الصور اللي قدامكم فيها خبرين قدام يهمونا جداً النهاردة.
– الخبر الأول بتاريخ ٢٤ مارس ٢٠١٣ عن استدعاء جهاز الكسب غير المشروع للواء عاطف عبدالحميد، وزير النقل سابقاً ورئيس شركة مصر للطيران سابقاً، ومعاه نائب رئيس الشركة، بسبب استيلائهم على ٤ مليون جنيه من أرباح الشركة بشكل غير شرعي.
“وبمواجهتهما، اعترفا بارتكاب الواقعة وطلبا تسديد المبلغ المستولى عليه، وبعد السداد تقرر صرفهما.”
اللواء عاطف عبدالحميد ده، الفاسد رسمياً باعترافه قدام جهة قضائية … هوا محافظ القاهرة الجديد!
– الخبر التاني بتاريخ ٢ يوليو ٢٠١٠ عن فضيحة أكاديمية كانت معروفة جداً وقتها، لما جامعة عين شمس باعت للطلاب شهادات ماجستير مهنية ودكتوراه مهنية مضروبة، الإدارة قالت للطلاب إنها بالتعاون مع جامعة ويست بروك الأمريكية، بعدين ظهر إنه الجامعة متعرفش أي حاجة عن الموضوع، وإن الشهادات بيصدرها كيان وهمي تاني اتعمل باسم شبيه لخداع الناس “ايم ويست بروك” ودي عبارة عن جامعة أون لاين، والشهادات غير معتمدة من المجلس الأعلى للجامعات في مصر كمان، يعني لا تنفع جوا ولا بره مصر.
الكلام ده اتكشف بعد ما ١٢٣٢ طالب دفعوا حوالي ٣٠ مليون جنيه.
مسئول رئيسي عن القصة دي هوا نائب رئيس الجامعة د.جمال سامي، اللي في الأول قال لليوم السابع إن “هذا البرنامج متميز جداً، وأنه بسبب رخص سعره مقارنة بالبرامج المماثلة، يواجه هجوماً شديداً من الجامعات الأخرى”، وحتى بعد ما اتكشفت الخدعة واتنشرت الأخبار والطلاب قالوا هنرفع قضايا على الجامعة، عمل اجتماع وقالهم ان الجامعة الأمريكية حقيقة وعنوانها على الانترنت كذا، وبعدين طلع الموقع والايميل معمولين من داخل مصر.
د.جمال سامي ده، اللي هوا إما فاسد، وإما منخفض الكفائة جداً واتخدع في القضية دي … هوا محافظ الفيوم الجديد!
وبالمناسبة لما كان نائب رئيس الجامعة كان رئيسها هو أحمد زكي بدر وزير التنمية المحلية الحالي، وده جايز يفسر ليه تم تعيينه محافظ.
*****
سؤال بسيط:
– هوا تقارير الأجهزة الرقابية و “السيادية” اللي بتعمل عن أي مرشح إزاي مقالتش المعلومات دي؟
– ولا التقارير فيها المعلومات كاملة اتحطت قدام الرئيس وقرر يعين فاسد أو منخفض الكفاءة؟
مصادر:
“الكسب” يصرف وزير النقل الأسبق ونائب رئيس الشركة بعد سداد ٤ ملايين جنيه
http://bit.ly/2cuyMOA
«عين شمس» تتعاقد مع جامعة وهمية فى أمريكا لمنح الطلاب درجتى الدكتوراه والماجستير
http://bit.ly/2cIO1Wo
تحقيق «اليوم السابع» يكشف المزيد من الشهادات الوهمية فى جامعات ومعاهد مصر
http://bit.ly/2cyNP8L
*****
حابين كمان نقول ان التعيينات الأربعة للمحافظين الباقيين كانت كالتالي:
١- اللواء عمرو عبد المنعم – محافظ القليوبية
٢- اللواء رضا فرحات – محافظ الاسكندرية
٣- اللواء عصام الدين البديوى – محافظ المنيا.
٤- اللواء أحمد حامد حسن – محافظ السويس.
*****
خبر جديد: محافظ القاهرة اللواء عاطف عبد الحميد، أول ما راح مقر المحافظة نزل ساحة انتظار الديوان عشان يختار العربية اللي هيتنقل بيها، وطلب عربية مرسيدس.
إحنا مش ضد انه يركب عربية تليق بيه وبمنصبه، بس هوا احنا نعرف عدد العربيات الفاخرة بجراج كل محافظة كام؟ ليه سيارات ومواكب المسئولين متخضعش لبعض التخفيض عشان الأزمة المالية الحالية؟ ولا هيا الناس بس اللي لازم تتخفض ميزانياتها مش المسؤولين؟
المصدر: فى أولى مشاهده بالديوان.. محافظ القاهرة يتفقد ساحة السيارات ويختار المرسيدس
http://bit.ly/2cfAam5
