– للأسف لاقينا صور من يوم بتقول إنه بدأت أعمال هدم قصر أندراوس في الأقصر من قبل مسئولين محافظة الأقصر، القصر اللي موجود من سنة 1897 وهو أحد أهم التحف المعمارية في مدينة الأقصر، وشاهد مهم على الحركة الوطنية في المدينة وفي مصر بشكل عام بيتم هدمه بحجة أنه آيل للسقوط.
– الخبر ده كان حزين لكثير من المصريين وخاصة المختصين في الآثار، لأنه سبق في 2009 هدم القصر الأول من قصور أندراوس اللي كان ملاصق للقصر ده بعد رفض من المختصين.
– ايه قصة القصر ده؟ ليه مهم؟ وليه محافظة الأقصر هدمته؟ والأهم ليه طريقة التعامل مع التاريخ بتاعنا بقت كدة وخاصة أنه القصر مش الحالة الأولى، لأننا شوفنا حالات تانية كتير كان عليها جدل على مواقع التواصل أخرها كان هدم جزء من جبانة المماليك التاريخية أثناء توسعة محور الفردوس، وبين نفي رسمي وتأكيد من مختصين.
*****
ايه قصة القصر؟
– قصر أندراوس هو واحد من أهم القصور في الأقصر لدرجة أنه كان بيتم تسميته ببيت الأقصر الكبير في الأعمال الأدبية زي رواية بنفس العنوان للأديبة المصرية الفرنسية فوزية أسعد.
– قصر أندراوس كان عبارة عن قصرين واحد لتوفيق أندراوس، ودا يعتبر واحد من قيادات الحركة الوطنية في ثورة 1919، وواحد من أكبر الإقطاعيين في الصعيد اللي كانوا داعمين للثورة في 1919 لدرجة أنه استضاف سعد زغلول في بيته في 1921 بعد منع الحكومة والإنجليز له من القيام بجولة في الصعيد.
– أما القصر الأخر فهو قصر يسي أندراوس والد توفيق واللي كان واحد من الإقطاعيين واللي كان قنصل فخري لفرنسا وبلجيكا وكان داعم للاستقلال المصري في 1919.
– قبل كدا في 2009 اتهدم القصر الأول بتاع توفيق أندراوس واللي بحسب سمير غريب رئيس جهاز التنسيق الحضاري السابق إنه المحافظة كانت عايزة تهدم القصر لكن لجنة من وزارة الثقافة رفضت الأمر.
– لكن المحافظة أصرت على هدم القصر وشكلت لجنة تانية مكونة من مهندسين بس مش خبراء في الآثار، وهدمت بالفعل القصر بناء على تقرير لجنة المهندسين بأنه قصر آيل للسقوط وبالتالي تم هدم القصر الأول.
– المثير بقى ساعتها أنه المحافظ لما اتسأل ليه سبت القصر التاني قال أنه سابه عشان يبقي نموذج للتراث المعماري في تلك الفترة الزمنية، ومع ذلك دلوقتي المحافظة نفسها قررت هدم القصر التاني.
*****
ليه القصر التاني بيتم هدمه دلوقتي؟
– علي عكس ما حدث في 2009 مفيش أي كلام عن لجنة اتشكلت من هيئة التنسيق الحضاري واللي هي تابعة لوزارة الثقافة واللي المفروض القصور اللي زي دي تابعة ليها لأنها مش آثار إسلامية أو فرعونية أو قبطية قديمة تابعة لوزارة الآثار.
– وبعدها يطلع المهندس محمد أبو سعده رئيس الجهاز القومى للتنسيق الحضارى يقول قصر أندراوس لم يكن مسجلا في الجهاز، طيب ليه مكنش مسجل، وليه كان فيه ممثل من الجهاز في اللجنة اللي اتشكلت لبحث هدم القصر الأول، وأوصت بعدم هدمه، ومين مسؤول عن الحاجات دي ضمن البيروقراطية اللي قررت تهدم جزء من التاريخ بلا حساب؟
– الغريب أكتر إن قرار الهدم جاء على خلفية صدور قرار من وزارة الآثار بنزع ملكية القصر اللي تجاوز عمره 120 عامًا، لحجبه بانوراما معبد الأقصر من الجانب الغربي ناحية النيل، يعني وزارة الآثار كانت بتحرض على هدم القصر ولا ايه؟، طيب مين مفروض يطالب بالحفاظ على التاريخ والآثار؟
– خطابات كتير من السياحة والآثار ومفتشى معبد الأقصر، كانت بتوصل إن القصر تعرض لأضرار جسيمة جراء أعمال التنقيب عن الآثار أسفله خلال الفترة الماضية، وأصبح معرضا للسقوط والانهيار فى أى وقت، نتيجة ظهور شروخ عديدة فى جدران القصر المكون من طابقين وعبارة عن مبنى على 509 أمتار بطراز قديم.
– بالتالي المحافظة بتقول أنها بتهد البيت مرة لأنه بقى آيل للسقوط بحسب لجنة من المهندسين شكلتها المحافظة، وبالتالي بيهدد أرواح الناس أنه يقع يعني، ومرة الهدم بيتقال عليه كجزء من تطوير محور طريق الكباش اللي بيتعمل دلوقتي.
