صفحة الموقف المصري بتقدم كل التهاني لمحمد صلاح Mohamed Salah بفوزه بجايزة أفضل لاعب في أفريقيا للمرة التانية على التوالي، واتفاجئنا بعد كتابة البوست إنه اتكرم النهارده في دبي وخد جايزة جديدة للإبداع الرياضي من دولة الإمارات.
امبارح تفوق صلاح على السنغالي ساديو ماني، والجابوني أوباميانج، وصلاح هوا أول لاعب مصري ياخد الجايزة دي بشكلها الجديد، وطبعاً إنجاز كبير إنه ياخدها مرتين، وبإذن الله تتكرر أكتر من مرة.
بعيد عن الكورة والفنيات إنما التواضع اللي اتكلم بيه صلاح سواء في كلمته أو المؤتمر الصحفي شيء يدعو للفخر، زي إنه يقول إنه مش أفضل سفير للكرة المصرية وإنه الأفضل على مدار العصور هو محمد أبو تريكة، في إشارة تضامنية معاه.
كلام مكرر لكن هيا حقيقة، أهم ميزة في صلاح هو الإصرار الدائم على النجاح كل يوم بطموحات لا تتوقف وده قيمة عظيمة نتمنى إنها تبقى عندنا في كل المجالات ويبقى عندنا ناجحين أكتر وأكتر، كمان النظام والبيئة اللي عايش فيها محمد صلاح في انجلترا تخليه ينجح ويبدع بدون مشاكل أو معوقات زي اللي بيشوفها هنا بمجرد وجوده، المنظومة لما تتغير للأفضل هيطلع عندنا أشخاص ناجحين أكتر في كل المجالات، وللسبب ده فالإصلاح في كل شيء مطلوب وضروري مش رفاهية أو خيال علمي.
مبروك تاني يا أبو مكة، وعقبال أفضل لاعب في العالم 
