رامي مالك .. مصر في جائزة الأوسكار

– النهاردة الاتنين في سهرة الأوسكار السنوية فاز رامي مالك بجايزة أفضل ممثل، وده محصلتش قبل كده لأي حد بأصول مصرية إنه خد الجايزة دي. Rami Malek

– رغم ان رامي اتولد في أمريكا وعاش حياته بها، لكنه ذكر مصر في كلمته أثناء استلامه الجايرة، قال: “أنا ابن مهاجرين مصريين، جزء من سيرتي يسطر الآن، وأنا أشعر بالامتنان إلى جميع الحضور هنا، وإلى كل من آمن بي، على تلك اللحظة التي سأعتز بها طيلة حياتي”.
– في فقرة أسئلة الصحفيين صحفية قالتله انت قلت قبل كده إنك بتحب أم كلثوم وعمر الشريف، ايه اللي بيمثلهولك كونك قادم من الشرق الأوسط؟ فبدأ كلامه بالتحية باللغة العربية، وقال أنا لما كنت صغير كنت باحس اني مليش علاقة بيه لكن لما كبرت أدركت اد ايه انا محظوظ بالتقاليد والتراث الجميل اللي عندنا من فن وموسيقى وأفلام وثقافة، وأنا محظوظ إني بامثلها هنا. (الفيديو بأول تعليق).

– رامي نال الجائزة عن فيلم Bohemian Rhapsody بوهيميان رابسودي، وده تتويج لمسيرته بعد سلسلة من الأدوار الناجحة، أهمها كان دور إليوت ألدرسون في مسلسل الخيال العلمي مستر روبوت.

– رامي اتولد في لوس أنجلوس من أبوين مصريين، أصوله ترجع لمركز سمالوط محافظة المنيا، والده ووالدته هاجرو لأمريكا سنة 1978 واشتغلوا وخلفو وأسسوا أسرتهم هناك.

– كان ممكن رامي يتولد هنا في مصر ويدرس مسرح زي ما درس في أمريكا، لكن في أمريكا خد فرصته ولقى دعم وتشجيع على موهبته، رغم إنه ابن مهاجرين عرب، ووصل الدعم والترحيب بيه في البيئة الناجحة ده إنه ياخد أهم جايزة فنية في العالم على الإطلاق متفوقا على كل منافسيه.

– بينما في مصر كان ممكن واحد جاي من الصعيد وملوش علاقات يقعد بالسنين في مسرح مهجور، وربما لو محظوظ يلقى بعد سنوات حد يحاول يزقه في دور صغير بالسينما أو التلفزيون يبدأ مسيرة طويلة صعبة، أو كان هيكفر بموهبته من بدري ويحاول يشوف شغل يساعده في عيشته.
عندنا حالات ومواهب قدرت تشق طريقها طبعاً رغم كل الصعوبات، لكن قصادهم للأسف ناس تانية كتير موصلتش لما تستحقه.

– نفس الكلام اللي بنقوله عن محمد صلاح مع كل إنجاز بيوصله، هوا إن البيئة الناجحة في العمل، والمجتمعات اللي مبتميزش بين السكان على أساس الهوية والدين واللون، واللي فيها كل الناس من حقها فرصة متساوية، المجتهد والمميز بينجح لأنه مفيش مجال للتمييز أو للواسطة، وده اللي بيخلي المجتمعات تتقدم وتستفيد من أفضل ما يقدمه أولادها.

– صفحة الموقف المصري بتهني رامي مالك، وبنتمنى ليه مزيد من التوفيق والأعمال الفنية، وبنتمنى لكل مصري يلقى فرصته العادلة في بلده بالمجال اللي يتمناه.