-الدورة ال 51 لمعرض القاهرة للكتاب بدأت قبل أيام بالمقر الجديد في التجمع بجوار مسجد المشير طنطاوي.
– دي السنة التانية للمعرض في المكان ده، وكان في اعتراضات سابقة على المكان بسبب بعده، لكن الهيئة العامة للكتاب وفرت اتوبيسات بتذكرة موحدة سعرها 6 جنيه، والخطوط بتوصل لأرض المعارض القديمة ولميدان عبدالمنعم رياض والجيزة والنزهة الجديدة والعباسية.
– وكمان تقدرو توصلو للمعرض عن طريق أبلكيشن Buseet عشان تروحو للمعرض برحلات مخفضة بنسبة 50% من حدائق الأهرام، الزمالك، مدينة نصر، رمسيس، السلام الإقليمي، ٦ أكتوبر، وعبود.
– المكان الجديد فعلا حسب آراء ناس كتير أفضل من ناحية التنظيم والنضافة، وفيه استراحات، والتنقل جواه أسهل، لكن بعض دور النشر كانت مساحتها اكبر بالقديم، ده غير محدودية مساحة مكتبات سوق الأزبكية.
– لكن للأسف الشديد في أول أيام المعرض اتوفى الكاتب الشاب محمد حسن خليفة بسبب الزحام وتأخر إسعافه ومعاناته من مشاكل صحية سابقة، وده لفت النظر لأهمية وجود مستشفى مجهز، ومازالت الواقعة تتطلب مراجعة جادة نتمنى نشوفها! كل العزاء لأسرة وأصدقاء محمد.
-عدد زوار المعرض السنة اللي فات كانت تقدر ب 3 مليون زائر، بينما عدد اللي كانوا بيروحوا المقر القديم كان أكبر، ووصل سنة 2018 ل 4 مليون ونص.
– الأهم من عدد الزوار هو عدد اللي بيشتروا كتب فعلاً والشرائح العمرية بتاعتهم، وواضح ان معدلات الأعمار للشباب عالية جداً وده منعكس في نوعية الكتب والكتاب اللي بيحققوا مبيعات.
– نتمنى إنه الإقبال يزيد ومعدلات القراية تكون أكتر رغم الظروف الاقتصادية الصعبة .. القراية من أهم أسباب الوعي والتغيير الايجابي في المجتمعات، وظاهرة زيادة الإقبال من الشباب على الكتابة والقراية هو أمر ايجابي جدا.
– صفحة الموقف المصري بتدعوكم لزيارة المعرض واستغلال الأيام الباقية فيه لحد ٤ فبراير، واحكولنا عن رأيكم في المعرض الجديد والقديم، خلاص الامتحانات خلصت والخصومات لسه شغالة :))
******
بعض الترشيحات من فريق صفحتنا لكتب مهمة في السياسة والاقتصاد، وياريت اللي يحب يرشح كتب تانية مش شايفها هنا يقول:
كتب عن ثورة يناير:
– ثورة يناير: رؤية نقدية – عمرو عبد الرحمن (محرر الكتاب)، عمرو عادلي، محمود هدهود، علي الرجال – دار المرايا
– الثورة التائهة .. صراع الخوذة واللحية في الميدان، عبدالعظيم حماد – دار المحروسة.
كتب سياسية واقتصادية:
– الضرائب .. مصلحة من؟ محمد جاد (محرر الكتاب)، سارة سيف، عمرو الشافعي، بيسان كساب، أميرة جاد، نهى مجدي – دار المرايا.
– حرز مكمكم – أحمد ناجي – دار صفصافة.
– ملاك مصر: قصة صعود الرأسمالية المصرية – محمد جاد (محرر الكتاب)، وبيسان كساب، وعمر غنام، وكريم مجاهد، وآلاء مصطفى، وعبد الحميد مكاوي، أسامة دياب – دار المرايا.
– أ ب العدالة الاجتماعية – د.ريم عبدالحليم – دار المرايا
– الاقتصاد المصري في القرن الحادي والعشرين – وائل جمال (محرر الكتاب)، سامح نجيب، عمرو عادلي، محمد جاد، محمد سلطان، محمد مسلم، أشرف حسين، هبة خليل، سلمى حسين، دينا مكرم عبيد – دار المرايا.
كتب تاريخ حديث:
– في تشريح الهزيمة – خالد منصور(محرر الكتاب)، ومصطفى عبد الظاهر وبلال علاء، وخالد فهمي، وسامح نجيب، ومحمد العجاتي – دار المرايا.
– مذكرات مصطفى النحاس، د عماد أبو غازي. دار الشروق.
– كل رجال الباشا – د.خالد فهمي.
– إمبراطوريات متخيلة: تاريخ الثورة في صعيد مصر، زينب أبو المجد، المركز القومي للترجمة.
– المراسلات السرية بين سعد زغلول وعبدالرحمن فهمي – د.محمد أنيس – دار الشروق.
كتب مترجمة:
– لماذا تفشل الأمم: جذور السلطة والازدهار والفقر . جيمس روبنسون.
– جذور الغضب، لآدم هنية- ترجمة عمرو خيري – دار صفصفافة.
– الاقتصاد كما اشرحه لبنتي – يانيس فاروفاكيس – دار الساقي.
– تاريخ شعبي للعالم – كريس هارمن. المركز القومي للترجمة.
– التاريخ السري للاحتلال الإنجليزي لمصر، ويلفريد سكاون بلنت – المركز القومي للترجمة.
– الثلاثة الكبار في علم الاقتصاد، مارك سكويسين – المركز القومي للترجمة.
– عن الدولة (دروس الكوليدج دو فرانس) – بيير بورديو – المركز العربي للأبحاث ودراسة السياسات.
– الروح في العمل – فرانكو بيراردي – أقلام عربية.
