مشاكل في نظام امتحانات الثانوية بالتابلت .. شاركونا تجاربكم

– يوم الأحد كان أول يوم بامتحانات أولى ثانوي، واللي المفروض كان الطلاب هيمتحنوا على التابلت بالنظام الإلكتروني، لكن السيستيم وقع في كتير من المدارس والامتحان اتأجل لمدة ساعة او أكتر، بعدها الطلاب امتحنوا امتحانات ورقية. وفي مدارس طلابها مكانوش ضمن طلاب التابلت أصلاً وامتحانهم كان ورقي.
– السيستيم وقع رغم إن الوزارة عملت امتحان تجريبي من حوالي شهر، ظهرت فيه نفس المشكلة، واتقال وقتها إنه حصل مشكلة في البنية التحتية للانترنت، أو أصل دخل 2 مليون زائر بشكل مفاجئ من برة مصر عشان يبوظوا التجربة، او ان الوزارة مدفعتش فاتورة الانترنت!.

– البوست ده “تفاعلي” واحنا اللي عاوزين نسمع منكم، احكو لنا عن تجاربكم وتجارب ولادكم مع الامتحان عبر التابلت، هل الامتحان عدى بنجاح إلكترونياً عندكم؟ ولا برضه السيستيم بيقع؟ وإيه التصرف اللي كان بيتم في المدرسة؟؟
*****

– قبل امتحان امبارح، رئيس قطاع التعليم بالوزارة قال انه تم اخذ الاحتياطات اللازمة، من ضمنها الاعتماد على الامتحان الورقي في حالة عدم امكانية التابلت، ولكنها حددت الإجراء ده لحالة الضرورة القصوى. وبعد امتحان الأحد وزير التعليم قال إن كان فيه مشكلة بسيطة واتحلت، والامتحانات هتكمل، والمدارس اللي مش جاهزة الامتحان هيتعمل فيها ورقي.
– في البوست ده احنا مش هنقيم تجربة التابلت بشكل كامل ولا هنقدر نحدد الخلل من التابلت نفسه اللي استوردته القوات المسلحة، ولا من شبكة الانترنت المسؤولة عنها وزارة الاتصالات، ولا مشكلة في السيستيم الالكتروني نفسه والشركة المسؤلة عنه.
– احنا بنشوف المشكلة هي مشكلة إدارة للمنظومة التعليم اللي بيتغير بناء على قرارات الوزير وحده اللي بيرفض أي مناقشات فيها مع البرلمان أو الأهالي أو الاعلام أو الخبراء لأنه خبير دولي وميصحش حد يناقشه أو ينتقده أو يسأل عن واقعية تنفيذ أفكاره فورا بالمقارنة بالإمكانات والبنية التحتية المتاحة.
ومفيش طريق للفشل أفضل من الطريقة دي في إدارة أي ملف، مهما كانت الكفاءة والطموح والخطة لازم تعدي بحالة من النقاش والمشاركة المجتمعية بما فيهم الأهالي والتلاميذ اللي مستقبلهم بيتحدد بناء على التجارب والخطط دي، خصوصاً لما نلاقي طلاب في أولى ثانوي بيعملو مظاهرات ضد نظام التابلت لأنهم شافوه مش عادل وبيعطلهم فكانت الردود عليهم إنه احنا هنحل المشكلة ويتقبض على عدد منهم كرسالة تخويف.
*****

احكوا تجاربكم مع الامتحان والتابليت .. هل هيا فعلا تجربة ايجابية؟ هل نجحت في مدرستك؟ هل حد بلغكم في المدارس بسبب المشكلة؟ هل تم التعامل باحترافية لما ظهرت المشكلة؟
كلامنا هوا وتبادلنا التجارب هو وسيلة مهمة للرقابة والمشاركة المجتمعية لصالحنا كلنا.
*****