– فريق صفحة الموقف المصري بيهني المنتج محمد حفظي، والمخرج عمر سلامة علي مسلسلهم الجديد اللي هيعتمد على سلسلة ما وراء الطبيعة للكاتب الكبير د.أحمد خالد توفيق.
– الجديد هيتم تنفيذة بالتعاون مع نتفليكس، منصة المشاهدة الالكترونية الأكبر في العالم، ودا أول عمل مصري يتم إنتاجه لنتفليكس، وإنجاز كبير لفريق العمل ، وخطوة جديدة ومهمة لصناعة الدراما في مصر .
– أيضا لازم نهني أسرة الكاتب الراحل أحمد خالد توفيق ، اللي رغم شهرته وموهبته الكبيرة مفيش أي عمل روائي ليه تم تحويلة لعمل تلفزيوني أو سينمائي إلا بعد وفاته .
– مفيش اثنين من جيل الشباب المصري حاليا واللي عاش فترات شبابة أو مراهقته في التسعينات يختلفوا علي قيمة دكتور أحمد خالد توفيق و أثر كتابته علي غالبية الشباب اللي ليهم النهاردة علاقة بالكتابة أو الثقافة أو العمل العام.
– سلسلة ما وراء الطبيعة وبطلها رفعت إسماعيل اللي ساهم بشكل ما أو بأخر في أنه يحبب جيل كامل من المصريين في القراءة هيبقوا لأول مرة علي الشاشة ، ولكن للأسف بعد وفاة دكتور أحمد خالد توفيق .
– التقدير المتأخر لأعمال د. أحمد خالد توفيق من جانب صناع السينما والتلفزيون دا يستحق التهنئة ولكن في نفس الوقت يستحق التساؤل عن صناعة الدراما في مصر .
– في نفس الوقت اللي بنشوف فيه أعمال درامية وأفلام كاملة مقتبسة أو منحوتة بالبلدي من أفلام أجنبية ومسلسلات، في تجاهل تام لتراث روائي كبير وغني في الأدب العربي عموما والأدب المصري خصوصا. وتجاهل لكتاب كبار وأعمال أدبية كبيرة في مقابل مستويات سيئة من الكتابة الدرامية اللي موجودة دلوقتي .
– مع ذلك الناس هتفضل فاكره أحمد خالد توفيق، زي ما فضلت فاكره نجيب محفوظ وأم كلثوم وغيرهم كثير من المبدعين، وخلينا دائما نفتكر أنه الفن الجيد والأدب الجيد هو ما يبقي وانه ما دون ذلك مصيره في النهاية إلي زوال.
– مبروك لكل صناع المسلسل مرة تانية، ولأسرة دكتور أحمد خالد توفيق ونتمني التجارب اللي زي دي تكون بداية لأعمال كتير بمستوى فني أفضل للدراما المصرية.
سلسلة ما وراء الطبيعة تتحول لمسلسل علي نتفليكس .. تهنئة واجبة
