– إمبارح حصل نجمنا محمد صلاح على جائزتين، الأولى هي جائزة القدم الذهبية “جولدن فووت” ودي واحدة من الجوائز المميزة اللي بدأت عام 2003، واللي حصل عليها في السنين الأخيرة كل من كريستيانو رونالدو ولوكا مودريتش وكافاني.
– الجائزة دي بيتم تنظيمها في إمارة موناكو الفرنسية، و أبرز معايير الجائزة أن يبلغ اللاعب المرشح 28 عاماً على الأقل، وأن يكون صاحب قدرات كروية خاصة على المستوى الفردي وعلى مستوى الآداء الجماعي.
– صلاح حسم الجائزة دي متفوقًا على نجوم الكرة، ميسي، ليفاندوفيسكي، لوكاكو، بنزيما، أغويرو، ونيمار. ويعتبر محمد صلاح أول لاعب عربي يتوج بالجائزة، وثالث لاعب إفريقي، بعد ديديه دروغبا و صامويل إيتو.
– وتسلمت الجائزة إمبارح “ماجي صادق” زوجة محمد صلاح برغم حضوره، في إشارة وتقدير لدورها في مسيرته الكروية، واللي هي لقطة جميلة ومبنشوفهاش كتير في مصر أو في العالم، وفيها اعتراف بدور مراته في مسيرته، وإجمالًا كانت لقطة ظهور زوجته على المنصة جميلة جدًا في نظر ناس كتير.
– صلاح في حديث للصحافة اتكلم عن سعادته بالجائزة، وإنه تطور كبير حصله في حياته الكروية في فترة لعبه في إيطاليا مع أندية فيورنتينا وروما، وقال إنه سعيد بتجاوز أرقام الأسطورة ديديه دروغبا وفخور بإنه قدر يعمل ده.
– محمد صلاح برضه حصد جائزة تانية إمبارح وهي جائزة أفضل لاعب في الدوري الإنجليزي، واللي بيقدمها اتحاد مشجعي كرة القدم بإنجلترا، ودي المرة التانية لحصول صلاح على نفس الجائزة بعد ما خدها سنة 2018، ويعتبر صلاح أول لاعب يفوز بالجائزة دي مرتين.
*****
– طبعًا كانت الجائزة الأهم إمبارح هي جائزة “الكرة الذهبية” أو البالون دور اللي بتقدمها مجلة فرانس فوتبول، واللي هي أهم جائزة فردية في لعبة كرة القدم على الإطلاق، ويمكن تتفوق كمان على جائزة ” ذا بيست” اللي بيقدمها الاتحاد الدولي لكرة القدم “الفيفا”.
– للأسف حصل صلاح على المركز السابع في الجايزة دي، رغم إنه مقدم أداء فوق الرائع في بداية الموسم الحالي كونه هداف الدوري الإنجليزي دون منازع، وكان ضمن هدافي الدوري الإنجليزي الموسم الماضي بفرق هدف واحد فقط عن المتصدر “هاري كين”. وعشان كده كتير من جماهير الكرة مستائين من الترتيب النهائي للجائزة واللي صلاح كان يستحق فيه مكان أكبر من اللي حصل عليه.
– بغض النظر عن أي شيء، إحنا كالعادة سعداء جدًا بمحمد صلاح وبالتميز والتفوق الكروي اللي بيقدمه مع فريقه ليفربول اللي اتحول لواحد من أهم أساطيره على مدار التاريخ، ونتمناله مزيد من التألق والجوائز والألقاب الفردية والجماعية مع ناديه ومنتخب مصر.
*****
