– في البوست السابق نشرنا مقطع فديو لنائب حزب الوفد الحالي عمرو أبو اليزيد بيتكلم فيه عن تغيير النتائج في دائرة بولاق الدكرور بالجيزة، وتحولها بعد ما كانت إعادة بين 6 مرشحين على ال 3 مقاعد الفردية، منهم النائبين الحاليين عمرو أبو اليزيد ومحمد إسماعيل، وبقت حسم من الجولة الأولى لمرشحي مستقبل وطن محمد الحسيني ومحمود توشكى وحسام المندوه، وده مخالف لمحاضر اللجان الفرعية الرسمية.
– النهاردة في تفاصيل أكتر اتنشرت في كذا دائرة انتخابية:
1 – دائرة العمرانية والطالبية، وهي دائرة بمقعدين، اتقدم فيها طعون مبدأية من 7 مرشحين في أقل من 24 ساعة، بسبب التلاعب الكبير اللي حصل في نتيجة اللجنة العامة اللي تم إعلانها بفوز مرشحي مستقبل وطن والشعب الجمهوري.
– التلاعب الغريب والفج ده مصدره إنه إجمالي عدد اللي قامو بالتصويت في الدائرة كلها حوالي 50 ألف صوت، وكان أعلن النائب محمد فؤاد، مرشح الحزب المصري الديمقراطي، إنه خلاص دخل جولة الإعادة هو ومرشح الحزب التاني علاء شلتوت، مع مرشح مستقبل وطن محمد علي ومرشح رابع لم يتم حسمه.
– النائب محمد فؤاد نشر على صفحته من ساعة النتيجة العامة اللي تم إعلانها، واللي كانت فوز مرشحي مستقبل وطن والشعب الجمهوري من الجولة الأولى بواقع 145 ألف صوت لمرشح مستقبل وطن و 115 ألف صوت لمرشح الشعب الجمهوري، والدكتور محمد فؤاد 64 ألف صوت، والأستاذ علاء شلتوت 54 ألف صوت، وباقي المرشحين 500 صوت فأقل، وده على الرغم من إنه المحاضر الفرعية المختومة من القضاة أثبتت إنه الحضور هما 50 ألف مواطن فقط ! وده مرحلة خطيرة من التزوير
– الحزب المصري الديمقراطي الاجتماعي قدم طعون ونشر بيان بيتكلم فيه عن اختلاف جسيم في النتائج المعلنة عن محاضر اللجان الفرعية اللي بيمتلكوها، واللي هي أساساً بتتعمل عشان يكون عند كل مرشح وثيقة تثبت حقه في عدد الأصوات اللي حصل عليها منعاً للتلاعب ومختومة من القاضي اللي بيشرف على الانتخابات.
– واللقطة المثيرة للسخرية إنه اتضح للمرشحين في الدائرة دي تحديداً إنه رئيس اللجنة العامة والمسؤول عن النتيجة اللي تم إعلانها، هو المستشار “ناجي شحاتة” صاحب أكتر أحكام مشهورة بان محكمة النقض بتلغيها بسبب “قصور في التسبيب وفساد في الاستدلال”، واللي قال قبل كده تصريحات كتير عن توجهاته السياسية زي كراهيته لثورة يناير، والأهم هو كان رئيس اللجنة العامة لدايرة الدقي والعجوزة في 2015 واللي تم تزوير النتيجة فيها لصالح أحمد مرتضى منصور ضد الدكتور عمرو الشوبكي واللي صدر حكم قضائي يثبت التزوير ده لكن البرلمان منفذش الحكم!
كإن وجود ناجي شحاتة تحديدا يرتبط بالتزوير والتلاعب بالنتائج.
*****
هل ده حصل في دوائر تانية ؟
– للأسف برضه حصل واتكرر.
2- عندنا دائرة أطفيح في محافظة “الجيزة” وهي دائرة بمقعد واحد، بعد إنتهاء الفرز في اللجان الفرعية كان حصل المرشح المستقل “محمد كاسب” على 21 ألف صوت، بينما مرشح مستقبل وطن “شحاتة أبو زيد” كان حصل على 8 الآف صوت، وبدأ المرشح “كاسب” يتلقى التهاني لوصوله لجولة الإعادة مع المرشح ” أحمد شعبان الفار ” اللي حصل على 20 ألف صوت، وهو مرشح حزب “حماة الوطن”.
– ساعات ومع طلوع النهار تم إعلان نتيجة مختلفة بفوز “شحاتة أبوزيد” مرشح مستقبل وطن من الجولة الأولى بعدد أصوات 78 ألف صوت، بينما المرشح “محمد كاسب” اللي كان معاه 21 ألف صوت في نتايج الفرز، اتحولو ل 14 ألف صوت، يعني بيشيل من المرشحين عشان يزود أصوات مرشح مستقبل وطن !!
3- دايرة الصف المرشحين ” محيي الزيدي” والمرشح “عربي زيادة ” تم إعلان النتيجة بوصولهم لجولة الإعادة، وكان حصل المرشح محيي الزيدي على 20 ألف صوت، بينما كان مرشح مستقبل وطن “أحمد نويصر” واللي عمه هو “مدير أمن القاهرة السابق” كان في المركز الخامس ب 8 الاف صوت يعني خارج جولة الإعادة، عشان تتقلب النتيجة برضه ويبقى مرشح مستقبل وطن حاصل على 63 ألف صوت في المركز الأول ويحسم المقعد من الجولة الأولى. وده برضه على الرغم من وجود محاضر فرز اللجان الفرعية.
