– يوم الثلاثاء اللي فات، هيئة محلفين أمريكية أدانت بول مانافورت الرئيس السابق للحملة الانتخابية لدونالد ترامب بتهم الاحتيال الضريبي وعدم الإفصاح عن حسابات بنكية خارجية، وفي نفس اليوم، محامي ترامب الشخصي مايكل كوهين اعترف بارتكابه 8 تهم، من ضمنهم الاحتيال وخرق قوانين تمويل الحملات الانتخابية.
– دي مش إدانة عادية في تهم مالية، لكن ليها علاقة بترشح ترامب للرئاسة، وبالتالي التحقيقات القضائية مع ترامب قربت أوي وده قانوناً بداية طريق عزله.
*****
إيه مشكلة ترامب؟
– من اللحظة الأولى لانتخاب ترامب وفيه أنباء وتسريبات عن شكوك أجهزة استخباراتية في أمريكا في دعم روسي لترامب في الانتخابات، وبالفعل الموضوع عمال يكبر، وكلنا شفنا مثلا جلسة استماع الكونجرس لمارك زوكربيرغ مؤسس ورئيس فيسبوك عن موضوع الحسابات المزيفة والاعلانات وكشف سرية مستخدمي فيسبوك.
– في نوفمبر 2016 طلب الكونجرس من وزارة العدل إنها تحقق في القصة، ولما وزير العدل حيف سيشن (صاحب العلاقة الجيدة مع ترامب) استشعر الحرج وابتعد عن التحقيقات بعد ما كان ترامب متصور انه هينهي التحقيقات لصالحه في أسرع وقت.
– في مايو 2017 نائب وزير العدل روزنشتاين اختار تعيين محقق خاص اسمه روبرت مولر، وإداله صلاحيات موسعة، عشان يحقق في احتمال تورط حملة ترامب في التواصل مع روسيا لدعم حملته الانتخابية، وده كان موضع ترحيب من الكونجرس (شيوخ ونواب) اللي بيسيطر على أغلبيته الحزب الجمهوري (حزب ترامب).
– صلاحيات مولر سمحت ليه يحقق في أي جريمة ليها علاقة بالتأثير على الانتخابات الأمريكية، وبناء على ده سمعنا عن قضية تانية، ترامب متهم فيها بدفع رشوة 130 و 150 الف دولار لممثلة أفلام إباحية وعارضة أزياء، عشان يسكتوا عن إقامة ترامب علاقة جنسية معاهم، لإن ده لو كان اتعرف هيأثر عليه في الانتخابات.
– القضية التالتة المتعلقة بالموضوع بتدور حوالين الكذب على المحققين أو محاولة عرقلة العدالة، ودي كمان مسببة مشاكل لترامب، عشان محاولات وقف التحقيق اللي بيعملها وبيتكلم عنها طول الوقت. مثلًا، ترامب أقال جيمس كومي مدير مكتب التحقيقات الفيدرالية الـ “FBI” بعدما رفض طلبه بوقف التحقيق.
*****
ازاي المحققين شغالين في القضية؟
– مبدئيًا محاكمة ترامب وهو في السلطة أمر صعب حسب القوانين الأمريكية، لإن سجن الرئيس هيأثر على مهام وظيفته، وبالتالي لازم يتم عزله من البرلمان.
– وفقًا للدستور الأمريكي يمكن عزل الرئيس في حالة تصويت أكتر من نص أعضاء مجلس النواب، وبعدها ممكن يتحاكم في حال تصويت أغلبية التلتين في مجلس الشيوخ على القرار ده، بعد الإدانة القضائية.
– إدانة شركاء ترامب ومسؤولي حملته الانتخابية، والحصول على أدلة كفاية على تورط ترامب في القضية هي بداية مسار عزله.
– عشان كدا المحقق روبرت مولر بيحاصر ترامب بإدانة كل رجالته لحد ما يتم الوصول ليه، وده بيسموها سياسة “الإمساك بالسمك الصغير للإمساك بسمكة القرش”، من ضمن الجرائم تجاوزات مالية وضريبية عشان يحصل منهم على اعترافات ومعلومات منهم عن اللي حصل.
– السياسة دي متبعة في أمريكا، بحيث إن المتهم لو أقر بالذنب، ممكن يحصل على عقوبة مخففة مقابل الإدلاء بمعلومات تساعد المحققين على الوصول لباقي المتهمين.
