تحية واجبة لأبطال منتخبنا المصري لكرة اليد رغم الخروج من منتخب الدنمارك في كأس العالم، أداء أسطوري مشرف أمام بطل العالم بلا خوف من أي فوارق.
فريقنا البطل قدم مباراة من أروع مبارياته في البطولة بل ممكن نقول في تاريخ كرة اليد المصرية كله، وكان ند للدنمارك (بطل كأس العالم النسخة الماضية) لآخر ثانية في المباراة.
منتخب مصر لكرة اليد يستحق الدعم والتشجيع لأن كل نجومه كانوا مثال يحتذي به للمسؤولية والعمل الجاد في ظروف صعبة وقلة إمكانيات، ورغم كده قدروا يكون من الـ8 الكبار في عالم كرة اليد.
مشاهد حزن اللاعبين بعد مباراة الدنمارك أثرت فينا كلنا، ودا يخلينا نقولهم شكراً إنتو كنتم فخر لمصر والمصريين، وبنتمنى لكم كل التوفيق في اللي جاي.
الحقيقة إن المستوى المميز اللي ظهر بيه منتخبنا نقدر نشوفه امتداد لإنجازات كرة اليد المصرية مؤخراً بعد ما شوفنا منتخب اليد المصري للناشئين أبطال كأس العالم لأول مرة في التاريخ عام 2019 في مقدونيا، وإنجازات تانية ممكن ميكونش في ناس كتير بيسمعوا عنها نظراً لأن الاهتمام الإعلامي بكرة اليد أقل بمراحل من كرة القدم.
الرياضة ومنظومتها بقت شيء مهم في كل بلد، ومنظومة كرة اليد المصرية محتاجة كل الاهتمام والرعاية وتسليط الضوء الإعلامي في ظل الإنجازات اللي بتحصل بأقل الإمكانيات.
