– بدأ معرض القاهرة الدولي للكتاب السنة ده بدري عن المعاد المعتاد بتاعه، ومكان مختلف جديد عن مكانه التاريخي (أرض المعارض في صلاح سالم).
– بعد أسبوع كامل على افتتاح المعرض أغلب آراء الناس اللي راحت مبسوطة من المكان الجديد من ناحية التنظيم والنظافة ووجود استراحات والتنقل داخل المعرض نفسه، وفي المقابل فيه اعتراضات على المكان الجديد في التجمع بسبب ابتعاده عن المواصلات وعن خطوط المترو عكس المكان القديم، وكمان حصلت خلافات مع تجار سوق الأزبكية انتهت بانسحابهم من المعرض كله وتنظيمهم معرض منفصل، ده غير الكلام حول أسعار الكتب السنادي.
– كانت فكرة الهيئة العامة للكتاب بتوفير اتوبيسات للمعرض كويسة جداً، والخطوط بتوصل لأرض المعارض القديمة ولميدان عبدالمنعم رياض والمعادي والجيزة والنزهة الجديدة والعباسية، ومستوى الأتوبيسات ده كويس في النظافة والأسعار وبعضها كان متوافر فيه واي فاي كمان.
– مستنيين العدد اللي هيتم الاعلان عنه في نهاية المعرض من الزوار، في 2017 زار المعرض تقريبا 4 مليون، و2018 وصل العدد ل 4 مليون ونص، والأهم من عدد الزوار هو العدد بتاع الناس اللي بتشتري كتب فعلاً والشرائح العمرية بتاعتهم، بحسب كافة الناشرين فمعدلات الشباب عالية جداً وده منعكس في نوعية الكتب والكتاب اللي بيحققوا مبيعات.
– نتمنى طبعاً إنه الإقبال يزيد ومعدلات القراية تكون أكتر رغم الظروف الاقتصادية الصعبة اللي بيعاني منها أغلب المصريين، القراية من أهم أسباب للتغيير للأفضل في المجتمعات، وظاهرة زيادة الإقبال من الشباب على الكتابة والقراية بالسنوات الأخيرة إيجابية جدا، مهما كان في مصر من تضييق على حرية البحث والتفكير لكن استمرار الحركة ده كويس جداً.
