– قبل قليل أعلنت وزارة الصحة ارتفاع عدد ضحايا حادث قطار طوخ إلى 11 وفاة و98 مصاب.
– تتقدم أسرة صفحة الموقف المصري بخالص العزاء والمواساة لأسر ضحايا، وتمنياتنا بالشفاء والسلامة لكل المصابين.
– المعلومات المتاحة حتى الآن هيا إن الساعة 2 الظهر تقريبا خرج قطار 949 القاهرة – المنصورة عن القضبان في سندهور بالقرب من طوخ، ما أدى أدي لإنقلاب عربات.
– السبب الوحيد اللي اتقال حتى الآن هوا إن القطار كانت سرعته كبيرة (120 كيلو) في منطقة بتحصل فيها إصلاحات ومحدش أبلغ القطار يهديء السرعة في المنطقة دي.
– دي ثالث حادثة قطار في مصر في خلال شهر، أولهم حادث قطار سوهاج اللي مات فيه 19 واتصاب 185 مصري في 26 مارس الماضي، وثانيهم هو قطار القاهرة المنصورة برضه اللي خرج يوم الأربعاء اللي فات 14 إبريل عن القضبان في منيا القمح، لكن الحمد لله محصلش وفيات كان في 15 مصاب فقط.
– بعد حادث منيا القمح، يعني من أربع أيام بس، الوزير كامل الوزير خرج ينتقد التهويل اللي حصل في الحادث وبيان المحافظة الرسمي اللي أتكلم عن إنقلاب عربتين من القطار وسأل ” لمصحلة من التهويل؟”
– والحقيقة محدش عارف التهويل فين، في عربيتين اتقلبوا وفي مصريين إتصابوا، لكن سيادة الوزير شايف أنه ده تهويل لازم يشوف موتي عشان يقول عليها حادثة ولا ايه محدش عارف؟!
– مصر بيحصل فيها متوسط 1000-1200 حادثة قطارات في العقد الأخير، وحسب الجهاز المركزي للإحصاء سنة 2019 حصل فيها 1863 حادث، وسنة 2018 حصل فيها 2044 حادث!
ويبدو أنه سيادة الوزير لا يطلع علي الأرقام الرسمية الصادرة عن جهاز التعبئة والإحصاء وشايف أنه مستهدف واللي بيحصل بالتوقيت ده مؤامرة، وأنه استقالته وتحمله المسئولية السياسية للكوراث المتكررة دي هي خيانة بحسب تعبيره.
– للأسف الشديد دا مش أول نعي نكتبه في الصفحة عن مأساة السكة الحديد في مصر، وسبق أن احنا وغيرنا نشرنا تفاصيل عن حجم المشاكل ومقترحات حلها، وبلا طائل دائما بتحصل حوادث جديدة لأنه تطوير المرفق وجودة الانفاق ومدي توفره وتوزيعه وإدارته كلها جوانب فيها مشكلات ضخمة.
– مسألة تطوير مرفق زي السكة الحديد محتاج إدارة رشيدة مش بس رفع لافتة “التطوير” بدون أي اهتمام لمعايير السلامة والأمان، اللي المفروض تكون شغالة في صلب أي عملية تطوير، لأن ممكن في غضون عملية التطوير اللي شغالة تحصل مآسي زي دي.
– مينفعش يتم المقايضة اللي الوزير بيقولها “استحملونا لحد ما نخلص التطوير عشان نوديكم أشغالكم وما نقفلش السكة الحديد”، لأن بكده هيبقى دور الوزير إيه؟ وفين إدارة الأزمات؟ لما البديل هيكون إن السكة الحديد تقفل.
– بنكرر عزائنا لأسر الضحايا، وأمنياتنا بالشفاء لكل المصابين، وبنطالب بتحقيق عادل وشامل، يضع كل المسؤولين أمام مسؤولياتهم.
– ربنا يرحم الضحايا ويصبر ذويهم ويشفى كل المصابين، ويعين المصريين على تحمل كل هذا الكم من الإهمال اللي بيعصف بأرواحهم، ونشوف نهاية لمسلسل المآسي المستمر
*****
المصادر
