– تخيل إنك تبقى قاعد في بيتك في حي مستقر من سنين طويلة جدًا، وفجأة لقيت حد بيكلمك ويقولك معلش احنا هنضطر نشيل جزء أو كل الحي اللي إنت ساكن فيه ! هل ده كلام ممكن يتصدق؟ ده اللي حصل اليومين اللي فاتوا مع سكان الحي السادس في مدينة نصر اللي متفاجئين جدًا من اللي بيسمعوه.
– إزاي حي متخطط مش عشوائي يتشال؟ وإيه المناسبة لده؟ وإيه تفاصيل القصة دي ؟ ده اللي هنتكلم عنه في البوست الحالي.
*********
إيه اللي حصل؟
– مدينة نصر واحد من أهم الأحياء في شرق القاهرة وبيعتبر واحد من إنجازات دولة يوليو باعتبار الحي اتبنى بخبرات السوفييت واستفاد منه المهجرين من السويس وبقى حي سكني كبير فيه منشآت حيوية لمعظم أفرع الجيش، وأول ستاد كبير في عهد عبد الناصر، ومكان جامعة الأزهر ووزارات جديدة وغيره من الحاجات المهمة في الحي ده.
– من يومين بالظبط بدأ كلام غريب يتنشر عن إزالة 2 من أحياء مدينة نصر وهما الحي السادس والسابع بدون تفاصيل كفاية ودا اللي أصاب السكان بالهلع، نائب محافظ القاهرة ” إبراهيم صابر” اتكلم عن الموضوع ده امبارح، وقال إنه لازم يحصل إزالة لمجموعة من العمارات بالحي السادس، لأنها عمارات مر عليها 60 سنة وبالتالي هي متهالكة ومعرضة للسقوط.
– العمارات اللي بيتكلم عنها نائب المحافظ هما 125 عمارة ومعروفة باسم عمارات “التعاونيات” ودي قصاد المركز الطبي لنادي المقاولين العرب في طريق النصر، وده كان بداية الكلام واللي عشانه اجتمع نائب المحافظ بأهالي العمارات دي.
– لكن خرجت رئيسة حي غرب مدينة نصر “ميرفت مطر” وقالت إنه الحي السادس بأكمله هيتشال ضمن مخطط تطوير للمنطقة، والإزالات دي هتبدأ من قسم ثاني مدينة نصر لحد محور جيهان السادات، وهيتم إنشاء أبراج سكنية جديدة زي ما بيحصل حاليًا في أراضي مثلث ماسبيرو وحي بولاق اللي تم تعويض الناس وإخلاء المنطقة لإنشاء الأبراج دي، وعشان يتم تصميم محاور مرورية جديدة وحل أزمة التكدس المروري في المنطقة دي.
– يبقى كده أغراض وأهداف الإزالة بحسب التصريحات الرسمية اللي بتطلع متضاربة ومفيش شفافية في الأمر.
– كمان في تضارب في مصير المنطقة اللي هيتم إزالتها، نائب المحافظ قال إنه هيتم إعادة بناء العمارات الـ 125 وأصحاب الشقق هيقعدوا في شقق مؤقتة ويرجعولها مرة تانية ويدفعوا الفرق، وبعدين ظهرت تصريحات تانية بتقول إنها هتكون ضمن الـ 100 ألف وحدة سكنية اللي هيتعملوا إسكان للشباب ! وبعدين ظهر كلام تالت إنها هتكون أبراج استثمارية أو سكنية !
– كمان السيناريوهات البديلة اللي بيتواجه بيها الأهالي صعبة جدًا، ما بين إنه الناس تقرر إنها تاخد تعويض وتنهي أي حقوق ليها في المنطقة دي، والتعويضات دي بحسب مصادر قالت لموقع مدى مصر هتكون للشقة الـ 90 متر حوالي 135 ألف جنيه، بالرغم من إنه سعرها في السوق 350 ألف جنيه ! وده برغم تصريحات مختلفة لنائب المحافظ قال فيها إنه في عمارة واحدة بالحي السادس مملوكة لـ 12 أسرة هيتم إزالتها عشان توسعة محور مروري، مقابل تعويض 5 مليون و800 ألف جنيه، يعني بمتوسط 400 ألف جنيه للأسرة الواحدة.
– باقي السيناريوهات اللي اتكلم عنها نائب المحافظ إنه الناس تاخد شقق بديلة في مدينة السلام لحد ما ينتهي المشروع وترجع لشقق بنفس المساحة في المنطقة بتاعتها، أو إنه تاخد التعويض بشكل نهائي، واتقال كلام عن التمليك في مشروع “جاردينيا” السكني، وده كومباوند في مدينة نصر تابع للجيش، في مقابل دفع الفرق برضه بين ثمن الشقة القديمة والجديدة.
