ألف مبروك لكل المصريين.
قبل قليل فازت البطلة المصرية رحاب أحمد بالميادلية الفضية في رياضة رفع الأثقال بدورة الألعاب البارالمبية في ريودي جانيرو (أولومبياد ذوي الإعاقة).
وامبارح كمان البطل المصري شريف عثمان فاز بميادلية ذهبية بنفس الرياضة، وكمان حقق انجاز تاريخي عالمي بكسره الرقم القياسي.
بعثتنا مليانة بالأبطال اللي بيعلمونا كلنا دروس في إن الاجتهاد والصبر بيحققو المعجزات، وإن مفيش حاجة مستحيلة على اللي بيقرر ويسعى بدأب ومثابرة .. ومن أبرزهم إبراهيم حمدتو اللي جذب انظار العالم لأنه اللاعب الوحيد اللي بيلعب طاولة باستخدام فمه في مسك المضرب لأنه فاقد لذراعيه.
بعثة مصر السنادي بتنافس في خمس رياضات هيا رفع الأثقال وألعاب القوى والكرة الطائرة جلوس للرجال وتنس الطاولة والسباحة.
نتمنى ليهم كل التوفيق، ونتمنى الدولة تمنحهم الاهتمام والتكريم اللي يستحقوه، والمجتمع يمنحهم الاحترام والفخر اللي يليق بيهم.
إحنا في فريق صفحة الموقف المصري بنتمنى كلنا نتعلم من أبطالنا الثبات على الحلم والاجتهاد عشانه، وحلمنا تغيير بلدنا ومجتمعنا للأفضل، ومع بعض ان شاء الله هنحقق حلمنا.