– يوم الأحد اللي فات، أحال رئيس البرلمان مشروع قانون جديد تقدم به 60 نائب لمكافحة التدخين في مصر.
– الهدف المعلن من المشروع هو استبدال قوانين التدخين القديمة اللي بقالها كثير ومش مجارية للتطورات اللي بتحصل في طرق التدخين.
– فلسفة القانون جيدة جدا، وتستحق الإشادة لأنه التدخين وبعد كل السنين دي ما زال مشكلة كبيرة بيعاني منها المجتمع المصري.
– إيه أهم مواد مشروع القانون؟ وليه القانون مهم؟ وإزاي الحكومة والمجتمع ياخدوا خطوات أفضل في سبيل تقليل نسب التدخين؟
****
إيه أهم مواد مشروع القانون؟
مشروع القانون جه في 19 مادة، منهم كثير مواد إيجابية زي:
1- المادة 6 اللي بتحظر التدخين في وسائل النقل العام ومختلف المنشآت الصحية والتعليمية والمصالح الحكومية والأندية ومراكز الشباب ودور العبادة، والقانون بيعاقب في المادة 17 منه اللي يخالف العقوبة بغرامة حبس لمدة لا تتجاوز أسبوع وغرامة من 100-500 جنيه.
2- المادة السابعة اللي بتحظر إعلانات الترويج للتدخين وأي نوع منه سواء سجائر تقليدية أو إلكترونية.
3- المادة 3 و4 بتحظر استيراد السجائر غير المطابقة للمواصفات القياسية اللي بتحددها وزارة الصحة والصناعة. وبتحط عقوبات مغلظة في المادة 16 منها غرامات تصل لـ10 آلاف جنيه والحبس لمدة لا تزيد عن سنة.
4- المادة التاسعة اللي بتحظر بيع السجائر بأي نوع لمن هم دون 18 سنة.
5- المادة العاشرة اللي بتحظر التدخين في الأماكن العامة والمغلقة، والأماكن اللي يصدر لها قرار من وزارة الصحة ، وأيضا بتعاقب المدير المسئول عن المكان بغرامة من 1000- 20 ألف جنيه لو لم يطبق منع التدخين، وبتعاقب المدخن بغرامة 100-500 جنيه.
6- المادة رقم 11 واللي يتحظر التدخين في السيارات الخاصة في حالة وجود طفل أقل من 18 سنة في السيارة.
7- من الأشياء الإيجابية في القانون هو وضع عقوبة على استيراد الحلوى ولعب الأطفال اللي بتبقي شبه السجائر لأنه ده بيخلي الأطفال الصغيرة تتأقلم مع فكرة أنه السجائر حاجة عادية.
8- المادة 13 من القانون بتنص على أنه حصيلة الضرائب على السجائر توجه للرعاية الصحية، وده بالمناسبة نص قانوني موجود في أكثر من قانون منهم التأمين الصحي، لكن للأسف لا توجه كل حصيلة الضرائب على السجائر للاستثمار في الرعاية الصحية خاصة بناء المستشفيات والأجهزة.
– السنة اللي فاتت مثلا ضرائب السجائر كانت 74 مليار جنيه في حين أنه مخصصات وزارة الصحة كانت 108 مليار وحوالي نصهم بيروح للأجور، وبالتالي الانفاق الاستثماري على الصحة أقل من الحصيلة الضريبية للسجائر سنويا، رغم إن السجائر بتأثر بشكل مباشر في صحة المصريين بتكلفة ضخمة سنويا.
****
ليه ده قانون مهم؟
– القانون ده بيغلظ العقوبات على التدخين في الأماكن العامة، وبيساهم في أننا نفكر في معايير صحية أفضل وخاصة للأطفال تحت الـ 18 سنة اللي مهم جدا يتلحقوا قبل التدخين.
– منع التدخين في السن الصغير ده مهم جدا لأنه في الغالب ده السن اللي الشباب بيبدأوا فيه التدخين وبيبقى صعب بعد كده يبعدوا عنها.
– التدخين ما زال مشكلة كبيرة في مصر، بحسب أرقام الجهاز المركزي للتعبئة والإحصاء نسبة المدخنين في مصر حوالي 17.7 %من إجمالي السكان فوق سن 15 سنة، وده يعني حوالي 18 مليون مصري مدخنين.
