– إمبارح تم الإعلان عن القبض على “عادل شكل” كبير مشجعي الاتحاد السكندري، بعد ساعات من فيديو بينتقد فيه حزب مستقبل وطن.
– حزب مستقبل وطن اللي اسمه بيتردد مع كل حدث في مصر سواء سياسي أو رياضي أو فني أو غيره هو أغلبية في البرلمان ونوابه متسجل عليهم في انتخابات مجلس النواب رشاوى انتخابية وتزوير وغيره، ومحدش اتحرك ضدهم.
– فجأة بسبب إن فرد قال رأيه في طريقة إرسال مشجعين المنتخب للكاميرون برعاية حزب مستقبل وطن، لاقينا التصريحات الرسمية بتقول إنه تم القبض عليه بسبب حيازته للسلاح الأبيض، إيه القصة؟ وليه اتقبض عليه؟ وإيه علاقة مستقبل وطن بالقصة دي؟ ده اللي هنتكلم عنه في البوست دا.
*******
إيه القصة؟
– عادل شكل هو أحد الشخصيات المشهورة جدًا على السوشيال ميديا الفترة الأخيرة بسبب فيديوهاته الساخرة والمضحكة (اللي ممكن تحبها أو متحبهاش)، لكن هو في الأصل كبير مشجعي نادي الاتحاد السكندري، وكل جمهور الكرة المصري يعرفه من زمان، بحكم إنه من قيادات روابط التشجيع للأندية الشعبية تقريبًا كلهم معروفين لسنين طويلة.
– الفيديو اللي قدامكم تاريخه من يومين، كان بيقول فيه إنه أمانة مستقبل وطن في إسكندرية تجاهلت مشجعي الكرة بإسكندرية عكس باقي المحافظات، ومكنت أقارب وأصدقاء نواب مستقبل وطن من السفر للكاميرون لتشجيع المنتخب المصري في مباراته القادمة بأمم أفريقيا ضد منتخب السودان.
– والحقيقة إنه عادل شكل مقالش أي شيء فيه تجاوز ضد حد، هو كان بيشتكي إنه مسافرش زيه زي كتير من مشجعي الكورة اللي سافروا على حساب حزب مستقبل وطن للكاميرون، في مقابل إنه ناس كتير بتسافر على حساب الحزب وملهمش علاقة بالتشجيع الكروي.
– انتقاد عادي وليه واجهته وممكن يترد عليه أو ميتردش، واللي ليه في الكورة يعرف إنه ده بيتكرر كتير في الوسط الرياضي عمليات المحسوبية والواسطة والرشوة، سواءًا في النوع ده من الرحلات أو في توزيع تذاكر الماتشات الكبيرة والمهمة، أو تجارة السوق السوداء، وغيرها من أشكال الفساد اللي مكافحتها ضعيفة جداً في الوسط الرياضي من سنين طويلة قوي، وحاجة كده زي صندوق أسود.
*******
طيب ليه مستقبل وطن بيتدخل في الرياضة؟
– زي ما إحنا عارفين مستقبل وطن هو حزب الأغلبية في مجلسي النواب والشيوخ، وهو حزب تم تأسيسه في 2014 تحت رعاية واضحة من “الأجهزة”، وكان بيتروج شوية إنه حزب الرئيس أو حزب الدولة، وبعدين اختفت النغمة دي، وفي الانتخابات الأخيرة كان واضح جدًا زي ما نشرنا قبل كده حجم التزوير اللي كان لصالح مرشحي الحزب في أغلب دوائر الفردي بالإضافة للقائمة، واللي نتيجته إنه الأغلبية دي في البرلمان بتتحرك بالتزام كامل بتعليمات من خارج البرلمان.
– والتزوير ده كان مرتبط برضه برشاوي انتخابية فجة دأب الحزب ده على استخدامها في أكتر من مناسبة انتخابية، من أول بقى الرشوة بكراتين تموينية وفلوس لحد غيرها من الرشاوي الموسمية في توزيع بطاطين وأجهزة كهربائية وغيرها.
