه مصري.
أخونا السواق المصري بقى بيقبض في المتوسط 6000 جنيه طبقًا لوزير المواصلات، والمتوسط ده يعني فيه اللي أقل منه وفيه اللي أكتر منه.
– طبعًا مش عايزين نسأل أسئلة من قبيل عربية المترو أو الأتوبيس في لندن أو طوكيو أو إسطنبول بتخُش الصيانة والتنظيف كام مرة في الشهر مقارنة بزميلتها في مصر، ولا تكاليف وطبيعة هذه الصيانة والتنظيف وإلخ إلخ عشان اللي قلناه فوق كافي جدًا.
*****

– لو هنفترض إنه من حق الدولة تفرض تذاكر مترو بسعر يصل لـ20 أو 25 دقيقة عمل من الحد الأدنى مادام بنقارن بالأسعار العالمية، فده معناه إنه في ظل الحد الأدنى الحالي لا يجوز بأي حال سعر التذكرة يزيد عن 2.5 لـ3 جنيه مصري بالكتير.
– ولو الدولة في مصر عايزة تزيد الأسعار لـ5 أو 7، يبقى لازم نكمل مقارنة كلفة لساعة العمل عالمياً، فتذكرة الخمسة جنيه ده تطلب إنه الحد الأدنى يكون من 1920 لـ2400 جنيه، و7 جنيه تتطلب إنه الحد الأدنى يكون تقريبًا من 2600 حتى 3300 جنيه.
– – الخلاصة إن أسعار التذاكر الجديدة لا تناسب جيب المواطن، ولا تتناسب مع مستوى الخدمة والصيانة والرفاهة اللي بتتسم بيه خطوط المترو في مصر، وكمان لا تتناسب مع الأسعار العالمية اللي مصدعين دماغنا بيها كإننا في زمن مفيش مصريين بيسافرو بره أو يعرفو يدورو على جوجل ويقدرو يردو على النصباية دي، دول بيكلمو نفسهم مش بيكلمونا!
*****