– طبعا نسبة التدخين بين الذكور في مصر 35.6% وهي نسبة مرتفعة جدا، ويمكن كمان يكون الأرقام أكبر من لأنه في مدخنين للأسف في مصر أقل من 15 سنة، ومبيتمش رصدهم بدقة.
– ظاهرة التدخين في مصر ظاهرة مرتبطة بالذكور بالأساس، ومرتبطة بالفقر والضغوط الحياتية، عشان كده في مصر هنلاقي أنه نسب التدخين بتتراجع بين الحاصلين على الشهادات الجامعية وبتزيد في وسط الأقل تعليما من الأميين وأصحاب المؤهلات الأخرى.
– وأيضا لأنها ظاهرة مرتبطة بالضغوط هنلاقي أنه أكبر نسبة مدخنين في مصر في الفئة العمرية ( 45- 55) سنة، ودول في الغالب بيكونوا أباء وأرباب أسر بيدخنوا بسبب عوامل كثير منها الضغوط الاقتصادية.
****
ايه اللي المفروض يحصل أكثر عشان نحارب التدخين؟
– الدولة عليها دور مستمر في حملات التوعية عبر الإعلانات التليفزيونية وفي الصحف والجرائد عن أضرار التدخين وخاصة التدخين السلبي على صحة الأطفال والأسرة بشكل عام.
– وده لأنه القانون بيعاقب على التدخين في الأماكن العامة لكن مفيش قانون يقدر يعاقبك على اللي بتعمله في بيتك مثلا، بالتالي التدخين السلبي لازم يكون على رأس أولويات الخطاب الإعلامي في مكافحة التدخين، واللي هو مفروض كمان يتطور وميبقاش حبيس إعلانات التسعينات.
– أيضا توجيه جزء من حصيلة الضرائب على السجائر لإنشاء مراكز متخصصة في التأهيل وعلاج إدمان النيكوتين تكون متاحة لأي حد بدون مقابل مادي كبير يعني عايز يتعالج من التدخين.
– أيضا ممكن يكون للدولة دور مهم عن طريق تنظيم زيارات توعوية للمدارس والجامعات للتوعية بأخطار التدخين، وتنظيم مسابقات رياضية ليها جوائز كبيرة للحث على ممارسة الرياضة من سن صغير والبعد عن التدخين.
– لازم الدولة تتيح أدوية الإقلاع عن التدخين وغيرها بأسعار مدعمة للناس اللي عايزة تقلع عن التدخين.
– بالإضافة لكل اللي فات في ملفات تانية لازم الدولة تهتم بيها لو عايزه تحارب التدخين وتروج لنمط حياة صحي، زي توفير مساحات عامة خضراء في المناطق الفقيرة لممارسة الرياضة، ودعم الأنشطة الرياضية في الأماكن دي وتفعيل دور مراكز الشباب.
– دلوقتي خدنا خطوة تشريعية ممتازة، منتظرين إنها تطبق على الأرض وميكونش فيه تهاون أو “تكبير دماغ” من أجهزة إنفاذ القانون في تطبيق القوانين الخاصة بالتدخين، وخاصة في الأماكن العامة وغيره.
– وزي ما الدولة عليها دور رقابي وتوعوي في ملف التدخين المجتمع أيضا له دور، الآباء لازم يبطلوا يدخنوا جوه المنازل قريب من الأطفال الصغيرين كأضعف الإيمان لو مش عارفين نتوقف عن التدخين.
– لازم يكون في وعي أكبر من الناس واللي في الغالب كلها عارفة مشكلات التدخين لكن للأسف مش بتطل لأسباب كثيرة، لازم يكون في إرادة فردية عند الناس دي لأنها تقلع عن التدخين.
– التدخين هو أحد أهم أسباب الوفيات المبكرة في العالم، ونسب تدخين مرتفعة تعني إنتاجية أقل بالتالي الدولة ومنظمات المجتمع المدني والأفراد لازم يكون لهم دور أفضل في حل المشكلة دي.
– نتمنى القانون الحالي يكون خطوة بداية نبني عليها في القادم في ملف القضاء على التدخين في مصر.
****
المصادر