– أما بالنسبة للمحلات التجارية المؤجرة، فيا إما ياخدوا محلات جديدة من اللي بتتعمل تحت الكباري، أو ياخدو محلات بديلة في مناطق تانية، أو محلات في نفس المنطقة بعد التطوير، أما ملاك المحلات التجارية هيتم تعويضهم.
*********
فين الإشاعة وفين الحقيقة؟
– في الأوقات اللي زي دي المفروض الحكومة بتعلن خطة واضحة الملامح لأنها عاوزة تعمل الإزالات ليه وبأي غرض والمنطقة الفلانية تحديداً، واللي فيها عدد سكان كذا إلى آخر القصة، مش نسمع الكلام المتضارب دا كله اللي مش عارفين فيه الحقيقة فين.
– ببحث بسيط مثلا شوفنا موقع مدى مصر نشر عن بدء حي غرب مدينة نصر حصر رغبات سكان “الحي السادس” في توفير سكن بديل لسكان 122 بلوكًا، تضم 3500 شقة سكنية، في المساحة اللي بتبدأ من خلف قسم شرطة مدينة نصر تاني وحتى الخليفة الظافر، بحسب مصدر رسمي بإدارة الحي، تحدث لـ«مدى مصر» مشترطًا عدم ذكر اسمه.
– أما موقع درب فنشر تفاصيل عن الخطة الحكومية لإزالة الحي السادس بمدينة نصر بتقول إن 4500 وحدة سكنية ومحل تحت التهديد لبناء أبراج ومولات ومحاور جديدة.
– وعرفنا كمان من تقرير درب إن المصادر أكدت أن الاجتماعات مع الأهالي انتهت دون اتفاق نهائي، وأكدوا تمسكهم بالبقاء في المنطقة، ورفضهم التعويضات أو النقل.
**********
ليه ده كله ممكن يحصل؟
– الموضوع كله غريب الحقيقة لكنه مش جديد، لأكتر من 8 سنين وفي مشاريع شغالة بدأب لإزالة مناطق سكنية، ولعمل مشاريع طرق وكباري ومحاور جديدة، بدأ الموضوع بالمناطق العشوائية واللي هي أكيد محدش هيكون ضدها قوي، لأنه في الواقع العملي الناس بتاخد سكن بديل أفضل من اللي كانت عايشة فيه، وفي بيئة صحية أكتر، وبتصفي أماكن كانت بؤر لانتشار عمليات إجرامية وغيره من المخاطر.
– وبعد كده بقى في إزالات للمباني المخالفة وغير الحاصلة على ترخيص بالبناء، وده برضه فيه شوية منطق لأنه شوه كتير من الطرق وعمل أزمة في الخدمات، واتنفع من وراه مقاولين ومسؤولين فاسدين في المحليات سابوا عمارات وأبراج تتبني مقابل رشاوي ياخدوها، واللي بيشتري الشقق يتبهدل عشان المرافق والخدمات تجيله.
– لكن الأمر الغريب جدًا هو إنه يتم إزالة مناطق سكنية أو أحياء مستقرة من سنين طويلة، لا وضعهم القانوني غلط لأنه كل ده مبني بتصاريح، ولا البناء عشوائي لأن معظمه مبني من زمان جدًا، ولا معقول إنه في حي بأكمله عماراته هتقع، ده ممكن يحصل مع مجموعة عمارات لكن مش حي كامل ! وده عشان يحصل لازم الناس تتأكد من تقارير السلامة الإنشائية بنفسها.
– هدم البيوت وإزالتها بين يوم وليلة شيء مخيف ومرعب، لأنه دي ملكية خاصة مش المفروض إنه يتم التعامل معاها بالمهانة والاستسهال ده، والناس عندها أوضاع اجتماعية من مدارس وجامعات وشغل ونوادي وغيره من الأمور المستقرة لسنين طويلة، وبعضهم واخد شقق بالتقسيط أو وضعه المادي يدوب يقضي معيشته العادية، فإيه اللي يستدعي إنه الدولة تقرر بين يوم وليلة إنها تحول عيشته لكابوس مضطر يستلف ومضطر يقبل بتعويض بنص القيمة بتاعت شقته، ومضطر يغير مكان سكنه لمكان أقل في كل حاجة، ومضطر يشوف شقة بديلة ويعزل ليها، وميعرفش لما هيعزل للمكان ده هييجي عليه الحظ تاني ويتقاله لازم تعزل ولا لأ.
– دي كلها أمور لو بتحصل بسبب زلزال أو انفجار قنبلة أو حرب أو انهيار مباني هيكون شيء مفهوم، لكن إنه ده يحصل وبسرعة عشان خطة تطوير شوارع وطرق، فده شيء بعيد عن أي منطق في احترام سكن الناس وراحتهم وملكيتهم.
– لأن المشكلة مش بس في السكن، لكن الأسر اللي عندها أطفال في مدارس قريبة، واللي شغله قريب من بيته، بالشكل كده هتضيف عليهم أعباء كبيرة مادية ونفسية عشان يتأقلموا في المكان الجديد.
