وداعاً فاروق الفيشاوي .. رحيل فنان مبدع وإنسان صادق

– فريق صفحة الموقف المصري بينعي لكل المصريين وفاة الفنان المصري فاروق الفيشاوي.
– الفنان توفي بعد صراع مع مرض السرطان واللي كان أعلن عن اصابته بيه من عشر شهور بخفة روحه المعهودة من على منصة مهرجان الإسكندرية للسينما.
– فاروق الفيشاوي كان تعهد لجمهوره وزمايله ساعتها انه حيهزم مرض السرطان، لكن للأسف المرض هزمه في النهاية واتوفى انهردة في المستشفى.

****
– فاروق الفيشاوي اتولد سنة 1949 في مدينة سرس الليان محافظة المنوفية، انتقل للقاهرة بعدها ودرس في كلية الآداب جامعة عين شمس، وبعدين درس في المعهد العالي للفنون المسرحية.
– الفنان الراحل شارك في أعمال سينمائية مخلدة في ذاكرة المصريين زي “الحب في طريق مسدود” و”الباطنية” و”المشـبوه” و”أرجوك أعطني هذا الدواء” و”لا تسألني من أنا” و”القرداتي” و”الجاسوسة حكمت فهمي”، و”حنفي الأبهة” و “ياتحب ياتقب”.
– وفي أعمال تلفزيونية زي “ليلة القبض على فاطمة” و”على الزيبق” و”زينات والثلاث بنات” و”ألف ليلة وليلة” و”دموع صاحبة الجلالة”.
– فاروق الفيشاوي كان فنان موهوب جداً، وللأسف بوفاته ووفاة عزت أبو عوف، وجميل راتب، ومحمود عبدالعزيز، وأحمد زكي، ونور الشريف وغيرهم في السنين الأخيرة بتخلي الفن في مصر يفقد كتير جداً من قيمته ومن فكرة الفنان المثقف والمتابع لقضايا بلده وعنده إيمان بأفكار في السياسة وفي المجتمع وإدراك لأهمية وظيفته في تشكيل الوعي وتقديم قضايا اجتماعية في عمله الفني مش مجرد الجري ورا الفلوس وبس.
**********
– برغم إنه اللي قدمه فاروق الفيشاوي كفنان موهوب يخليه موجود في ذاكرتنا، لكن كمان عمل بعض المواقف السياسية اللي فيها انحياز للعدالة الاجتماعية والديمقراطية.

– قال قبل كده “إن ثورة 25 يناير في قلبي وعقلي ودمي، 25 يناير هي الثورة الحقيقية المصرية، التي سنحتفل بها ما دمنا على قيد الحياة، وسنعلم أولادنا أن ثورة 25 يناير هي الثورة الحقيقية في هذا الوطن، وستأتي 25 يناير وسنرفع رؤوسنا فخورين بما فعله رجل الشارع المصري فيها” وده اللي خلى كتير من إعلاميين السلطة وقتها يهاجموه بشدة.

– وفي سنة 2014 انضم لحملة حمدين صباحي ودعمه في مواجهة الرئيس السيسي، وقال وقتها نصاً: ” المصريين مش محتاجين حد يقولهم يشتغلو أكتر، المصري بيشتغل شغلانة واتنين، والفلاح بيصحى من الفجر ويجري عالغيط وياكل الفول في الطبق الصاج والعيش في المنديل المحلاوي ويسعى على أكل عيشه، اللي ميعرفش ده وبيقول الناس محتاجة تشتغل، يبقى ميعرفش الشعب المصري” وده كان رد على كلام قاله المرشح السيسي وقتها عن إنه مشكلة المصريين إنهم مبيشتغلوش.

– قال قبل كده في برنامج وفي 2016 صرح في في المهرجان الدولي للفيلم العربي في وهران “بأنه مش ضد السيسي لكنه ضد نظام الحكم العسكري.” وإنه بيتمنى لمصر حكم “مدني”. وأعلن اعتراضه على قرض صندوق النقد الدولي الاخير لمصر.
– كان له مواقف انسانية كتير، واكتر من فنان اتكلموا عن وقوفه مع حقوق العمال البسطاء في أماكن التصوير.
– ربنا يرحمه كان شخص جميل ومبهج، ومتصالح مع نفسه ومع قناعاته وأخطاؤه اللي اعترف واعتذر عن بعضها علنا، بنكرر عزائنا مرة تانية لكل المصريين في وفاة الفنان فاروق الفيشاوي، ونتمني لأهله وعيلته الصبر والسلوان .