– يوم الجمعة اللي فاتت 7 يناير، تم القبض على رجل الأعمال محمد الأمين ، وتوجيه تهم الاتجار البشر له بسبب تهم الاستغلال الجنسي لبنات في دار أيتام أنشأها في بني سويف.
– قررت النيابة حبسه 4 أيام على ذمة التحقيق، وعملت بيان رسمي عن القضية، ووزعت تفاصيل الاتهامات.
– واستمعت النيابة العامة لأقول 9 فتيات من ضحايا محمد الأمين، فى قضية اتهامه بالتعدي عليهن وهتك أعراضهن، والاتجار بالبشر.
– في انتظار انتهاء تحقيقات النيابة في القضية اللي فيها تفاصيل كثير مرعبة، لكن المشكلة وزي أي حاجة في مصر أنه فيه علامات استفهام كثير محتاجة لتوضيح.
– ايه القصة؟ مين هو محمد الأمين؟ ليه تأخرت وزارة التضامن في التحرك؟ وأسئلة تانية هنحاول نجاوبها في سياق البوست ده؟
*****
ايه القصة؟
– محمد الأمين أسس دار أيتام إسمها الأيدي الأمينة للفتيات القاصرات، استغل الأمين سلطته على البنات في الدار، بأنه كان بيطلب منهم أفعال جنسية زي أنهم يرقصوا له.
– وبحسب بيان النيابة اللي وجهت له تهمة الاتجار في البشر فهو استغل ضعف البنات بقصد التعدي عليهن جنسيًا، وهتك عرضهن بالقوة والتهديد، وتحريضه لأخرى على ارتكاب تلك الجريمة.
– استخدام القوة كان جزء منه أنه يمضي البنات على عقود جواز عرفي، ويطلب منهم يرتكبوا أفعال جنسية مع بعض أو معاه، وفي أحد الرحلات خد مجموعة من البنات الساحل ولبسهم مايوهات بيكني واللي كانت بترفض كانت بتتعرض للعقاب.
– القضية بترجع لنقل ثلاث فتيات من دار أيتام في الجيزة لدار الأيتام بتاعة الأمين في بني سويف، وبعدين خدهم الأمين لفيلته في الساحل الشمالي وحصلت حادثة تحرش بكل واحدة فيهم، وقام بحبس البنات اللي رفضت ده وهددهم بتسليمهم للأحداث.
– بعدها الفتيات التلاتة دول تواصلوا مع موظف في دار الأيتام القديمة في الجيزة واللي بلغ الوزارة وبدورها بعتت الملف للأجهزة الأمنية بعد التحقيق في الواقعة والتأكد منها.
– التفاصيل المرعبة للقضية كثير جدا، والنيابة استدعت كثير من البنات اللي تم الاعتداء عليهم، بالإضافة لفيديوهات اتصورت للفتيات.
– نيفين القباج وزيرة التضامن الاجتماعي كانت استبقت البيان بتاع النيابة وقالت في بيان رسمي صادر عن الوزارة أنه وزارة التضامن هي من أبلغت النيابة عن الواقعة بعد التنسيق مع الجهات المعنية وأنها أغلقت الدار (دار الأيتام بعد اكتشاف المخالفات اللي تمت دي، لكن بدون ما توضح موعد الغلق).
– بعد كده نشرت عدد من الصحف مستندات واضح فيها أنه إغلاق الدار كان من نوفمبر اللي فات، بالتالي المشكلة أنه تم اكتشاف الحوادث دي، وتم السكوت لشهرين كاملين البنات دول كانوا بيتعرضوا لنفس الاستغلال الجنسي.
– الوزيرة قالت نصاً: “وصل لنا تقرير في أغسطس الماضي بأن فتيات الدار تظهر عليهم مشكلات نفسية واكتئاب، ووصل لي تقرير يوم 22 نوفمبر 2021 بأن الفتيات صرحوا بأنهم يتعرضون للتحرش من أحد المتواجدين بالدار وأغلقنا الدار بعد التقرير فوراً”.
– مصدر من وزارة التضامن اتكلم مع موقع مدى مصر، وقال أنه النيابة هي اللي قررت توزع مستندات القضية على الصحف مش الوزارة، وأنه الوزارة عارفة الموضوع منذ عدة أشهر وحققت فيه وأرسلت الملف إلي عدد من أجهزة الدولة منها النيابة العامة.
– والأهم من كده أنه الوزيرة شددت وقتها على أنه القضية خط أحمر ونبهت بعدم الحديث عنها لوسائل الإعلام.
– الكلام ده يبدو دقيق لأنه بيفسر ليه في ناس في بداية ديسمبر يعني من شهر تقريبا كان في كلام منتشر على السوشيال ميديا وأكثر من بوست بيتهم الأمين بالاعتداء على فتيات قاصرات في الدار بتاعته وبيوصفه بصاحب الأيدي القذرة ، والأيدي اللي تتقطع.
– طبقاً للتسلسل الزمني دا فأخبار اليوم نشرت وقالت إن النيابة العامة تلقت بلاغًا من المجلس القومي للأمومة والطفولة في العاشر من شهر ديسمبر من العام الماضي بشأن ما نُشِر بإحدى صفحات مواقع التواصل الاجتماعي من هتك المتهم عرض فتيات مقيمات بدار أيتام يمتلكها رجل الأعمال محمد الأمين ببني سويف، الأمر اللي رصدته وحدة الرصد والتحليل بإدارة البيان بمكتب النائب العام في ذات التوقيت، فتولت النيابة العامة التحقيقات.
