كل عام وكل مصري ومصرية بخير بمناسبة انتصار أكتوبر العظيم، وكل عام وأبطالنا اللي شاركوا في الحرب بخير .. الحرب اللي كان أبطالها مئات الآلاف من المواطنين العاديين، اللي ضحوا بسنين من عمرهم، أو بحياتهم لتحرير الأرض وحفظ كرامة الوطن.
مع كل ذكرى قبل ثورة يناير، كان بيتم تلميع وتضخيم دور الرئيس المخلوع حسني مبارك، لأغراض سياسية وبسبب تمحور مؤسسات الدولة حوالين شخص الرئيس..
بشكل عام جزء كبير من اشكالية التاريخ في مصر، انه الدولة فقط تحدد الرواية الرسمية، وتحدد مين يتم التركيز على دوره ومين يتم تجاهله، وتقريبا بكل الأحداث بنعرف القائد أو الشخصية المشهورة وبيختفي صوت الملايين من العاديين اللي شاركوا او تأثروا. القادة العسكريين في الحروب خططهم وتصوراتهم مهمة لكن أكيد مش هما كل الصورة.
من أسبوع طلبنا من أعضاء الصفحة انهم يحكولنا عن شغلهم اليومي ووصلتنا مئات القصص اللي بتقولنا ان شعبنا شغيل، مكافح وبيحارب الصخر علشان أكل العيش.. والنهارده بننشر قصة من ضمن قصص آلاف المصريين اللي شاركوا في حرب أكتوبر.. قصة محمد أفندي العباسي اللي رفع علم مصر على خط بارليف –
كجزء من احتفالنا بأبطالنا العاديين.. اللي هما مش قيادات ولا مسؤولين في البلد.. عاوزينكم تكتبولنا عن أهلكم اللي شاركوا في الحرب.. جدك وعمك وخالك ووالدك.. اسألوهم اتجندوا امتى؟ كانوا بيحاربوا في أنهي سلاح؟ قصص معاناتهم وانتصاراتهم الصغيرة بعد تحرير سيناء.. قصص القادة العسكريين وزملائهم اللي استشهدوا.. عاوزين نقرأ مع بعض قصص المواطنين المصريين أبطال حرب أكتوبر..