– لو القصر فعلا آيل للسقوط بحسب كلام المحافظة لأنه في منقبين غير شرعيين عن الآثار كانوا بيحفروا تحت القصر، وبالتالي بقى وضعه كدا فدي مشكلة كبيرة أنه وزارة الثقافة أو السياحة لم تتحرك لترميم القصر خاصة بسبب قيمته التاريخية، وليه وزارة الداخلية مأمنتش القصر بالشكل الكافي.
– ولو الهدم جاي عشان تطوير محيط طريق الكباش فمفيش أي وجاهة يعني في هدم قصر تاريخي بالعكس ترميمه وتحويله لمتحف للمقتنيات من العصر ده هو شيء يكون مفيد للتطوير ويجذب سياحة أكثر للمنطقة.
– القصر بيقع على النيل مباشرة، ومواجه لمعبد الأقصر، وهو بالفعل كان مسرح لعمليات التنقيب غير الشرعي عن الآثار، واللي يقال أنها تسببت في مقتل صوفي أندراوس ولودي أندراوس بنات توفيق أندراوس في 2013 في القصر.
– لكن مش عشان القصر كان مسرح غير شرعي للتنقيب عن الآثار فيتم هدمه، لأن من 2013 والقصر مغلق تقريبا بدون حراسة، ومع ذلك تم القبض في 2020 على عصابة تنقيب عن الآثار من القصر.
– يبدو أنه المحافظة حاليا بتستخدم مبرر أنه القصر يعني بيتعدى على حرم معبد الأقصر وهو شيء غير منطقي بحسب الدكتورة سهير حواس أستاذة العمارة والتصميم العمراني بكلية الهندسة جامعة القاهرة واللي قالت “لو كان هذا مبرراً للهدم فهذا معناه هدم مسجد أبو الحجاج الواقع داخل معبد الأقصر، لكن هذا غير ممكن، لأن القصر والمسجد أصبحا جزءاً من الطبقات التاريخية للمكان وليس تعدياً عليه”.
– بالمناسبة يعني بنفس المنطق ممكن كمان شوية نلاقي الحكومة بتقول إنها هتهد مسجد أبو الحجاج واللي بالمناسبة بننصحكم تروحوا تشوفوه لأنه تحفة معمارية في قلب معبد الأقصر وفيه جو حلو جدا لأنه في مقام لراهبة قبطية وقصته التاريخية جميلة وفي مولد سنوي صوفي بيتعمل فيه.
*****
ايه اللي ممكن نشوفه في كل ده؟
– كل موقع تاريخي في مصر له نسيج خاص به، نسيج تاريخي بيكمل بعضه وبيحكي صورة أوسع لتاريخ غني زي التاريخ المصري بالتالي مفيش منطق من هدم قصر زي ده بدعوة أننا بنطور طريق لمعبد الأقصر.
– لأنه الحاجات دي بتكتسب قيمتها من التاريخ، ده قصر كان شاهد على جزء مهم من تاريخ مصر، كان قصر لقيادة وفدية مهمة في تاريخ البلد، وزاره زعيم وطني مهم زي سعد زغلول وشخصيات تاريخية كثيرة منها مثلا الإمبراطور الإثيوبي.
– بالتالي التاريخ ده لازم يظل موجود، هدم التاريخ لأي سبب غير مبرر حتى لو لغرض التطوير، بنشوف في كل العالم الدول بتحافظ على تاريخها إزاي، لو القصر ده بره كان تحول لمتحف محلي واتخصصت له ميزانيات وتم الصرف عليه، وده ببساطة لأنه الدول بتهتم بتاريخها لأنه له قيمة كبيرة معنويا.
– للأسف بإزالة القصر ده بيتشال جزء مهم من تاريخ مدينة الأقصر الحديث، واللي كان المفروض أهلها يتعلموا عنه ويعرفوه بدل ما يتم طمس ملامحه بدون أي دراسة وبدون أي مراعاة لقيمة قصر مهم زي ده.
– القصر كان ينفع يترمم ويتم حمايته من أي تعدي، لكن للأسف فيه حد أخد الطريق الأسهل وهو الهدم.
– دا بشكل واضح “جريمة” في حق تاريخ وتراث البلد دي، لازم يتم التحقيق فيها ومحاسبة المسؤول عنها، ولا يجب ألا تمر وتوصل لأعلى مستوى.
– كل المبررات وتبادل الاتهامات بين الجهات الرسمية لن تنفي إن اللي حصل دا انتهاك غريب إن تكون مؤسسات في الدولة هي المسؤولة عنه.
– كل دا بيحصل في وقت الدولة بتحاول تقول إنها مهتمة بالتاريخ والتراث، وفيه رعاية من رئيس الجمهورية لاحتفالية نقل المومياوات، طيب مش المفروض يبقى الموضوع دا مشروع إستراتيجي وشامل للاهتمام بالتراث والتاريخ وآثار البلد.
– نتمنى الأشياء اللي بتكرر الفترة الأخيرة دي تتوقف ومؤسسات الدولة تفهم في النهاية أنه الحفاظ على التاريخ المصري قيمة أساسية، والحفاظ كمان على تنوع التاريخ ده قيمة مهمة جدا.
*****
المصادر