الفيديو ده بنشوف فيه المرشح هشام محمد بدوي دسوقي، بيكشف فضيحة رشاوى انتخابية في الانتخابات التكميلية لمجلس النواب اللي بتتم حاليا في دايرة الجيزة بعد وفاة نائبها اللي هوا والد هشام.
– الواقعة متهم فيها المرشح رجل الأعمال محمد أبوالعينين، نائب رئيس حزب مستقبل وطن، اللي في الفيديو هشام بيرفع كيس مليان بطايق ناس غلابة مدفوعلهم لانتخابه، وبيقول انهم ١٢٠٠ بطاقة، وبعدها بيظهر سمسار الأصوات وبيعترف انه متأجر ب ١٠٠ جنيه البطاقة.
– المرشح هشام بدوي بيستغيث بالرئيس السيسي وبيفكره بوعود بدعم الشباب، وبيقول انه رايح يعمل محضر بالواقعة.
***
– لو عندنا سياسات محاربة فساد جادة فعلا، الواقعة دي التحقيق فيها أدلته واضحة، لإن البطايق دي كلها سهل النيابة تسأل كل واحد فيهم اتدفعله كام ولصالح المرشح مين، ده غير شهادة السمسار نفسه .. هل هنشوف تحقيق علني ومحاسبة قانونية؟!
– مفيش أي جريدة أو موقع نشروا الخبر لحد دلوقتي، وده مرة تانية يفكرنا انه مفيش محاربة فساد بدون صحافة حرة، بينما احنا وصلنا لدرجة ان خبر عادي زي ان مرشح يتهم مرشح تاني بشراء الأصوات او يقدم بلاغ مبقاش يتنشر!
– بنردد مع هشام كلامه في آخر الفيديو: “مش دي مصر اللي جاية .. مصر اللي جاية احسن من كده بكتير .. مصر اللي جاية لينا ولولادنا”
