الفيديو اللي قدامنا ده نشره المحامي المعروف طارق جميل سعيد، وبسببه اتقبض عليه وقررت نيابة أمن الدولة العليا حبسه ١٥ يوم بتهمة “اساءة استخدام مواقع التواصل”، ده رغم انه بنفس الفيديو بيناشد الرئيس السيسي، وبعدها حذفه ونزل فيديو تاني يهاجم الإخوان ويؤكد تأييده للقيادة السياسية!
– في الفيديو الأول كان بينتقد طريقة توزيع مقاعد مجلس الشيوخ والنواب عبر “القائمة الوطنية” اللي هيا في الواقع عبارة عن تعيين من الأجهزة الأمنية، وبيقول إن بعض الشخصيات اللي فيها سيئة السمعة أو بدون مؤهلات.
– المحامي طارق سعيد شخصية معروفة، سواء بسبب قضايا الرأي العام اللي اترافع فيها، زي انه كان محامي زينة ضد أحمد عز بقضية اثبات النسب، ومؤخرا هوا كان محامي متهمي قضية فيرمونت، وهو كمان شخصية معروفة بسبب عيلته، هوا ابن المستشار جميل سعيد، ومتجوز منة بنت الفنانين حسين فهمي وميرفت أمين.
– إذا كان شخص بالخلفيات دي بالتأكيد ١٠٠٪ مينفعش يتقال إخواني، ولا ممول من الخارج، ولا حتى معارض سياسي، هوا كل اللي عنده انتقاد على حاجة جزئية، وكل اللي عمله مجرد فيديو قعد أقل من يوم، لو ده يتقبض عليه ويتسجن، يبقى فين بقى في مصر أي مساحة لأي رأي مختلف عايز يمارس “المعارضة البناءة” اللي بيقولو عليها؟
– أبسط خطوة لعودة الاستقرار السياسي الحقيقي ومحاولة جمع المصريين هيا إطلاق سراح المعتقلين المظلومين، وبالذات المعارضين السياسيين السلميين، مش القبض على ناس جديدة من كل التوجهات بما فيهم مؤيدين أصلا زي المحامي طارق اللي بنتمنى يرجع لأسرته بالسلامة بأقرب وقت.