– وبفرض إنه في مصلحة عامة تقتضي فعلًا إزالة مجموعة عمارات عشان يتعمل طريق أو محور أو غيره، فده مينفعش يبقا بالإجبار والإذلال، ده لازم يحصل تمهيد ليه قبلها بفترة طويلة عشان الناس ترتب أوضاعها، ولازم الدولة تتكلم مع الناس وتسمع كل مقترحاتهم وطلباتهم، ولازم الدولة تكون صريحة وواضحة في عرض خطتها الحقيقية للإزالة وسببها، هل فعلًا عشان طريق ولا هيتم ترك المساحة الجغرافية دي لمستثمرين بعينهم، ولازم لو الدولة هتقدم تعويضات تكون تعويضات عادلة تجيب شقة بنفس المستوى في مكان تاني، دا غير الأضرار النفسية والاجتماعية اللي قولنا إنها بتحصل من عملية النقل المفاجئ ودي تستحق لوحدها تعويض غير تمن الملك ! ودي أبسط حقوق الملكية الخاصة اللي المفروض بيحميها الدستور وبتحميها كل الدول اللي بتحترم شعبها !
– مش معقول كمان إنه قانون نزع الملكية الخاصة اللي تم تعديله في البرلمان السابق، يكون بيتنفذ بالطريقة دي، والمتضرر عليه يلجأ للقضاء لو مش عاجبه قيمة التعويض اللي هيتم إقراره ليه، وفي الأغلب الإنسان ده مش هيتم إنصافه ولا هياخد تعويض مناسب وهيبقى بيخسر وقت وفلوس على الفاضي ! دي طريقة استغلال وظلم مش طريقة تعويض عن حق.
********
– في تفسيرات كتير جدًا بتتقال عن الخطط اللي بتحصل في الوقت الحالي، وفيها تفسيرات مؤلمة جدًا، زي مثلاً إنه الدولة بتعمل الخطوات دي عشان الناس تزهق من السكن في القاهرة والجيزة وتروح تشتري في العاصمة الإدارية الجديدة عشان ترتاح من الاحتمالات دي كلها ! وده طبعًا شيء مخيف قوي لأنه البيوت مش مجرد شقق ولكن دي روابط اجتماعية، الناس بتسكن بإرادتها وبتختار المكان اللي يناسب إمكانياتها المادية والبيئة المحيطة بيه من خدمات، ليه أبقى مجبر أنقل مكان تاني وأفضل مديون في تمن التمليك بتاعه 20 و 30 سنة ؟!
– في تفسير تاني برضه أسوأ، إنه عدم توقف مشاريع الإسكان وتطوير الطرق هدفه غير المعلن هو الاستفادة بحجم الأعمال من أموال الدولة، المقاولين يستفيدوا، العمالة غير المنتظمة تشتغل، والهيئات المشرفة تاخد أرباح وأجور للمشاريع دي، وبيع الأراضي أو العقارات الجديدة تستفيد منه الدولة برضه، طيب ليه ده ميتعملش في الصحراء والأماكن غير المأهولة زي مشاريع الإسكان الاجتماعي ؟ ليه الدولة تهز استقرار الأسر دي وتدمره عشان يحصل تشغيل للناس ؟ ما إحنا مش معترضين إنه يبقى في مشروعات بنية تحتية تشغل العمالة وتحل أزمة إسكان الشباب المتوسط ؟ لكن بالطريقة دي مش منطقي اقتصاديًا ولا سياسيًا ولا اجتماعيًا !
– الخلاصة إنه مينفعش الأمور تمشي بالطريقة دي أبدًا ومينفعش كل الناس تكون حاسة بتهديد إنها هتلاقي تليفون يقولها عندكم اجتماع مع مسؤول عشان خطة التطوير هتشيل بيوتكم، أو يلاقي البلدوزر واقف قدامه بالفعل يشيل بيت أو محل أو مقبرة إنت بتمتلكها !
– نتمنى إنه يبقى في أي حد عاقل يقدر خطورة الكلام ده وخطورة تنفيذ حاجة بالشكل ده بدون تفاهم وحلول ترضي الناس، وياريت الدولة يظهر فيها حد يعلن تفاصيل الموضوع ده لأنها مش أسرار حربية دي حياة ناس وأسر وأهالي هيتم تغييرها لحساب ناس متعرفهاش، والمجتمع اللي بيتبني بالظلم ده هيبقى مجتمع مخيف جدًا، فياريت صوت العقل والمنطق يظهروا.
– وبنأكد إننا عرضنا اللي اتقال في وسائل إعلام والتضارب اللي فيه، والتفسيرات اللي ظهرت دي نتيجة مباشرة لغياب الشفافية الواضح في القصة دي تحديداً، نتمنى إن كل دا يقف ويتعالج بطريقة مناسبة تحفظ حقوق الناس.
*****
المصادر