– الفيديو الفضيحة ده اللي بيتكلم فيه هوا ياسر عمر، أمين عام حزب مستقبل وطن في أسيوط، بيقول في مؤتمر للناس بالنص: “إحنا دولة مش حزب .. هوا ده مستقبل وطن عشان تبقو عارفين!”
– هددهم بإن “البلد اللي هتصوت للحزب بالكامل هتاخد حقها بالكامل، والبلد اللي مش هتصوت للحزب حقها هديه للبلد اللي جنبها!” وقال إن ده هيحصل في البرلمان وكمان في انتخابات المحليات الجاية، وقال كمان “التنظيم بتاعنا مسيطر على المحافظة بالكامل”
– المؤتمر ده في قرية بني محمد بمركز أبنوب، ضمن الدائرة الثانية بأسيوط وليها ٣ نواب، بيؤكد انه لازم التلاتة مرشحي الحزب هما اللي يفوزوا وقالهم “آخد وعد من بني محمد إن الضربة القاضية للمستقلين تبدأ من هنا!”
– من غير الفيديو ده مصر كلها شايفة إنه بالأمر الواقع ده بقى نسخة الحزب الوطني الجديدة بنفس ممارساته الفاسدة بالظبط، وبنفس دور الأجهزة الأمنية والحكومية في صناعة الحزب وإنجاح مرشحيه ومعاقبة اللي يعاديه، لكن كانو بيفضلو يقولو كلام عن الدستور والحريات وحق المواطنين لكن دلوقتي معادوش محتاجين يقولو وبقت عيني عينك كده “إحنا دولة مش حزب!”
– لو كان في بلدنا دولة قانون واحترام للمواطنين كان على الأقل الكلام ده ميعديش بدون محاسبة قانونية وسياسية وإعلامية، لكن مش متوقع للأسف.
– أقل فعل إيجابي نعمله لحفظ كرامتنا كمواطنين هوا اننا نعمل اللي بايدنا وننتخب اللي نشوفه كويس، مهما كانت النتيجة اللي هتتعلن بعدها.
*****
