د.أحمد اللي آثار كتابته فوق الوصف، وليه فضل على الغالبية الساحقة من الشباب اللي ليهم النهاردة علاقة بالكتابة أو الثقافة أو العمل العام.
رجل واحد عايش في مدينة طنطا البعيدة عن مركز القاهرة، وبدون أي دعم حكومي، قدر يحقق انجاز هائل في نشر الثقافة والقراءة والمعرفة، وكمان في نشر الانحياز لقيم زي الحريات والانسانية وتقبل الآخر والتفكير العلمي.
ربع قرن من الكتابة بكل أشكالها، سلاسل روايات الجيب وقصص قصيرة وروايات طويلة وترجمات للأدب العالمي ومقالات في كل المواضيع تشمل السياسة والفن والتاريخ والموسيقى والعلم.
وكمان ربع قرن من التواصل الإنساني المحترم مع كل اللي بيحبوه .. كان دايماً عند حسن ظن أولاده بيه، دايماً متواضع، ودايماً ثابت على المباديء اللي علمهالنا.
كل الشكر للدكتور أحمد .. هنفضل فاكرينك (حتى تحترق النجوم كلها).
حتى تحترق النجوم، وحتى تفنى العوالم..
حتى تتصادم الكواكب، وتذبل الشموس..
وحتى ينطفئ القمر، وتجف البِحار والأنهار
*****
رابط مدونة تجمع أرشيف مقالات د.أحمد خالد توفيق: