– فريق صفحة الموقف المصري بيقدم خالص التهنئة للفنان المصري مصطفي سعيد، عن فوزة بجائزة الأغا خان الدولية للإبداع الموسيقي.
– مصطفي فاز بالجائزة في فئة الأداء الموسيقي بعزفه للعود، بإجماع لجنة التحكيم بعد منافسة مع 14 موسيقي ومغني من الهند وإيران وفلسطين وباكستان وتركيا ولبنان وسوريا.
– الجائزة استلمها مصطفي سعيد يوم الأحد اللي فات 31 – مارس في العاصمة البرتغالية لشبونة، في حفل حضرة أكثر من 1500 فرد، وسلمة الجائزة الرئيس البرتغالي مارسيلو دي سوزا والأغا خان.
– الغريب أنه مفيش أي إشارة في الإعلام المصري للانجاز المهم اللي رفع بيه مصطفى اسم مصر في المجال ده، ومش واضح هل لنقص الاهتمام بشكل عام ولا بسبب أغانيه المنحازة للثورة خاصة في 2011 وكلنا فاكرين “يا مصر هانت وبانت وكلها كام يوم”؟
*****
مين هو مصطفي سعيد؟
– مصطفي هو عازف وملحن ومغني وباحث في الموسيقي، حاصل علي درجتين ماجستير من جامعة الأنطونين في لبنان عام 2009 و 2010 علي التوالي.
– مصطفي شغال دلوقتي مدير مؤسسة البحث والتوثيق في الموسيقى العربية في بيروت، أيضا شغال كمحاضر زائر في العديد من الجامعات في ألمانيا واليابان والإمارات وغيرها.
– من بدايه شغله في الموسيقي من 15 سنة قام بجمع وتوثيق أكثر من 500 مقطوعة موسيقية وأغنية كانت تعتبر مفقودة من تراثنا الموسيقي الشرقي
– من 15 سنة وهو في سن 22 سنة بدأ مصطفي رحلته مع الموسيقي الشرقية وأسس فرقة ” اصيل” سنة 2003، واللي قدم من خلالها شغله الموسيقي وكذلك أغان ومقطوعات من التراث الموسيقي المنسي.
– لما حصلت الثورة في 2011 مصطفى اتعرف بشكل شعبي أكتر ببعد ظهوره على مسارح ميدان التحرير، وغنائه من كلمات تميم البرغوثي أو من أشعار أحمد فؤاد نجم زي “منصورة يا مصر مش بجميلة العسكر”.
– الجدير بالذكر أيضا أنه مصطفي له أربعة ألبومات وهي رباعيات الخيام – أصيل – بردة، وألبوم توحد اللي استلهمه من مقال لعلاء عبد الفتاح بنفس العنوان، والذي يضم مؤلفات موسيقية فيها قدر كبير من التجريب والمغامرة اللي بيمزجها مع حفاظه على التراث، وعزفه في أكثر من دولة منهم ألمانيا، البرتغال، لبنان، لكن للأسف محدش في بلده اهتم رغم ان دي موسيقى بس مفيهاش كلمات.
*****
– بنهنئ مرة تانية مصطفي سعيد وكل المبدعين المصريين اللي لم يسمح لهم المجال أنهم يكملوا في مصر، وبنتمني مع الوقت بلدنا تكون أفضل ويكون في مكان أكبر للمبدعين اللي زي مصطفي وغيره كتير.
– مصطفي وغيره من المبدعين المصريين اللي بياخدوا تقدير عالمي أكبر دليل علي أنه قد ايه حرية الابداع والتعبير مهمة للبلد وأد ايه دايما عند شبابنا مواهب وقدرات تسحق التشجيع والاحتفاء.
المصادر