– بالتأكيد ترامب كان منزعج من المحقق ده وتعيينه، وصرح قبل كده بأنه منحاز ضده بسبب كون فريق التحقيق اللي معاه ديمقراطيين متشددين، وانه ده شبهة تواطؤ وكان يجب انه مولر ميبدأش التحقيق في قضية التدخل الروسي، لكن فوجئ ان حزبه الحزب الجمهوري صرح في مجلس الشيوخ بإن إقالة مولر خط أحمر وهي بداية النهاية لترامب، وده اللي خلاه ينفي نيته لإقالته رسمياً.
*****
مين الشخصيات اللي طالتها التحقيقات لحد دلوقتي؟؟
– جاريد كوشنر: مستشار ترامب وزوج بنته، لغاية دلوقتي متمش تحقيق معاه من المستشار مولر والمكتب الفيدرالي باعتباره متهم، لكنه تم استجوابه في الكونجرس مرتين، واعترف في المرتين إنه قابل 4 شخصيات روسية لكنه قال إن ده كان في إطار قانوني، وتم بعد فوز ترامب بالرئاسة وده أمر مفهوم ومبرر قانوناً، رغم وجود بعض التقارير الصحفية اللي بتتكلم عنه كمتهم أو ضالع في التواصل مع الروس بطريقة غير سليمة.
– ريك جيتس: نائب مدير الحملة الانتخابية واحد من المتهمين، أقر بالذنب بعدما قال معلومات كاذبة عن القضية.
الاعتراف ده جه بعد ما تم اتهام محامي مقرب من روسيا اسمه أليكس فان دير زوان، عشان كذب على المحققين وقال بيانات مش حقيقية عن اتصالاته بجيتس.
– جورج بابادوبولوس: مستشار السياسة الخارجية السابق لترامب اعترف إنه كذب على الـ FBI بخصوص تواصله مع مسؤولين روس للبحث والتنسيق في بعض قضايا السياسية الخارجية، وفي حكم هيصدر ضده بتاريخ 7 سبتمبر القادم.
– مايكل فلين: مستشار الأمن القومي السابق أقر بإنه كذب على الـ FBI بخصوص لقائه بالسفير الروسي في واشنطن قبل ما ترامب يبقى رئيس، ووزارة العدل توصلت لصفقة معاه، يتعاون مع التحقيق مقابل عدم تعرضه للسجن لمدة طويلة.
– مايكل كوهين: محامي ترامب السابق، وقدم اعتراف حوالين تقديم ترامب رشوة لامرئتين يدعيان إقامة علاقة جنسية معه في مقابل سكوتهم عشان ميأثروش على نتايج الانتخابات، وده بيسوأ موقف ترامب أكتر وخلاه يطلع يقول عنه كذاب.
– وفي نص مسار التحقيقات ده وجه مولر اتهامات ضد 13 شخصية روسية منهم ضباط مخابرات وأصحاب بعض الشركات بالتدخل في مسار الانتخابات الأمريكية.
– وأخيراً بول مانفورت مدير حملة ترامب اللي تم إدانته من هيئة المحلفين في 8 تهم متعلقة بالاحتيال والتهرب الضريبي منها قضايا قديمة، وده بهدف الضغط عليه للاعتراف حول علاقة ترامب بالروس.
– يوم الجمعة اللي فاتت، مولر ادى حصانة لاتنين صحفيين، واحد منهم كان صديق قديم ترامب، عشان يدلى بتفاصيل دفع رشورة للممثلة وعارضة الأزياء عشان يسكتوا عن علاقتهم الجنسية بترامب.
– كمان ادى حصانة لآلن وايسلبرج المدير المالي لمؤسسة ترامب عشان يدلى بتفاصيل قصة محامي ترامب اللي دفع الرشوة للاتنين.
*****
يعنى خلاص ترامب هيتعزل أكيد؟
– الموضوع مش بالبساطة دي لأنه تاريخياً مفيش رئيس اتعزل أثناء فترة حكمه، وانه مثلاً الرؤساء جونسون وكلينتون الكونجرس مكملش مسار عزلهم وانتظروا لنهاية مدتهم الانتخابية، اللي بالطبع كملوها وهم في حالة ضعيفة، حتى نيكسون اللي حصلت في عهده فضيحة ووترجيت الشهيرة (تجسسه على الحزب المنافس)، الراجل اتقدم باستقالته قبل ما يعزله الكونجرس.
