النهاردة 21 مارس عيد الأم، وكل سنة وكل أمهاتنا وأهلنا بخير.
– للأسف في مناسبة سعيدة زي دي مضطرين نحكيلكم قصة حزينة جدا للصورة اللي قدامنا دي .. دي عيلة أمريكية في نيوجيرسي مات منها ٤ أفراد، و٣ تانيين في المستشفى منهم اتنين بحالة حرجة، كلهم بفيروس كورونا، بسبب انهم عملوا تجمع عائلي واتعشوا سوا!
– العيلة خسرت الجدة كان عمرها 73 سنة، وكمان اتوفت بنتها واتنين من اولادها كانت أعمارهم في الخمسينات، غير تلاتة تانيين من أولادها في المستشفى، والسلطات الأمريكية فرضت حجر صحي على 20 فرد من الأسرة لحين ظهور نتائج التحليل.
– كل ده حصل لإن العيلة الكبيرة اتجمعت يوم ٣ مارس على العشا، وشخص واحد بس نقل الفيروس للكل، ومكانش حد يعرف خالص لأنه بيتنقل في الأول بدون أي أعراض وبيظهر بعد فترة توصل لأسبوعين.
– إيطاليا امبارح سجلت رقم قياسي ٦٢٧ حالة وفاة في يوم واحد! ووفيات ايطاليا وصلت ٤٠٣٢، غالبيتهم العظمى من كبار السن للأسف، وأحد التفسيرات المحتملة إن العائلات الإيطالية اللي بتمتاز انها بتعمل تجمعات عائلية كبيرة اتنقل فيها الفيروس من الشباب للكبار.
*****
– في بلدنا كتير من كبار السن معرضين لمخاطر أكتر بسبب انتشار الأمراض المزمنة زي الضغط والسكر عندنا، وبالفعل الحالات التمانية اللي اتوفوا في مصر أغلبهم فوق الستين.
– عشان كده بننصح كل الناس محدش يعمل أي تجمعات عائلية كبيرة بمناسبة عيد الأم،، وتقليل أي تواصل ممكن تجنبه مع كبار العيلة.
– لو انتا طبيعي عايش مع أهلك في البيت خد احتياطاتك واحتفلوا سوا، لكن لو انتو مش عايشين سوا ياريت تهني ست الحبايب بالتليفون، وقولها ان ده لمصلحتها ومصلحتك لإنك متعرفش جايز انتا حامل الفيروس وانتا مش عارف.
– الكلام ده أهميته تزيد في المحافظات اللي ظهرت فيها حالات إيجابية.
– بنكرر تاني انه المرحلة الحالية في مصر خطيرة جدا، وكل واحد عليه مسؤولية، محدش ينزل من بيته أبدا الا لسبب قهري زي مصدر رزقه الوحيد أو بيشتري أكل، لا قهاوي ولا مولات ولا أفراح ولا جنازات ولا مساجد أو كنائس.
– وأكيد الكلام ده تزيد اهميته في حالة كبار السن اللي هما فئة مفروض تخضع للعزل المنزلي الكامل، انصحوهم وكلموهم عن ضرورة ده رغم انه مؤلم وصعب، ولازم الحرص انهم ميتعاملوش مع أي حد إلا أقل عدد ممكن، وياريت كل عيلة تبقى محددة مين الأشخاص دول واحتياطاتهم.
– خليكو في البيت واحموا آبائكم وأمهاتكم، وأعمامكم وعماتكم، وخيلانكم وخالاتاكم، وأجدادكم وجدادتكم. فكروا فيهم دايما ومحدش يشيل ذنب انه نقل الفيروس لحد منهم، ونتمنى اننا سوا هنعدي الوقت الصعب ده وهترجع كل حاجة زي الأول، وهنحتفل مع لمة العيلة في عيد الأم اللي جاي.