– يبقى هنا السؤال الموجهة للوزارة أو الدولة بشكل عام من أغسطس لحد ديسمبر ايه اللي كان بيحصل وأخر القضية لحد الوقت دا؟ خاصة وإننا عرفنا من تصريحات للوزيرة إن محمد الأمين حاول يتواصل معاها بعد إغلاق الدار
*****
مين هو محمد الأمين؟
– في ظل يعني التوتر اللي حاصل في الفترة الأخيرة بين الدولة وعدد من رجال الأعمال اللي منهم ناس زعلانة من مزاحمة الجيش وبعد اللي حصل مع حسن راتب والاتهام بالاتجار في الآثار في ناس قررت أنها تتطوع وتقول أنه دي حملة من الدولة عشان يخدوا شيء ما يعني من محمد الأمين.
– لكن القصة دي فيها مشكلة كبيرة وهو أنه محمد الأمين رجل مقرب جدا من النظام، وهو واحد من أبرز رجال الأْعمال اللي ضخوا فلوس في الإعلام بعد يناير 2011.
– وبداية من 2016 المخابرات العامة عن طريق المتحدة ومن بعدها إعلام المصريين أصبحوا شركاء له في ملكية قنوات زي سي بي سي والوطن والنهار.
– الأمين أيضا هو واحد من كبار الناس اللي شغاله في قطاع المقاولات في البلد، وعضو في مجلس أمناء صندوق تحيا مصر اللي كان تنازل عن نصف أسهمه في عامر جروب يعني للصندوق بحسب تقارير إعلامية بقيمة 1.2 مليار جنيه.
– العلاقة الجيدة مع الدولة والأجهزة السيادية دي تخلي مش سهل تلفيق تهم زي دي لواحد بحجم الأمين، لكن برضه التأخر في الإبلاغ وانتظار تعليمات أو تحقيقات من الأجهزة الأمنية بيوحي أنه الموضوع بالبلدي اتركن شوية في الدرج لحد ما بقى في دافع لاستخدامه دلوقتي، لكن الفيصل الحقيقي بين كل التكهنات دي هو التحقيقات وسيرها ودا اللي هنتابعه مع بعض.
*****
نشوف ايه من القضية دي؟
– من شهور أصدر أحد القضاة المصريين حكم عشر سنين على بنت اسمها حنين حسام وبنت تانية إسمها مودة الأدهم بنفس التهمة بتاعه الاتجار بالبشر رغم أنه كل الدلائل اللي في القضية كانت بتقول أنه مفيش دافع الاتجار في البشر ولا حاجة.
– بالتالي الأمين لو اتحط على نفس المسطرة فلازم يكون الحكم عليه على الأقل يعني عشر سنين.
– لكن بعيدا عن شخص محمد الأمين القضية دي بتقول كثير عن ضرورة تشديد الرقابة من وزارة التضامن الاجتماعي على المؤسسات اللي زي دي، سواء دور رعاية الأيتام للفتيات أو الفتيان ومؤسسات الإيواء والتأهيل التابعة للوزارة.
– كتير بتظهر قصص زي دي عن تحرش وعنف بيقوم به الموظفين تجاه النزلاء في الأماكن دي، طبعا القضية دي تفاصيلها مرعبة، لكن القضايا التانية اللي بيحصل فيها تحرش أو تعنيف جسدي من الموظفين والمسؤولين في المؤسسات دي للأطفال كثير.
– ده يخلينا نفكر أنه لازم يكون في رقابة أشد من الوزارة على المؤسسات دي، وتفعيل دور الأخصائيين النفسيين والاجتماعيين في المؤسسات دي وإعطائهم سلطة تخليهم يقدروا يبلغوا عن الانتهاكات دي لو تم رصدها، وضمان سرعة تحرك النيابة والأجهزة الأمنية في الموضوع لأنه موضوع حساس وكل يوم تأخير فيه بيعرض البنات لمزيد من العنف والتحرش والاستغلال.
– لازم يكون في آليات واضحة للأطفال دول للإبلاغ عن الانتهاكات اللي بتحصل لهم، رقم ساخن تابع للوزارة وزيارات دورية من موظفي الوزارة وأخصائيين نفسيين لسؤال الأطفال دول وتطمينهم لو حصل لهم انتهاكات.
– وطبعا لازم نحيي الشاب رامي الجبالي، مؤسس صفحة الأطفال المفقودة على مواقع التواصل الاجتماعي، اللي أثار القضية وخلانا نسمع عنها كلنا، وبعدها النيابة تحقق في الأمر، بعد ما اتهم رجل الأعمال محمد الأمين بهتك عرض 4 فتيات يتيمات كن يقمن في دار «الأيدي الأمينة» ببني سويف اللي بيمتلكها رجل الأعمال.
– وقال الجبالي إنه تقدم ببلاغ رسمي للنيابة العامة، يتهم فيه رجل الأعمال بالابتزاز والتحرش الجنسي بفتيات قاصرات؛ بعد ما حصل على اعترافات في مكالمة مسجلة منهن يحكين فيها ما تعرضن له.
– الحقيقة دي شجاعة له كل التحية والتقدير عليها، لأنه أكيد بيتعرض لضغوط، ويا ريت يتم التحقيق في روايته كاملة، لأن فيها اتهامات لوزارة التضامن بالتقصير في القضية دي وفي غيرها، ولازم كل الحقائق تعرض للرأي العام.
– نتمنى القضية دي تكون بداية للإصلاح وتوفير بيئة آمنة للأطفال في دور الرعاية والأيتام والإيواء في مصر كلها، وأنه محمد الأمين ياخد جزاءه العادل ولا يتدخل في حكم القضاء أشياء تانية.
*****
المصادر