مواطنين مصريين بيقولوا لا لتعديل الدستور
شكرا للمواطنين (بترتيب الفيديوهات) محمد منصور، محمد علي، أحمد خيري، إسلام محمد، أحمد عيد، حسنين صلاح، أحمد حسن، محمد زهران، هاني أبو الغيط.
بدءًا من النهارده، اخترنا تركيز فيديوهات المشاركين في حملتنا لفيديو واحد علشان منتوهش الناس في فيديوهات تملى الصفحة وعلشان مش ملاحقين على نافورة الفيديوهات اللي بتوصلنا من كل محافظة في مصر كل دقيقة. هننزل كل يوم فيديو برسايل ومشاركات المواطنين اللي بتوصلنا..
مئات المواطنين، ستات ورجاله، كبار وشباب، من الصعيد للدلتا للقاهرة وإسكندرية.. قرروا يعلوا صوتهم رفضا لتعديل الدستور.. ورسالتهم واضحة: متفقناش على كده.. الدستور مبيتغيرش بهوى الحاكم.. عاوزين تداول سلمي للسلطة.. عاوزين نشوف رئيس بييجي وبيسلم للي بعده، مش رئيس للأبد..
اسمعوا أصوات مواطنين مصريين قرروا يعلوا صوتهم ويشجعوا وراهم مئات الآلاف من المصريين، وبيشجعوا مئات السياسيين والشخصيات العامة انهم ياخدوا موقف تجاه تعديل الدستور.
دي الأصوات اللي عاوزينها توصل لنواب البرلمان ولرئيس الجمهورية.. أصوات رافضي تعديل الدستور.
*****
عبر عن رأيك بالطريقة اللي شايفها مناسبة، بعض المصريين اختارو ينشرو فيديو أو صور ليهم .. وممكن برضه تستخدم أي طريقة تانية تشوفها أمان أكتر ليك: مثلا فيديو من ضهرك، أو صوتك على فيديو والموبايل بيصور حاجة تاني زي صورة من بلكونة البيت، أو تسجيل صوتي، أو تكتب لا لتعديل الدستور على ورقة تداري بيها وشك، أو أي فكرة تانية تحبها.
الصيغة دي هيا اللي كتيرمن المصريين بدأوا يعملو فيديوهاتهم بيها، ممكن تقولها او تغيرها:
أنا المواطن المصري (فلان) أرفض تعديل الدستور، وأرفض الاعتداء عليه، المادة 226 من الدستور المصري تقول أنه لا يجوز تعديل المواد الخاصة بإعادة انتخاب رئيس الجمهورية.
*****
بأي طريقة تحبها اتمسك بحقك في رفض التعديلات الظالمة.
اتمسك بحقك في اختيار رئيسك وعدم مد فترة الرئيس بعد نهاية مدته.
اتمسك بحقك في رفض اهدار أموالك بإعادة مجلس الشورى تحت اسم الشيوخ.
اتمسك بحقك في قضاء عنده ولو أقل قدر من الاستقلال مش الرئيس يختار النائب العام وكل قيادات القضاء.
استخدم الطريقة اللي تناسبك وحط معاها هاشتاج #لا_لتعديل_الدستور
وابعتلنا اللي هتعمله على الانبوكس او ايميلنا almawkef.almasry@gmail.com
أو انشره على صفحتك الشخصية مع الهاشتاج، وهنوصلها، وهننشرها عندنا.
اتكلم مع أهلك وصحابك ووعيهم بخطورة التعديلات الدستورية على البلد ومستقبلنا كلنا.. الأمل هيفضل موجود طول ما المصريين الجدعان موجودين.
*****