– ودي مجموعة فيديوهات بتوثق الكلام دا كنا نشرناها على الصفحة قبل كده تقدروا ترجعوا ليها:
– لكن المفاجئ إنه الحزب ده عن طريق رجل الأعمال أحمد دياب، قرروا اقتحام مجال كرة القدم، فأصبح بين يوم وليلة في رابطة للأندية الرياضية بيرأسها أحمد دياب، وبقى في نادي رياضي اتقال إنه تابع للحزب اسمه “فيوتشر” أصله كان نادي كوكاكولا الرياضي، وتم تغيير الاسم لفيوتشر بعد ما لقوا اعتراضات وتهكم وسخرية كتير.
– واللي بيتابع الكورة هيكتشف إنه النادي ده ضمن أكتر الأندية اللي صرفت فلوس لاستقدام لاعيبة مصريين وأجانب بفلوس كتيرة جدًا ومرتبات خيالية تكاد تقترب من الأهلي والزمالك، وكمان مع كل ماتش بقى ليهم رابطة مشجعين، لكنهم في الحقيقة أعضاء من أمانات الحزب، وبيتلقوا تذاكر مجانية بدون سيستيم التذاكر اللي موجود لباقي الأندية، مع وجبات غذائية وفلوس وترفيه.
– الحقيقة مش مفهوم برضه ليه حزب سياسي المفروض ليه دور محدد في العالم كله، يبقى ليه نادي رياضي ويبقى ليه تدخل في الكورة، والموضوع يوصل لتهديد أدمن صفحات رياضية لو لمحوا بسخرية أو إساءة للنادي ده أو أحد لاعبيه أو إدارته، ومش مفهوم برضه ليه حد ينتقد سياسة توزيع تذاكر وسفريات للتشجيع، إنه يتحبس فورًا!
– خاصة لما نعرف إنه عادل شكل لا هو مناضل ولا حقوقي ولا صحفي ولا سياسي، ده مشجع كورة، صاحب فيديوهات ساخرة، وليه سوابق بلطجة اتحبس عليهم قبل كده، ومعروف في إسكندرية من سنين طويلة بإنه بيتم تأجيره في أعمال شغب وبلطجة، وبيشتغل في مواسم الانتخابات البرلمانية، سواءًا أيام الحزب الوطني أو حاليًا مع مستقبل وطن.
– صحيح التهمة المرة دي مهياش كالمعتاد انضمام لجماعة إرهابية ونشر أخبار كاذبة، ويمكن ده بسبب الشهرة الكبيرة لعادل شكل كشخص صاحب فيديوهات مضحكة وغير جادة، وصحيح إنه عادل شكل هو في الأساس بيمارس البلطجة من زمان، وأكيد محدش هيكون ضد إنه يتم حبس شخص لأنه بيرتكب جريمة فعلًا، بغض النظر إنه مشهور أو بيضحك الناس أو غيره.
– لكن إنه ده ميتمش استخدامه غير بانتقاد حزب مستقبل وطن، فده يقولنا مستوى تطبيق القانون عامل إزاي في مصر، وشيء مؤسف إنه لو في بلطجية متعاونين مع المباحث والشرطة بيتسابوا عادي لأنهم بيحققوا مكاسب وفوائد ليهم، بغض النظر إنهم يتسابوا للتهجم على المواطنين والتعدي عليهم وغيره.
– شيء مؤسف قوي إنه الاستبداد والسيطرة والنفوذ بتاع رجال أعمال يكون بالشكل الفج ده، ويبقى متداخل في كل شيء في حياة الناس بما فيها الرياضة والكورة، ودا حاجة بتفكرنا بالحزب الوطني مع اختلاف الوقت والسياق يعني.
– تاني بنأكد إن انتقاد حزب سياسي في نشاط عام مش جريمة أبداً تستوجب اعتقال أو تلفيق قضايا لقرص الودن، دا بيفقد الثقة في منظومة العدالة كلها، ونتمنى النيابة والقضاء يتعاملوا باستقلالية عن فكرة التكدير وقرص الودن للي بينتقد حزب سياسي، لأن أكيد القضاء المصري يفترض إنه أكبر وأعرق من كده.
*****
المصادر