4- الأمر نفسه اتكرر في الوراق وأوسيم اللي كان فيها إعادة على ال 3 مقاعد، ومنهم المرشح يوسف غراب، اللي كان حاصل على أكتر من 8 الاف صوت، فالنتيجة في اللجنة العامة تتغير ويبقى الحسم من الجولة الأولى ل “طارق الطويل” مرشح الشعب الجمهوري و”عاطف الأشموني” و “محمود الصعيدي” مرشحي مستقبل وطن، بواقع 191 ألف، و 180 ألف و 177 ألف صوت على الترتيب، وباقي المرشحين كلهم 2000 صوت !! ومحاضر اللجان الفرعية موجودة وتثبت التلاعب.
5- نفس طريقة النتيجة دي حصلت في إمبابة لصالح النائبة الحالية “نشوى الديب” ومرشح مستقبل وطن “طارق سعيد حسنين” اللي نشرنا فديو لمواطنين بيشتكوا إنه وعدهم برشاوي انتخابية ومدفعهاش، واللي اكتسحوا من الجولة الأولى بأرقام ضخمة جداً مشكوك في صحتها.
– وفي دايرة الهرم وأكتوبر والواحات برضه كانت نتايج المحاضر الفرعية بتقول إعادة بين 6 مرشحين وهم مرشحي مستقبل وطن “أحمد غفرة”، “عمرو القطامي”، “محمد سلطان”، والمرشحين “هشام حسين” و”مي البطران” و”علي حسين القاضي”، وينتهي المطاف على عكس نتايج اللجان الفرعية، بحسم من الجولة الأولى لصالح مرشحي مستقبل وطن.
6- خارج نطاق الجيزة المرة دي واللي كانت متفردة بالنجاح من الجولة الأولى في كل الجمهورية، حزب المحافظين نشر بيان عن دائرة حلايب وشلاتين، واللي فاز بيها في البداية مرشح الحزب “مصطفى كنشيب” بعد حصوله على أعلى الأصوات من واقع محاضر اللجان الفرعية الأربعة، وهنأه بالفعل رؤساء اللجان من المستشارين.
– بحسب الحزب، كانت أحد محاضر الفرز فيها خطأ بإنه إجمالي عدد المصوتين 1250 بينما عدد الأصوات الصحيحة 1800، وبمراجعة رئيس اللجنة تم تصحيح الخطأ والأمور كانت جيدة، ليفاجئوا بعدها بإعلان مختلف بفوز مرشح حزب الشعب الجمهوري “علي نور” بمقعد الدائرة !! وده عكس محاضر اللجان الفرعية اللي تم نشرها جميعاً.
7- قائمة نداء مصر واللي هي قائمة مفيهاش وجوه معروفة ولا بتدعمها أحزاب معارضة كانت القايمة الوحيدة اللي نافست قايمة “من أجل مصر” وكانت المفاجئة إنها حصلت على كتير من الأصوات العقابية، قائمة نداء مصر نشرت بيان بتتكلم فيه عن التجاوزات الانتخابية اللي حصلت ضدها، لكن الأخطر هو اللي نشروه عن تزوير وإعلان نتايج غير حقيقية في كتير من المحافظات على خلاف النتايج الحقيقية من واقع محاضر الفرز في اللجان الفرعية اللي حضروها، لأنهم منعوا من حضور الفرز في كتير من اللجان العامة والفرعية !!
*******
– الحقيقة بتقول إنه في ناس كتير رافضة حزب مستقبل وطن ورفضت تصوت لمرشحيهم وعبرت عن رأيها بحرية وبكرامة وثقة في نزاهة الانتخابات، على الرغم من الرشاوي اللي بتتدفع في كل دايرة، صحيح الرشاوي دي بتشتري كتير من المواطنين الفقراء واللي معندهمش وعي بخطورة اللي بيعملوه، لكن ده في كتير من الدواير نزل مواطنين بيصوتوا بحريتهم وبعقلهم فعلاً، وده شيء عظيم جداً وبيقول إنه في أمل دايماً لما نكلم الناس ونوعيهم ونقولهم بديل لواقعنا.
– لكن اللي حصل من التلاعب والتزوير ده بيدي رسايل أكتر للناس إنه حتى الانتخابات مش هتكون نزيهة ولا وسيلة الناس تقول فيها رأيها !!
– حتى الان بإمكان أي عاقل في السلطة يتدخل ويعيد الأمور لنصابها، وجود نواب محترمين ونتايج حقيقية مش هيغير رئيس ومش هيعمل كارثة في البلد، بالعكس ده هيخلي الناس واثقة في إنه لو مش عاجبها أوضاعها ولا القوانين اللي بتتفرض عليهم يقدروا يغيروا ده في صندوق الانتخابات بمرشحين محترمين، لكن لما يحصل العكس فالناس مبيبقاش قدامها مع إحساس الظلم غير الانفجار، وده مشهد مش بعيد عن كتير مننا في انتخابات 2010 الشهيرة.
– هنتكلم بالتفصيل أكتر عن نتايج تانية لمرشحين محترمين وصلوا لجولة الإعادة، وخلونا فاكرين كويس إنه نزول الناس وتصويتها هو اللي بيكشف ويفضح أي عملية لعب أو تزوير.
– لو عندكم نتايج أو وقائع بنفس المنهجية دي في التزوير والتزييف في الانتخابات ابعتولنا على صفحتنا واكتبولنا في الكومنتات، خلونا نعرف أكتر إيه اللي بيحصل طالما مفيش إعلام حر ينشر ويتابع ويراقب.
*****
