ألف مبروك لأبطال مصر في أولمبياد البرازيل، وكل تمنياتنا ليهم بالنجاح والفرحة وتحقيق أرقام بيحلموا بيها..
الصورة اليمين لعفاف هدهد، أول مصرية في تاريخنا توصل لنهائيات لعبة الرماية (مسدس – ١٠ متر) ونتمنالها كل التوفيق، والصورة اللي ع الشمال لبطلة السباحة فريدة عثمان، اللي خرجت بنصف نهائيات السباحة لكن بعد ما سجلت السنادي رقم قياسي أفريقي جديد باسمها في سباق ١٠٠ متر فراشة.
كل التحية لأبطال مصر اللي وصلوا مكانهم بتعبهم واجتهادهم، رغم كل المعوقات سواء لنقص الاهتمام بأي رياضة إلا كرة القدم، أو لسوء الإدارة، زي ما حصل مثلاً مع بطل العالم في رمي الرمح إيهاب عبدالرحمن اللي تم استبعاده من البعثة بعد مشاكل مع اللجنة الأوليمبية! أو علاء أبوالقاسم بطل سلاح الشيش، الوحيد في بعثتنا اللي حقق ميدالية باولمبياد لندن ٢٠١٢، وكان مفروض هوا اللي هيشيل العلم لكن تم حرمانه بعد أن انتقد ملابس البعثة.
نتمنى نسمع كل خير عن مروان القماش في السباحة، وأحمد عبدالرحمن في الجودو، وفريق كرة اليد المتميز، وكل واحد من ال ٤٩ مصري اللي اتأهلوا.
ونتمنى ميحصلش زي أولمبياد سابقة نسمع بعدها للأسف ان البطل فلان اخد جنسية خليجية أو غربية عشان ملقاش الرعاية في بلده.
***
كل التحية والاحترام لبنات وشباب مصر في كل مكان، في العلم والبيزنس والرياضة والفن والتكنولوجيا وكل المجالات، بيكم بكرة أحسن، وبيكم بلدنا أجمل.. هنغير بلدنا للأفضل ان شاء الله، وهنخلي بلدنا قايمة على العدالة والكفاءة والكرامة واحترام حقوق الناس.
شجعو النماذج الناجحة الي تفوقت باجتهادها في كل المجالات، اتكلموا عنهم وعرفوهم اننا بنقدرهم..