– طيب المسار برضه يمشي ازاي؟ في نوفمبر الجاي في انتخابات تجديد نصفي في الكونجرس (بغرفتيه)، وبحسب نتايج الانتخابات ده هيتحدد مين الحزب صاحب الأغلبية حتى نهاية فترة ترامب، ولو بقت الأغلبية الكافية مع الحزب الديمقراطي فاحتمالية عزل ترامب أكبر، لكن لو محصلوش على المقاعد الكافية ده هيقلل فرص عزل ترامب لكن السياسة مليانة مفاجئات، ودول شهرين بحالهم.
– لغاية دلوقتي المراقبين والمحللين شايفين احتمالية فوز الديمقراطيين عالية المرة ده، وللسبب ده الكل منتظر الانتخابات، لدرجة ان ستيف بانون كبير مستشاري الشئون الاستراتيجية السابق للرئيس ترامب بيقول: إن انتخابات نوفمبر المقبل هتكون بمثابة استفتاء على عزل ترامب.
– ولو نجحت التحقيقات في إدانة ترامب وقدم اعتراف بالاذناب فهنا فرص الإطاحة به أكبر وأكبر.
– لو الرئيس اتعزل مش هتتعمل انتخابات مبكرة، لأن النظام الأمريكي إن نائب الرئيس بيكمل فترته لو حدث ما منعه من إكمالها، وبالتالي هيتولى نائبه مايك بينس.
*****
الخلاصة اللي تهمنا احنا كمصريين:
– أنا أو الفوضى، ده أسلوب كل الرؤساء المُدانين لما بيحسو بالخطر. يوم الخميس اللي فات اتكلم ترامب مع فوكس نيوز وقالهم لو تم عزلي الأسواق هتنهار والكل هيبقوا فقرا، وفي أزمة هتحصل في الاقتصاد العالمي .. لكن الفرق إنه في برلمان حر وصحافة حرة وحياه سياسية تقدر تواجه اللي بيقوله ترامب بالحقايق وبالبدائل، وبالتالي كلامه يبقى مجرد كلام عاطفي شعبوي.
– حزب ترامب حاليًا أغلبية في مجلس الشيوخ والنواب، ورغم كدا التزموا ديمقراطياً بأهمية انه الرئيس ميكونش عليه شبهة تهرب من العدالة، رغم خطورة اتهام التعاون غير مشروع مع دولة أجنبية، مقالوش لا ده الرئيس بتاعنا ويعمل اللي هو عاوزه واللي مش عاجبه يروح بلد تانية، لأ أكدوا ان ده حق الشعب في المعرفة والحقيقة ووافقوا على التحقيقات وهددوا ترامب بالعزل لو غير المحققين.
قيم زي دي كان ليها دور كبير في المكانة اللي وصلتلها أمريكا بفضل مؤسساتها القوية الأكبر من أي شخص، ونظام العدالة الصارم والمستقل .. ده هوا اللي بيحمي المواطنين والبلد من أي خطر سواء مصدره مواطن بسيط أو رئيس الدولة، كله تحت القانون.
– بنكرر ان البلد اللي فيها صحافة قوية، بتدور ورا قصص الفساد واستغلال النفوذ، هيا اللي بتحمي الوطن .. شفنا صور الصحفيين الأمريكيين إزاي كانوا بيتسابقوا يوم التلات بعد الجلسة عشان يلحقوا ينشروا الخبر، وشوفنا غلافة مجلة التايمز اللي مصور ترامب غرقان في المكتب البيضاوي.
مصر فيها صحفيين ومراسلين محترمين كانو بيجرو وسط الخطر والضرب عشان ينقلوا الصورة للمواطن، لكن للأسف النهاردة مصر من أعلى الدول في حبس الصحفيين، وشرد مئات منهم بعد قفل قنوات وجرايد، ومع الوقت الصحافة على وشك الاختفاء من مصر.
– اتكلمنا من أسبوعين عن اللي حصل في بيرو، لما تحقيق صحفي كشف مكالمات صوتية فيها تفاصيل فساد كبار القضاة، وقلنا إن إصرار الناس على معرفة الحقيقة وحساب الجاني هو اللي أدى لعزل القضاة دول، وتسبب في محاكمة 3 رؤساء في بيرو خلال آخر 15 سنة. المجتمعات وشراكة الناس هيا اللي بتدي البلد فرصة لإصلاح الأخطاء والتدقم، دي القاعدة من أكبر دولة زي أمريكا لدولة نامية زي بيرو.
*****
