زي ما كلنا بنفرح بمحمد صلاح ومستنيين نشوفه في كاس العالم، عايزين نتكلم عن مصريين تانيين تفوقوا برياضات أخرى وراحوا لبطولات عالمية برضه.. ألف مبروك للمصرية الأسوانية فرح أحمد سعد اللي تألقت في بطولة كأس أوكرانيا وحصلت على ٣ ميداليات 
– نجاح الشباب المصري مش مقتصر علي الرجالة بس، شفنا قريب الباحثات في فريق اكتشاف هيكل الديناصور المصري، والنهاردة عندنا فرح اللي فازت بالميدالية الذهبية بحصان القفز، والفضية بالمتوازي، والبرونزية بالفردي العام.
– فرح بنت نوبية من قرية دابود في أسوان، بتدرب من صغرها على الجمباز، وتخطت كل التحديات لواحدة بظروفها، سافرت اسكندرية وماكنتش بتقدر تروح بشكل مستمر مدرستها، والمدرسه كانت متفهمة تدريبات فرح الكتير، واتمرنت في نادي المؤسسة الرياضية باسكندرية.
– منتخب مصر للجمباز شباب وبنات حصل في الإجمالي على 17 ميدالية في بطولة كأس أوكرانيا.
نتمنى لفرح ولكل زمايلها وزميلاتها التوفيق في مشاركاتهم الجاية في البطولة الأفريقية المؤهلة لأولمبياد الشباب بالأرجنتين 2018.
ولسه فيه أمل طول ما عندنا شباب بيحلموا وقادرين ينجحوا ويتحدوا أي واقع بيحاول يهزمهم.
