فريق صفحة الموقف المصري بيتقدم بالتهنئة لمنتخبنا الوطني لكرة اليد ولكل المصريين على الفوز ببطولة افريقيا على حساب تونس يوم الاحد بنتيجة 27 -23، كمان ده هيأهل منتخبنا لأولمبياد طوكيو.
– المنتخب المصري عمل ماتش رائع قدام المنتخب التونسي في رادس، رغم ان تونس صاحبة الرقم القياسي للفوز بالبطولة (10 بطولات )
– المنتخب قدر يحقق العلامة الكاملة طول البطولة، مخسرش ولا ماتش.
– دي البطولة السابعة للمنتخب المصري لليد، اللي طول تاريخه كان مشهور بالإنجازات الكبيرة زي دي، والجيل الحالي واحد من أفضل أجيال كرة اليد في مصر تحت قيادة المدرب الأسباني روبرتو جارسيا باروندو.
– قايمة اللاعبين اللي شاركو في البطولة ويستحقو التحية هم: كريم هنداوي، عصام الطيار، محمد علي، محمد سند أكرم يسرى، أحمد الأحمر، يحيى خالد، محسن رمضان، أحمد خيري، سيف الدرع، أحمد هشام السيد، يحيى الدرع، على زين، حسن قداح، عمر بكار أحمد مؤمن، إبراهيم المصري، محمد ممدوح هاشم، وسام نوار، أحمد عادل، خالد وليد.
******
– نتمني مزيد من الاهتمام بالألعاب اللي مصر متميزة فيها زي كرة اليد، عشان نقدر ناخد ميدالية أوليمبية، خاصة وإنه في أغسطس اللي فات منتخب الناشئين تحت 19 سنة كسب كاس العالم في كرة اليد، وقبلها منتخب الشباب حقق المركز الثالث في كاس العالم.
– وده دليل على إن في تخطيط وإدارة كفؤة حقيقية بتدير كرة اليد وبتقدم أجيال مميزة، ولازم يتم الاهتمام الحكومي بالأبطال دول ورعايتهم وتشجيعهم بما إن مصر عندها إمكانية خاصة في اللعبة دي ولينا فيها مستقبل، حتى يتم مساواتهم في المكافئات والاهتمام باللي بيحصل مع منتخب كرة القدم.
– بشكل عام مطلوب إن الحكومة تستثمر أكتر في تطوير الرياضة في مصر، مش بس الاهتمام بالمنتخبات والأندية الكبيرة، لكن بإتاحة بنية تحتية من ملاعب ومراكز شباب جيدة تخلي المواطنين يقدرو يمارسو الرياضة بمختلف الألعاب سواء لغرض الترفيه والرعاية الصحية، أو لأغراض الاحتراف واكتشاف مواهب أكتر في كل لعبة. وده أمر لازم يبدأ من المدارس ومن خلق بيئة مناسبة في كل مدرسة للعب الرياضة للولاد والبنات.
– إحنا بلد كبير فيه 100 مليون نسمة وعندنا مواهب كثيرة، لكن بينقصها الإدارة الجيدة والاستثمار في المواهب دي بالشكل السليم والحفاظ عليها من خلال نظام كفؤ.
– مبروك لكل المصريين، مبروك لأبطال منتخب اليد، ولجهازهم الفني، وبانتظار ميدالية في أوليمبياد طوكيو.
******
– الصورة للاعب محمد ممدوح هاشم بيحاول يبوس رجل أمه بعد الفوز بالبطولة.
******
المصادر